ارحيۆ جۇمىسى – «اشىق ۇكىمەت» اياسىندا

قازاقستاننىڭ بارلىق وبلىسىندا ورنالاسقان ارحيۆتەردىڭ باسشىلارى, بەلدى ماماندارى, جوعارى وقۋ ورىندارىنداعى ارحيۆ ءىسىنىڭ ماماندارىن دايارلايتىن بىلىكتى ۇستاز-عالىمدار ەكى كۇندىك سەمينار-كەڭەسكە قاتىستى. شاراعا كەلگەندەر «اشىق ۇكىمەت» پورتالى جاعدايىندا ارحيۆتەردىڭ اتقاراتىن مىندەتتەرىن, قابىلداۋعا دايارلانىپ جاتقان «قازاقستان رەسپۋبليكاسىنىڭ ۇلتتىق مۇراعات قورى جانە ارحيۆتەرى» اتتى زاڭ جوباسىنا وزگەرىستەر مەن تولىقتىرۋلار ەنگىزۋگە بايلانىستى ۇسىنىستاردى تال­قى­لاپ, كەڭەسۋ ءۇشىن الماتىداعى ورتالىق مەملەكەتتىك ارحيۆ مەكەمەسىنە جينالدى. بەس جىلدان كەيىن باستارى قوسىلىپ وتىرعان مۇراعات ءىسىنىڭ ماماندارى تالقىلايتىن ماسەلە شىنىندا دا شاش-ەتەكتەن بولىپ شىقتى. بۇل سەميناردا, سونداي-اق, «اشىق ۇكىمەت» شەڭبەرىندە ەلەكتروندىق قۇجاتتاردى ساقتاۋ جانە ونى جۇيەلەۋ, جۇزەگە اسىرۋ ءىسى, حالىققا قول­جەتىمدى اقپاراتتار تاراتۋ جانە ارحيۆ ءىسىنىڭ ماماندارىن دايارلاۋ جۇمىسى قاتىسۋشىلار قاراستىراتىن نەگىزگى ماسەلە رەتىندە ۇسىنىلدى. ايتىلعان ويدىڭ كەيبىرى پىكىرتالاس تۋ­­عىزىپ, قىزۋ تارتىستىڭ وزەگىنە اينال­عا­نىنىڭ ءوزى بۇل مەكەمەلەردىڭ قىزمەتى تولىقتاي رەتكە كەلىپ بولماعانىن, ءالى دە دايەكتەلىپ, جۇيەلەنە ءتۇسۋى ءتيىس ولقى تۇسى بار ەكەنىن بايقاتتى. زامانعا ساي ارحيۆ قۇجاتتارىن جيناقتاپ, ساق­تاۋ­دى قامتاماسىز ەتۋ تەك وسى سالا قىز­مەت­كەر­لە­رىنىڭ عانا باس قاتىرار شارۋاسى ەمەس, ۇكىمەت دەڭگەيىندە شەشىلۋى ءتيىس سۇراقتاردى ءار ايماقتان كەلگەن ارحيۆ وكىلى سايلاپ كەلىپتى. بۇل سەميناردا باسقانى ايتپاعاندا, ءالى كۇنگە دەيىن ارحيۆ پەن مۇراعات, مۋزەي مەن مۇراجاي سوزدەرىن دۇرىس قولدانۋدى بىلمەي شاتاسىپ جۇرگەندەرمەن كۇرەسىپ شارشاپ جۇرگەن ارحيۆ ماماندارىنىڭ جۇمىسىن رەتتەۋدىڭ تەتىگىن ءالى دە جەتىلدىرە ءتۇسۋ كەرەكتىگى ءسوز بولدى. «مەملەكەت باسشىسى بەس ينستيتۋتتىق رە­فورمانى ىسكە اسىرۋ ماقساتىندا «اشىق ۇكىمەت» قالىپتاستىرۋدى جۇزەگە اسىرۋ بويىنشا تاپسىرما بەرگەن بولاتىن. بۇل باعىتتا الدىمەن زاڭنامالىق بازانى جەتىل­دىرۋ قاراستىرىلدى. تالقىلاناتىن نەگىزگى ماسەلەنىڭ ءبىرى – مينيسترلىك ازىرلەپ جاتقان ارحيۆ ءىسى سالاسىندا قىزمەت كورسەتۋدى جە­تىل­­دىرۋ ماسەلەسىن زاڭ جوباسى نەگىزىندە جۇزەگە اسىرۋ بولىپ وتىر. ەكىنشىدەن, رەس­­پۋبليكاداعى مەكەمەلەردىڭ زاماناۋي اقپاراتتىق ينفراقۇرىلىمىن قۇرۋ, ەلەكتروندى ارحيۆتەردە ساقتالاتىن رە­سۋرستارعا كەڭ قولجەتىمدىلىكتى قام­تا­ماسىز ەتۋ ءۇشىن سەرۆيستەردى دامىتۋى­مىز كەرەك»,–دەيدى مادەنيەت جانە سپورت مينيسترلىگى مۇراعاتتىق ءىس جانە قۇ­جات­تا­ما دەپارتامەنتىنىڭ ديرەكتورى ءاليا مۇستافينا. ءاليا قۇسايىنقىزى زاڭ جوباسىنا باي­لانىستى رەسپۋبليكالىق, ايماقتىق ارحيۆ­تەردىڭ ۇسىنىستارى مەن تالاپ-تىلەك­تە­رىن مينيسترلىككە جولداۋدى سۇرادى. ءما­دەنيەت جانە سپورت مينيسترلىگىنىڭ ۇيىم­داستىرۋىمەن وتكىزىلگەن سەميناردا جەكە قور, جوبالىق قۇجاتتار, تەلە-راديوقۇجاتتاردى تسيفرلىق پىشىمگە اۋىستىرۋ تاقىرىپتارى بويىنشا شەبەرلىك-ساباقتارى كورسەتىلدى. ايگۇل احانبايقىزى, «ەگەمەن قازاقستان» الماتى