اتىراۋدا مەملەكەت جانە قوعام قايراتكەرى, حالىق جازۋشىسى, مەملەكەتتىك سىيلىقتىڭ يەگەرى, ەڭبەك ەرى ءابىش كەكىلباەۆتى ەسكە الۋعا ارنالعان «كەمەل ەلدىڭ كەمەڭگەر قالامگەرى» اتتى ادەبي-ونەر كەشى بولدى. وعان استانا مەن الماتىدان, باتىس قازاقستان مەن ماڭعىستاۋ وبلىستارىنان قاتىسۋعا كەلگەن قوناقتاردىڭ اراسىندا كەمەڭگەر تۇلعانىڭ جارى كلارا جۇماباەۆا, ۇلى داۋلەت پەن قىزى ساۋلەت, مەملەكەت جانە قوعام قايراتكەرلەرى ومىربەك بايگەلدى, كەنجەعالي ساعاديەۆ, زەينوللا الشىمباەۆ, باقتىقوجا ىزمۇحامبەتوۆ, ومىرزاق وزعانباەۆ, ءماجىلىس دەپۋتاتى اباي تاسبولاتوۆ, جازۋشىلار مەن اقىندار قاجىعالي مۇحامبەتقاليەۆ, روللان سەيسەنباەۆ, وتەگەن ورالباەۆ, اقۇشتاپ باقتىگەرەەۆا, مەرەكە قۇلكەنوۆ, «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى, جەلمەن جارىسقان جەلاياق, ارداگەر سپورتشى ءامين تۇياقوۆ, كۇيشى سەرجان شاكراتوۆ, جىرشى-تەرمەشى اماندىق كومەكوۆ, ءانشى تامارا اسار بار.
ەلىمىزدىڭ ءار وڭىرىنەن جايىق جاعاسىنا كەلگەن قوناقتار الدىمەن ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە حالىق جازۋشىسى ءابىش كەكىلباەۆتىڭ ادەبي مۇراسىن عىلىمي زەرتتەۋ ورتالىعىنىڭ اشىلۋىنا قاتىستى. ورتالىقتىڭ لەنتاسىن قالامگەردىڭ جارى كلارا جۇماباەۆا مەن اتىراۋ وبلىسىنىڭ اكىمى نۇرلان نوعاەۆ قيدى.
ورتالىقتا جازۋشىنىڭ ادەبي تۋىندىلارى قويىلعان. بۇدان كەيىن «كەمەل ەلدىڭ كەمەڭگەر قالامگەرى» اتتى ادەبي-كەشىندە ەستەلىك ايتۋشىلار ءابىش كەكىلباەۆتىڭ قالامگەرلىك جانە كەمەڭگەرلىك قىرلارىنا كەڭىنەن توقتالدى. الدىمەن ءسوز العان وبلىس اكىمى ن.نوعاەۆ جازۋشىنىڭ «رۋحتىڭ كۇشتىلىگى – اردىڭ تازالىعى, سەزىمنىڭ شىنايىلىعى» دەگەن ءسوزىن مىسالعا الا وتىرىپ, ەل تاۋەلسىزدىگىنىڭ قالىپتاسۋ كەزەڭىندەگى كوسەمدىك, كەمەڭگەرلىك بولمىسىن تانىتقانىنا توقتالدى.
كەنجەعالي ساعاديەۆتىڭ پىكىرىنشە, ول ۇلت پەرزەنتى رەتىندە قازاق حالقىنىڭ رۋحاني دامۋىنا ايشىقتى قولتاڭباسىن قالدىردى. ال ونەر زەرتتەۋشىسى, كومپوزيتور يليا جاقانوۆ «جازۋشىنىڭ سۋرەتكەرلىك بولمىسى زەرتتەلۋى قاجەت» دەي كەلە شەشەندىك قابىلەتىنە بىرنەشە مىسالدار كەلتىردى.
تانىمال جازۋشىلار قاجىعالي مۇحامبەتقاليەۆ, اقۇشتاپ باقتىگەرەەۆا, مەرەكە قۇلكەنوۆ, مەملەكەت جانە قوعام قايراتكەرلەرى ومىربەك بايگەلدى, باقتىقوجا ىزمۇحامبەتوۆ, زەينوللا الشىمباەۆ كەمەڭگەر قالامگەردىڭ ادامي قاسيەتتەرى تۋرالى تولعانا اڭگىمەلەدى.
«ءابىش – ۇلى سۋرەتكەر, ول الەمدەگى ەڭ تانىمال 100 جازۋشىنىڭ تىزىمىنە ەندى» دەدى جازۋشى روللان سەيسەنباەۆ.
ال «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى جازۋشىنىڭ پۋبليتسيستيكاسىنا توقتالدى.
ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ ستۋدەنتتەرى قالامگەر شىعارمالارىنان ۇزىندىلەر وقىدى. ادەبي-ونەر كەشى بارىسىندا ءان ايتىلدى, كۇي تارتىلدى.سونىمەن بىرگە, ءابىش كەكىلباەۆ اتىنداعى شاكىرتاقى العاشقى يەگەرىنە تاپسىرىلدى.
جولداسبەك شوپەعۇل, اتىراۋ
