اتىراۋ وبلىسىندا ءىرى قارا مالدىڭ قىرىلۋى توقتادى

اتىراۋ وبلىسىندا جەكدۋاداقتان مالدىڭ قىرىلۋى توقتادى. بۇل تۋرالى بۇگىن جۋرناليستەرگە ارنالعان بريفينگ بارىسىندا قر اۋىل شارۋاشىلىعى مينيسترلىگى ۆەتەرينارلىق باقىلاۋ مەن قاداعالاۋ كوميتەتى بيولوگيالىق قاۋىپسىزدىك باسقارماسىنىڭ جەتەكشىسى سالتانات ابىلقاسىموۆا ءمالىم ەتتى, دەپ حابارلايدى قازاقپارات. «قازىر اتىراۋ وبلىسىندا جەكدۋاداق اۋرۋىنا بايلانىستى ۋشىققان جاعداي تۇراقتاندى دەۋگە بولادى. وزدەرىڭىز بىلەسىزدەر, شىلدە ايىندا ءوڭىر بويىنشا وسى اۋرۋ تاراپ كەتكەن بولاتىن. بۇرىن قازاقستاندا بۇل اۋرۋ تىركەلمەگەن. ءىرى قارا مالداردىڭ اناليزدەرى رەسەي فەدەراتسياسىنىڭ ۆلاديمير قالاسىندا ورنالاسقان بۇكىلرەسەيلىك عىلىمي-زەرتتەۋ ينستيتۋتىنا جىبەرىلگەن ەدى. ساراپتامانىڭ قورىتىندىسىنا سۇيەنسەك, مالدار نودۋليارلىق دەرماتيت اۋرۋىنا شالدىققان»,-دەدى س.ابىلقاسىموۆا. اۋىل شارۋاشىلىعى مينيسترلىگىنىڭ ءباسپاسوز قىزمەتى بەرگەن اقپاراتقا سۇيەنسەك, بۇل اۋرۋ قازاقستاندا بۇرىن مۇلدە كەزدەسپەگەن. ال, اتىراۋ وبلىسىنا رەسەيدەن كەلگەن ەكەن. س.ابىلقاسىموۆانىڭ ايتۋىنشا, زەرتتەۋ ناتيجەسى بەلگىلى بولعان سوڭ, وبلىس اكىمى ماحامبەت قۇرمانعازى جانە يساتاي اۋداندارىندا كارانتين جاريالاعان. «قازىر وسى اۋدانداردا ينفەكتسياعا قارسى شارالار ءجۇرىپ جاتىر. مالدىڭ قىرىلۋى توقتادى. وبلىستاعى قالعان مالداردى ەگىپ, ەمدەۋ ءۇشىن جەرگىلىكتى بيۋدجەتتەن 4,5 ملن تەڭگە ءبولىندى»,-دەدى س.ابىلقاسىموۆا. بۇرىن حابارلاعانىمىزداي, اتىراۋ وبلىسىندا نودۋليارلى دەرماتيت جۇقتىرعان 700 سيىر قىرىلعان. 27 شىلدەدەن باستاپ وڭىردە كارانتين جاريالانعانگ ەدى. قازىر مال دارىگەرلەرى وسى اۋرۋدىڭ بەلگىلەرى بايقالعان مالداردى ەمدەپ جاتىر.