مەملەكەتتىك سىيلىق جونىندەگى كوميسسيانىڭ قورىتىندى وتىرىسى ءوتتى

استانادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن قازاقستان رەسپۋبليكاسىنىڭ ادەبيەت پەن ونەر سالاسىنداعى 2016 جىلعى مەملەكەتتىك سىيلىعىن تاعايىنداۋ جونىندەگى كوميسسيانىڭ قورىتىندى وتىرىسى ءوتتى. قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعى ادەبيەت پەن ونەر قايراتكەرلەرىنىڭ قوعام مەن مەملەكەت الدىنداعى ەڭبەگىن جوعارى تانۋ بولىپ تابىلادى. مەملەكەتتىك سىيلىق قازاقستان رەسپۋبليكاسىنىڭ ازاماتتارىنا وتاندىق مادەنيەتتى دامىتۋعا ەرەكشە باعالى ۇلەس دەپ تانىلعان ادەبيەت پەن ونەر سالاسىنداعى اسا ۇزدىك شىعارمالارى ءۇشىن بەرىلەدى. وتاندىق شىعارماشىل زيالى قاۋىمنان قۇرىلعان كوميسسيا مۇشەلەرى ىرىكتەلىپ الىنعان شىعارمالاردىڭ ءۇش ايلىق مەرزىمدەگى تالقىلانۋ بارىسى جونىندەگى مادەنيەت جانە سپورت ءمينيسترى ا.مۇحامەدي ۇلىنىڭ اقپاراتىن تىڭداپ, ەركىن پىكىر الماستى. كوميسسيا جاسىرىن داۋىس بەرۋ ارقىلى ەلباسىنىڭ قاراۋىنا ۇسىنىلاتىن 2016 جىلعى قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعى لاۋرەاتتىعىنا ۇمىتكەرلەردى انىقتادى. ءداستۇر بويىنشا مەملەكەتتىك سىيلىق لاۋرەاتتارىن ماراپاتتاۋ تاۋەلسىزدىك كۇنى قارساڭىندا وتەدى.