مەمحاتشى گەرمانيا دەپۋتاتىمەن كەزدەستى

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا گەرمانيا فەدەراتيۆتىك رەسپۋبليكاسى پارلامەنتى بۋندەستاگىنىڭ دەپۋتاتى سيبيللە پفايفەرمەن كەزدەستى, دەپ حابارلايدى اقوردانىڭ ءباسپاسوز قىزمەتى. اڭگىمەلەسۋ بارىسىندا گ.ابدىقالىقوۆا قازاقستان تاۋەلسىزدىگىنىڭ 25 جىلدىق مەرەيتويىن قارسى الۋعا دايىندالىپ جاتقانىن اتاپ ءوتتى. تاريحي ولشەممەن العاندا, ەلىمىز قىسقا مەرزىم ىشىندە ەلەۋلى ناتيجەلەرگە قول جەتكىزدى جانە بۇگىنگى تاڭدا قازاقستاننىڭ الدىندا الەمنىڭ ەڭ دامىعان 30 ەلىنىڭ قاتارىنا قوسىلۋ ماقساتى تۇر. وسى مىندەتكە قول جەتكىزۋ ءۇشىن قازاقستان پرەزيدەنتى بەس ينستيتۋتسيونالدىق رەفورما مەن «100 ناقتى قادام» ۇلت جوسپارىن ۇسىندى. مەملەكەتتىك حاتشى گەرمانيا قازاقستاننىڭ ەۋروپالىق وداقتاعى باستى سەرىكتەسى ەكەنىن ايتتى. كەلەسى جىلى ەلدەرىمىز اراسىنداعى ديپلوماتيالىق قاتىناستىڭ ورناعانىنا 25 جىل تولادى. كەزدەسۋ بارىسىندا قازاقستان مەن گەرمانيا اراسىنداعى ەكونوميكالىق, الەۋمەتتىك-مادەني ءوزارا ءىس-قيمىل جونىندە بىرقاتار وزەكتى ماسەلە تالقىلاندى. تاراپتار قازىرگى ساۋدا-ەكونوميكالىق جانە ينۆەستيتسيالىق بايلانىستاردىڭ دامۋ قارقىنى قاناعاتتانارلىق ەكەنىن اتاپ ءوتتى. قازاقستان مەن گفر اراسىنداعى تاۋار اينالىمى 2016 جىلعى قاڭتار-تامىز ارالىعىندا 1,2 ملرد دوللار بولدى. قازىرگى ۋاقىتتا قازاقستان جاعى مەن LANXESS, GEA, BASF, DACHSER, BAYWA سياقتى جەتەكشى نەمىس كومپانيالارى قۇرىلىس, حيميا, فارماتسەۆتيكا, ماشينا جاساۋ, ەنەرگەتيكا, اۋىل شارۋاشىلىعى ونىمدەرىن قايتا وڭدەۋ, مەتاللۋرگيا جانە كولىك-لوگيستيكا سالاسىندا ينۆەستيتسيالىق جوبالاردى جۇزەگە اسىرۋ جونىندە كەلىسسوزدەر جۇرگىزۋدە. تاراپتار قازاقستان رەسپۋبليكاسى مەن ەو اراسىنداعى كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمدى ىسكە اسىرۋ ماسەلەسىنە ەرەكشە نازار اۋداردى. سونداي-اق, كەزدەسۋ بارىسىندا ايەلدەردى جان-جاقتى قولداۋ جانە بۇۇ-نىڭ ورنىقتى دامۋ ماقساتتارىن ىسكە اسىرۋ ماسەلەلەرى تالقىلاندى. مەملەكەتتىك حاتشى بۋندەستاگ دەپۋتاتىنا استانادا وتەتىن «ەكسپو-2017» حالىقارالىق كورمەسىنە دايىندىق جونىندە مالىمدەدى. گ.ابدىقالىقوۆا 2017 جىلعى 12 شىلدەدە قازاقستاننىڭ گفر-دەن كەلەتىن, گەرمانيانىڭ ۇلتتىق پاۆيلونىنىڭ اشىلۋىنا قاتىساتىن مارتەبەلى مەيمانداردى كۇتەتىنىن ايتتى. سوڭىندا مەملەكەتتىك حاتشى قازاقستان مەن گەرمانيا اراسىنداعى ديالوگ پەن ءوزارا تۇسىنىستىكتى نىعايتۋعا ىقپال ەتكەنى ءۇشىن س.پفايفەرگە ريزاشىلىعىن ءبىلدىردى.