قانات يسلام: اۋسەلەڭدى رينگتە بايقارمىن

بۇگىن الماتىداعى «Mega park» ويىن-ساۋىق ورتالىعىندا قازاقستاندىق قانات يسلام مەن ونىڭ قارسىلاسى گانالىق پاتريك اللوتەيدىڭ, سونداي-اق, ەرتەڭگى كاسىپقوي بوكس كەشى اياسىندا قولعاپ تۇيىستىرەتىن وزگە دە بوكسشىلاردىڭ سالماق ولشەۋ ءراسىمى ءوتتى. شارانىڭ باستى سەبەپكەرلەرى قانات يسلام مەن پاتريك اللوتەي 68 كەلى سالماق دارەجەسىن كورسەتتى. ارتىنشا بوكسشىلاردىڭ كوز تۇيىستىرۋىندە گانالىق سپورتشى قىزۋقاندىلىق تانىتىپ, قاناتتى كەۋدەسىنەن يتەرىپ جىبەردى. بايسالدى قانات سالماقتىلىعىنان تانباي, اۋسەلەڭدى شارشى الاڭدا بايقارمىن دەگەندەي سىڭاي ءبىلدىردى. بوكسشىلاردىڭ كەزدەسۋ الدى سالماق ولشەۋ راسىمىندە قازاقستاندىق بىلعارى قولعاپ شەبەرلەرى جانىبەك ءالىمحان ۇلى, جانقوش تۇراروۆ, رۋسلان مىرساتاەۆ, الي احمەتوۆ, ايدار شارىباەۆ, جۇمان جۇمابەكوۆتاردىڭ قارسىلاستارى بەلگىلى بولدى. ەسكەرتە كەتەيىك, قانات يسلام مەن پاتريك اللوتەيدىڭ جەكپە-جەگى ەرتەڭ, ياعني 29 قازاندا الماتىدا «الماتى ارەنا» سپورت كەشەنىندە وتەدى. قانات يسلام ءوزىنىڭ «WBA fedelatin» چەمپيوندىق بەلبەۋىن قورعاپ, جارتىلاي ورتا سالماقتا «WBO intercontinental» تۇجىرىمىنىڭ چەمپيوندىق بەلبەۋى مەن «UBC» تۇجىرىمىنىڭ الەم چەمپيونى اتاعى ءۇشىن جۇدىرىقتاسادى.