حالىقارالىق ۆاليۋتا قورى قازاقستان ەكونوميكاسىنا باعا بەردى

حالىقارالىق ۆاليۋتا قورىنىڭ بولجاۋىنشا, 2020 جىلعا دەيىن الەمدىك مۇنايدىڭ ءبىر باررەلى 56 اقش دوللارىنا جەتۋى مۇمكىن. ال كەلەسى جىلى 51 دوللار بولادى. بۇل بولجامدى حالىقارالىق ۆاليۋتا قورىنىڭ ورتالىق ازيا جانە تاياۋ شىعىس ەلدەرى دەپارتامەنتى ديرەكتورىنىڭ ورىنباسارى يۋحا كياحكونەن "حابار" تىلشىلەرىنە بەرگەن سۇحباتىندا ايتتى. شەتەلدىك ساراپشى: «ۇلتتىق بانكتىڭ ايىرباس باعامىنا قاتىستى ۇستانعان ساياساتى دۇرىس»,– دەيدى. بۇل شەشىم تەڭگەنىڭ باسەكەگە قابىلەتتى ەكەنىن كورسەتەدى.  سونىمەن بىرگە «نۇرلى جول» جانە «100 ناقتى قادام» باعدارلامالارى دەر كەزىندە قابىلدانىپ, ناتيجە بەرۋدە. «باعدارلاما جۇكتەگەن مىندەتتەردى ىسكە اسىرۋ ارقىلى الداعى ۋاقىتتا قارجى جۇيەسى دە نىعايادى. سونداي-اق قاشاعان كەن ورنىن يگەرۋ ەكونوميكانىڭ جاقسارۋىنا ىقپال ەتەدى»,– دەدى حالىقارالىق ۆاليۋتا قورىنىڭ وكىلى. يۋحا كياحكونەن, حالىقارالىق ۆاليۋتا قورىنىڭ تاياۋ شىعىس جانە ورتالىق ازيا ەلدەرى دەپارتامەنتى ديرەكتورىنىڭ ورىنباسارى: - قازىرگى مۇنايدىڭ  باعاسى كوڭىل كونشىتپەي وتىر. بۇل ءۇردىس الداعى ەكى جىلعا سوزىلۋى ىقتيمال. مەن مۇناي باعاسى بويىنشا بيۋدجەتتى ەسەپتەۋدەگى كۇردەلى ماسەلەنى كورىپ تۇرعان جوقپىن. باعانىڭ  وسۋىنە وراي بيۋدجەت كولەمىنىڭ  ۇلعايعانى جاقسى, ارينە. بىراق بۇل ماسەلەدە بيۋدجەتتى ناقتى ءارى شىنايى جوسپارلاۋ ماڭىزدى.