باس پروكۋرور ۇرلانعان اقشانى ەلگە قايتارۋ جوباسىن تانىستىردى

بۇگىن باس پروكۋراتۋرادا «قارجىلىق تەرگەپ-تەكسەرۋدىڭ جانە ۇرلانعان اكتيۆتەردى شەتەلدەن قايتارۋدىڭ ۇلتتىق جۇيەسىن دامىتۋ» تاقىرىبىندا دوڭگەلەك ۇستەل ءوتتى, دەپ حابارلايدى egemen.kz baq.kz-كە سىلتەمە جاساپ. وندا شەتەلدەن ۇرلانعان اكتيۆتەردى قايتارۋ جوباسى تانىستىرىلدى. «جوبانى باس پروكۋراتۋرا مۇددەلى قۇقىق قورعاۋ جۇيەسى جانە ارنايى ورگاندارمەن بىرلەسىپ قولعا الدى. بۇۇ-نىڭ ەسىرتكى جانە قىلمىستىق باسقارماسىنىڭ, ەقىۇ اقش ەلشىلىگىنىڭ قولداۋىنا يە بولدىق. بۇگىندە باس پروكۋراتۋرا, ۇلتتىق بيۋرو, مەملەكەتتىك كىرىستەر كوميتەتى جانە ءىىم قىزمەتكەرلەرىنىڭ العاشقى توبى شەت ەلدەردەن كەلگەن ساراپشىلاردان ءبىلىم الدى. ەندى 10 ۇلتتىق ترەنەر دايىندالماق. ولاردىڭ ميسسياسى – باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ بازاسىندا تەرگەۋشىلەر مەن پروكۋرورلار اراسىندا جاڭا ادىستەمەلەردى تاراتۋ», - دەيدى باس پروكۋرور جاقىپ اسانوۆ. باس پروكۋرور اكتيۆتەردى قايتارۋ بويىنشا اقپارات الماسۋ جونىندەگى الەمدىك جەلىلەرمەن جۇمىس ىستەۋگە دايىن ەكەندىكتەرىن ايتتى. «باس پروكۋراتۋرا اكتيۆتەردى قايتارۋ بويىنشا اقپارات الماسۋ جونىندەگى الەمدىك جەلىلەر – ەۋروپادا CARIN جانە ازيادا ARIN-AP جەلىلەرىنە قوسىلۋعا دايىن. بۇكىلالەمدىك بانك پەن بۇۇ-نىڭ «ۇرلانعان اكتيۆتەردى قايتارۋ بويىنشا STAR باستاماسىنا قوسىلۋعا سۇراۋ جىبەرىلدى. جۋىردا STAR-دىڭ العاشقى شولۋ ميسسياسىنىڭ وكىلدەرىمەن كەزدەسۋ وتەدى. ولار بىزگە جوبانى ىسكە اسىرۋعا كومەكتەسەدى», - دەيدى جاقىپ اسانوۆ. باس پروكۋرور جۇمىستىڭ تاعى ءبىر ماڭىزدى باعىتى رەتىندە پاراللەل قارجىلىق تەرگەۋ تۇجىرىمداماسىن ەنگىزۋدى اتادى.   «ءاربىر تەرگەپ-تەكسەرۋ باستالعان ساتتەن ءبىر مەزگىلدە ەكى باعىتتا قارجىلىق قىلمىستى اشۋ جانە زاڭسىز كىرىستەردى قايتارۋ جۇمىستارى جۇرگىزىلۋى ءتيىس. سوندىقتان شەتەلدىك ساراپشىلاردىڭ ۇسىنىسى بويىنشا ۇرلانعان اكتيۆتەردى شەتەلدەن قايتارۋ جانە پاراللەل قارجىلىق تەرگەپ-تەكسەرۋ جونىندەگى ۆەدومستۆوارالىق جۇمىس توبى قۇرىلادى», -دەيدى ول.