گولوۆكين دجەيكوبسپەن جەكپە-جەك وتكىزۋدەن باس تارتتى

WBA (Super), IBO, WBC جانە IBF نۇسقالارى بويىنشا ورتا سالماقتاعى الەم چەمپيونى قازاقستاندىق گەننادي گولوۆكين 10 جەلتوقساندا دجەيكوبسپەن ءوتۋى ءتيىس كەزدەسۋدەن رەسمي تۇردە باس تارتتى, - دەپ حابارلايدى Boxing News 24. ايتا كەتەيىك, وسىعان دەيىن قازاقستاندىق بوكسشى ورتا سالماقتاعى الەم چەمپيونى امەريكالىق دەنيەل دجەيكوبسپەن جەكپە-جەك وتكىزۋدى جوسپارلاعان بولاتىن. باسىلىمنىڭ مالىمەتىنشە, گولوۆكين مەن دجەيكوبستىڭ كوماندالارى سوڭعى اپتا ىشىندە "ساۋدالاسىپ", سوڭىندا كەلىسىمگە كەلە الماعان. وسىعان بايلانىستى قازاقستاندىق گولوۆكينگە كەزدەسۋدەن باس تارتۋعا تۋرا كەلگەن. ەندى ەكى بوكسشىنىڭ جەكپە-جەگى 2017 جىلعا قالدىرىلىپ, اقپان نەمەسە ناۋرىز ايىندا ءوتۋى مۇمكىن. ايتا كەتەيىك, وسىعان دەيىن دجەيكوبستىڭ باپكەرى اندرە روزە دە بيىل سپورتشىسىنىڭ گولوۆكينمەن جەكپە-جەك وتكىزبەيتىنى جايلى مالىمەتتى راستادى. باپكەر دايىندالۋعا از ۋاقىت قالدى دەگەن سەبەپپەن كەزدەسۋدىڭ بولمايتىنىن ايتتى. ونىڭ ايتۋىنشا, دجەيكوبس ءالى دايىندالماعان دا. ەگەر دە جەكپە-جەك 10 جەلتوقساندا وتسە, دايىندالۋعا التى اپتا ۋاقىت قانا قالادى. امەريكالىق بوكسىشىنىڭ باپكەرى دجەيكوبستىڭ مۇنداي كەزدەسۋگە كەم دەگەندە 10-12 اپتا دايىندالعانىنىن قالايدى ەكەن.