استانادا سولتۇستىك قازاقستان كۇندەرى باستالادى

سولتۇستىك قازاقستان وبلىسى ەل تاۋەلسىزدىگىنىڭ 25 جىلدىعىنا ماڭىزدى ەكونوميكالىق جەتىستىكتەرمەن جەتتى. وبلىستىڭ استاناداعى كۇندەرىنە وراي ورتالىق كوممۋنيكاتسيالار قىزمەتىندە وتكەن بريفينگتە ايماق اكىمىنىڭ ءبىرىنشى ورىنباسارى ايداربەك ساپاروۆ وسىلاي دەدى. ءباسپاسوز ءماسليحاتىندا ا.ساپاروۆ وبلىستىڭ تىنىس-تىرشىلىگىنە قاتىستى ماڭىزدى مالىمەتتەردى ورتاعا سالدى. ونىڭ ايتۋىنشا, وڭىرلىك جالپى ءونىم كولەمى 25 جىل ىشىندە 13 ەسەگە ارتىپ, 837 ميلليارد تەڭگەگە جەتكەن. – وڭىرلىك جالپى ءونىم جان باسىنا شاققاندا 20 ەسەگە ارتىپ, 1 ميلليون 700 تەڭگەنى قۇرادى. نەگىزگى كاپيتالعا قۇيىلعان ينۆەستيتسيا 34 ەسەگە كوبەيىپ, 2015 جىلى 155 ميلليارد تەڭگەگە جەتتى. وندىرىستىك ءونىم كولەمى 1991 جىلى 7 ميلليون تەڭگە بولسا, بىلتىر 167 ميلليارد تەڭگە بولدى. اۋىل شارۋاشىلىعى كەشەنىندەگى ەڭبەك ونىمدىلىگى جان باسىنا شاققاندا 1 ميلليون 666 مىڭ تەڭگەگە جەتتى. قازىرگى تاڭدا اگرارلىق سەكتوردا الدىڭعى قاتارلى تەحنيكالار قولدانىلادى, شارۋاشىلىققا جاڭا ءتيىمدى تەحنولوگيالار ەنگىزىلۋدە. سونىڭ ارقاسىندا ءونىم كولەمى دە ۇلعايىپ كەلە جاتىر, – دەدى وبلىس اكىمىنىڭ ءبىرىنشى ورىنباسارى. 25 جىلدىڭ ىشىندە وڭىردە شاعىن جانە ورتا بيزنەستىڭ ۇلەسى ەسەلەپ ارتقان. وسى كەزەڭدە 3 300 مىڭ شارشى مەتر تۇرعىن ءۇي پايدالانۋعا بەرىلىپتى. قۇرىلىس جۇمىستارىنىڭ كولەمى توقسانىنشى جىلدارمەن سالىستىرعاندا 40 ەسەگە ۇلعايعان. تاۋەلسىزدىك جىلدارىندا وبلىستىڭ مادەني-رۋحاني تىنىس-تىرشىلىگىنە دە قان جۇگىرىپ, اۋىز تولتىرىپ ايتارلىقتاي جۇمىستار اتقارىلدى. اتاپ ايتار بولساق, رەسپۋبليكالىق ماڭىزى بار 600 تاريحي جانە مادەني ەسكەرتكىش مەملەكەت قورعاۋىنا الىنىپتى. ا.ساپاروۆ ايتپاقشى, «قۇلايىن دەپ تۇرعان كلۋبتار مەن كىتاپحانالارعا, مۋزەيلەرگە» كۇردەلى جوندەۋ جاسالعان. بيىل وبلىس ورتالىعىنداعى قازاق سازدى دراما تەاترىنىڭ ەسكى عيماراتىن بەيىمدەۋ ارقىلى, 500 ورىندىق كورەرمەن زالىنىڭ تۇجىرىمداماسى ازىرلەنىپتى. جاقىن ارادا جوبالىق-سمەتالىق قۇجاتتارى دايىن بولاتىن جوبانىڭ قۇرىلىسى الداعى جىلدىڭ باسىندا باستالۋعا ءتيىس. قالىپتاسقان ءداستۇر بويىنشا, «قۋاتتى ءوڭىر – قۋاتتى قازاقستان» اكتسياسىنىڭ اياسىندا وبلىس دەلەگاتسياسى 22 قازان كۇنى بەيبىتشىلىك جانە كەلىسىم سارايىندا «ماعجان ەلىنەن – ەلوردا تورىنە» اتتى گالا-كونتسەرت وتكىزبەك. سونىمەن قاتار, وسى كۇنى «حان شاتىر» ساۋدا ويىن-ساۋىق ورتالىعىنىڭ الدىنداعى الاڭدا «ءوڭىر بەرەكەسى» اتتى اۋىلشارۋاشىلىق تاۋارلارىنىڭ جارمەڭكەسى اشىلادى. وبلىس اكىمىنىڭ ءبىرىنشى ورىنباسارى ايتىپ وتكەندەي, قىزىلجاردان 700 توننا ازىق-ت ۇلىك تيەگەن كولىكتەر كەرۋەنى قازىر استاناعا جەتىپتى. ەكى كۇنگە سوزىلاتىن جارمەڭكەدە 700 تونناعا تارتا ازىق-ت ۇلىك ساتىلىمعا شىعارىلادى. اتاپ ايتار بولساق, 90 توننا مال ەتى, 10 توننا شۇجىق ونىمدەرى, 24 توننا ءسۇت پەن ءسۇت ونىمدەرى, 450 توننا كوكونىس جانە باسقا دا تاۋارلار سورەگە قويىلماق. جارمەڭكە ءۇشىن قىزىلجار ءوڭىرىنىڭ 100-دەن استام شارۋاشىلىق پەن وڭدەۋشى كاسىپورىندارى ونىمدەرىن جونەلتىپتى. ارنۇر اسقار, «ەگەمەن قازاقستان»