ءدال وسىلاي باستالاتىن «ۇستازىم» ءانىن بىلمەيتىن جان جوق شىعار. اۋەزدى ءان – جۇرەكتىڭ قىلىن قوزعاپ, جاستىق داۋرەن, البىرت كەز, وقۋشىلىق شاقتى ەسكە ءتۇسىرىپ, بويىڭداعى سول ءبىر كەزەڭگە دەگەن ساعىنىشىڭدى وياتادى. مەكتەپتى, اياۋلى ۇستازىڭدى ساعىناسىڭ. بالالىق شاقتاعى دوستارىڭدى, سىنىپتاستارىڭدى ىزدەيسىڭ, كوز الدىڭا كينونىڭ لەنتاسىنداي وتكەن ءومىرىڭ زىر ەتىپ وتەدى.
بۇگىندە شاكىرتتەرىن ءبىلىم نارىمەن سۋسىنداتىپ, ءتالىم-تاربيە بەرىپ, ولاردىڭ بويىنا جاقسى قاسيەتتەر دارىتىپ جۇرگەن ۇستازدار قاۋىمى زور قۇرمەتكە لايىق. مۇعالىمدەردىڭ ەڭبەگىن باعالاۋ بارشانىڭ پارىزى. وسى ورايدا مەملەكەت تاراپىنان ۇستازدار قاۋىمىنا جاسالىپ جاتقان قامقورلىقتى تىلگە تيەك ەتىپ كەتكەنىم ءجون. راسى كەرەك, تاۋەلسىزدىك جىلدارىنىڭ ىشىندە ەلىمىزدەگى ءبىلىم سالاسىنىڭ قىزمەتكەرلەرى مەملەكەت تاراپىنان ۇلكەن قولداۋ تاۋىپ, الەۋمەتتىك جاعىنان بار كومەكتەرگە قول جەتكىزدى. ەڭ ءبىرىنشى كەزەكتە جالاقىلارى جىل سايىن ەسەلەپ ءوسىپ, بەدەلى ارتا ءتۇستى. ونان قالدى باسپانا ماسەلەسى دە شەشىمىن تاۋىپ كەلەدى. پرەزيدەنتىمىز نۇرسۇلتان نازارباەۆتىڭ قامقورلىعىنىڭ اياسىندا قازاقستاندا مىڭداعان مەكتەپتەر سالىنىپ, ءۇش اۋىسىمدى ءبىلىم وشاقتارى ازايدى.
ەركە ەسىلدىڭ ەتەگىندەگى ەلوردامىزبەن بىرگە ءبىزدىڭ مەكتەبىمىز كۇن سايىن قاناتىن كەڭگە جايىپ, گۇلدەنىپ كەلەدى. وسىدان تۋرا 11 جىل بۇرىن اشىلعان №51 مەكتەپ-گينازياسى شاكىرتتەرگە ساپالى ءبىلىم, سانالى تاربيە بەرىپ وتىر. ايرانداي ۇيىعان ۇجىمنىڭ ۇرپاق تاربيەسىنە قوسىپ وتىرعان ۇلەسى زور. وسى جىلدار ىشىندە ءبىلىم ورداسىنان مىڭعا جۋىق شاكىرت تۇلەپ ۇشتى. ءبىلىم ساپاسى جاعىنان الدىڭعى ورىندامىز. ءسوزىمنىڭ دالەلى بولسىن بيىل مەكتەبىمىزدەن 4 التىن بەلگى يەگەرى شىقتى. وتكەن ۇبت قورتىندىسى بويىنشا وقۋشىلاردىڭ ورتاشا بالدىق كورسەتكىشى 85 پايىزدى كورسەتتى. حالىقارالىق جانە رەسپۋبليكالىق ءتۇرلى ءبىلىم باسەكەسىندە شاكىرتتەرىمىز جۇلدەلى ورىنداردى الىپ ءجۇر. مىنە, مۇنىڭ ءبارى بىلىكتى ۇستازداردىڭ وقۋشىلارمەن كۇندىز-ءتۇنى جاساعان جۇمىسىنىڭ ناتيجەسى.
ءسوزىمنىڭ سوڭىندا ۇستاز دەگەن ۇلاعاتتى ءسوزدىڭ قادىرىن قاشىرماي, ءوز كاسىبىن سۇيەتىن ارىپتەستەرىمە العىس ايتامىن. ويتكەنى, قازىرگى ءبىلىم بەرۋ جۇيەسىندە شاكىرتتەرمەن ءتىل تابىسىپ, ولارعا سانالى ءتالىم بەرۋ ۇلكەن جۇمىستى قاجەت ەتەدى.
كۇنىمحان دۇيسەنوۆا,
№51 مەكتەپ-گيمنازيا ديرەكتورى
