استانا مەگاپوليسكە اينالادى

الداعى ۋاقىتتا ەلوردا الەمنىڭ وزىق تەحنولوگيالارىمەن جابدىقتالعان ءىرى مەگاپوليسكە اينالادى. بۇل ماقساتقا «استانا» حالىقارالىق قارجى ورتالىعى دا ءوز ۇلەسىن قوسادى. NEWENERGY حالىقارالىق ستارتاپ جوبالار بايقاۋىندا استانا اكىمى اسەت يسەكەشەۆ وسىلاي دەدى, دەپ حابارلايدى egemen.kz Baq.kz - كە سىلتەمە جاساپ. «بۇگىنگى حالىقارالىق ستارتاپ جوبالار بايقاۋىنا الەمنىڭ كوپتەگەن ەلىنەن يننوۆاتورلار كەلدى. استانا – الەمدە قارقىندى دامىپ كەلە جاتقان جاس قالا. شاھارداعى حالىق سانى 1998 جىلدان بەرى 4 ەسەگە ءوسىپ, 1 ميلليونعا جەتتى. قالاداعى اقشا اينالىمى – 40 ملرد دوللار. ال 14-20 جاس ارالىعىنداعى جاستار قالا تۇرعىندارىنىڭ جارتىسىن قۇرايدى. الداعى ۋاقىتتا استانا حالىقارالىق قارجى ورتالىعىندا بريتانيالىق زاڭ جۇيەسىن قولداناتىن بولامىز. بۇگىندە شەتەلدىك ينۆەستورلارعا ۆيزالىق راسىمدەرگە جانە ولاردىڭ جۇمىس ىستەۋىنە جەڭىلدىك جاسايمىز. استانانى مەگاپوليسكە اينالدىرامىز», - دەدى اكىم.   ونىڭ ايتۋىنشا, قالانى دامىتۋ ءۇشىن يننوۆاتسيالىق تەحنولوگيالار قاجەت. «قارقىندى دامۋعا بەت العان استانادا يننوۆاتسيالىق تەحنولوگيالارعا سۇرانىس وتە جوعارى. سونداي-اق, ءبىز اۋىل شارۋاشىلىعى, مەديتسينا, ەنەرگەتيكا جانە تەحنيكا سالالارىن قامتيتىن 5 وڭىرلىك ورتالىق قۇرعىمىز كەلەدى. بۇل جوباعا حالىقارالىق كومپانيالار مەن يننوۆاتسيالىق جوبالاردى تارتپاقپىز. سمارت شەشىمدەر ەلىمىز بەن قالا تۇرعىندارىنىڭ ءومىرىن جەڭىلدەتەدى دەپ سەنەمىز» - دەدى اسەت يسەكەشەۆ. سونىمەن قاتار, ەلوردا اكىمى شاھاردىڭ ءىرى حالىقارالىق قارجى ورتالىقتارىمەن ءىرى كومپانيالار تىعىز بايلانىس ورناتقانىن اتاپ ءوتتى. «قازىرگى تاڭدا ءبىز جاھانداعى ءىرى يننوۆاتسيالىق دۋباي, لوندون, ماسكەۋ سىندى قالالارمەن جانە نuawei, ماككەنزي, ت.ب. كومپانيالارمەن تىعىز بايلانىس ورناتتىق. ونداعى ماقساتىمىز – استاناعا جاڭا تەحنولوگيالار تارتۋ. بۇل بايلانىس شەتەلدەن ينۆەستيتسيا تارتۋعا مۇمكىندىك بەرەدى», - دەپ تۇيىندەدى ءسوزىن قالا باسشىسى. ايتا كەتەيىك, بۇگىن استانادا NEWENERGY حالىقارالىق ستارتاپ جوبالاردىڭ كونكۋرسى ءوتىپ جاتىر. بايقاۋعا 55 مەملەكەتتىڭ وكىلدەرى قاتىسۋدا. كونكۋرسقا 100 ستارتاپ جوبا ۇسىنىلعان. بايقاۋدىڭ قورىتىندىسى بويىنشا ۇزدىك 30 جوبا «ەكسپو-2017» كورمەسىنە قاتىسۋعا جولداما الادى. ال 5 جوبا قارجىلاندىرىلاتىن بولادى.