شانحاي ىنتىماقتاستىعى اياسىندا سەمينار ءوتتى

استانادا «شىۇ-عا مۇشە, بايقاۋشى جانە ديالوگى بويىنشا ارىپتەس مەملەكەتتەردىڭ جوعارى مەملەكەتتىك اۋديت (باقىلاۋ) ورگاندارىنىڭ مەملەكەتتىك اۋديتورلاردى سەرتيفيكاتتاۋدى ەنگىزۋ تاجىريبەسى» دەگەن تاقىرىپتا حالىقارالىق سەمينار باس­تالدى. ەسەپ كوميتەتى ۇيىمداستىرعان سەمينار شىۇ-عا مۇشە مەملە­كەت­تەردىڭ جوعارى مەملەكەتتىك اۋديت (باقىلاۋ) ورگاندارىنىڭ ىنتى­ماقتاستىعى شەڭبەرىندە 2016-2017 جىلدارعا ارنالعان ءىس-شارالار جوس­پارىندا كوزدەلگەن. وسى ءىس-شاراعا قاتىسۋ ءۇشىن قا­زاق­ستان استاناسىنا قىتاي, قىر­عىز­­ستان, پاكىستان, رەسەي, تۇركيا­نىڭ جوعارى مەملەكەتتىك اۋديت ور­­گان­­دارىنىڭ (جماو) وكىلدەرى كەلدى. سەميناردىڭ اشىلۋىندا ەسەپ كوميتەتىنىڭ توراعاسى قوزىكورپەش جاڭبىرشين قۇتتىقتاۋ ءسوز ءسوي­لەدى. قازاقستاننىڭ جوعارى مەملە­كەتتىك اۋديت ورگانىنىڭ باسشىسى ءتۇرلى ەلدەردىڭ ماماندارىنا مەم­لەكەتتىك اۋديت سالاسىنداعى ەڭ ماڭىزدى ماسەلەلەر بويىنشا ءتا­جىريبە مەن پىكىرلەر الماسۋعا ءمۇم­­كىندىك بەرەتىن وسىنداي كەزدەسۋ­لەر وتكىزۋدىڭ ماڭىزدى ەكەنىن با­سا ايتىپ ءوتتى. ەسەپ كوميتەتى ءتور­اعا­سىنىڭ ايتۋىنشا, الەمنىڭ تەز وزگە­رىپ وتىرعان جاعدايىندا مامان­دار­دىڭ كاسىبي دەڭگەيىن ارتتىرۋ, اۋ­ديت جۇرگىزۋ ادىستەرىن جەتىلدى­رۋ قازىرگى زامانعى اۋديتور­لىق قوعامداستىق ءۇشىن وتە وزەكتى. قوزىكورپەش جاڭبىرشين ەسەپ كوميتەتى ۇزدىك الەمدىك تاجىريبەنى زەردەلەۋگە جانە پايدالانۋعا, سو­­نىڭ ىشىندە قازىرگى ۋاقىتتا قازاق­ستاندا جۇرگىزىلىپ جاتقان مەم­لە­كەتتىك اۋديتورلاردى سەرتي­في­كات­تاۋ شەڭبەرىندە دە ۇلكەن ءمان بەرە­تىنىن اتاپ ءوتتى. «سەرتيفيكاتتاۋ جونىندەگى ۇلت­تىق كوميسسيا ەكى ايدان استام ۋاقىت جۇمىس جاساۋدا. مەملەكەتتىك اۋديت جانە قارجىلىق باقىلاۋ ورگان­دارىنىڭ 661 قىزمەتكەرىمەن اڭگى­مەلەسۋ وتكىزىلدى. ولاردىڭ باسىم بولىگىنە مەملەكەتتىك اۋديتور ءمار­تەبەسى بەرىلدى. اعىمداعى جىل­دىڭ سوڭىنا دەيىن 800-دەن استام كان­ديداتقا قاتىستى شەشىم قابىل­داناتىن بولادى», – دەپ حابارلادى ول. سەمينار بارىسىندا وعان قاتىسۋشىلار قازاقستان, قىتاي, قىر­­عىزستان, پاكىستان, رەسەي, ءتۇر­كيا­نىڭ جماو-لارىنىڭ مەم­لەكەت­تىك اۋديتورلاردى دايارلاۋ جانە قايتا دايارلاۋ ماسەلەلەرىنە قاتىس­تى ۇلت­تىق كوزقاراستارىمەن تانى­سىپ, اۋديتورلىق ءىس-شارا­لاردى ءجۇر­گىزۋدىڭ تيىمدىلىگى مەن ساپاسىن ارت­تىرۋ ماقساتىندا ولاردى سەرتي­فيكاتتاۋ تەتىگىن جەتىلدىرۋ جول­دارىن تالقىلادى. «ەگەمەن-اقپارات»