استانادا راقىمجان قوشقارباەۆقا ەسكەرتكىش قويىلدى

بۇگىن استانادا راقىمجان قوشقارباەۆقا ارنالعان ەسكەرتكىشتىڭ رەسمي اشىلۋى ءوتتى. 1945 جىلى قازاق جاۋىنگەرى رەسەيلىك گريگوري بۋلاتوۆپەن بىرگە قىزىل اسكەر قۇرامىندا ءبىرىنشى بولىپ رەيحستاگقا جەڭىس تۋىن تىككەن. 11 مەترلىك مونۋمەنت ب.مومىش ۇلى مەن ر. قوشقارباەۆ داڭعىلدارىنىڭ قيىلىسىندا ورنالاسقان, دەپ حابارلادى استانا قالاسىنىڭ مادەنيەت, مۇراعاتتار جانە قۇجاتتاما باسقارماسىنان. جوباعا سايكەس, مۇسىندىك كومپوزيتسيانىڭ بيىكتىگى - 6 مەتر, ال گرانيت تۇعىردىڭ بيىكتىگى - 4,5 مەتر. ەسكەرتكىشتىڭ اۆتورى - «قازاق ەلى» مونۋمەنتىن جاساۋعا قاتىسقان بەلگىلى ءمۇسىنشى اسقار نارتوۆ. سالتاناتتى شارا بارىسىندا استانا قالاسى اكىمىنىڭ ورىنباسارى ەرمەك امانشاەۆ قالا تۇرعىندارىن ەسكەرتكىشتىڭ اشىلۋىمەن قۇتتىقتادى. «بۇگىن قازاق جاۋىنگەرى راقىمجان قوشقارباەۆتىڭ ەرلىگىن ماڭگىلىك ەتۋ ءۇشىن وسى مونۋمەنتتى اشىپ وتىرمىز. ونىڭ ەسىمى وسكەلەڭ ۇرپاقتىڭ جادىندا ەرلىكتىڭ سيمۆولى رەتىندە ساقتالۋى كەرەك, سول سەبەپتى قازاقستان تاۋەلسىزدىگىنىڭ 25 جىلدىعى قارساڭىندا ەلوردادا اتى اڭىزعا اينالعان ناعىز جاۋىنگەرىمىزگە ارناپ ەسكەرتكىش ورناتىلدى», - دەدى ەرمەك امانشاەۆ. سالتاناتتى شاراعا راقىمجان قوشقارباەۆتىڭ قىزى - ءاليا, اتى اڭىزعا اينالعان كەڭەس جاۋىنگەرىنىڭ نەمەرەلەرى, سونداي-اق, لەيتەنانت قوشقارباەۆ تۋرالى كىتاپتىڭ اۆتورى قاسىم اپپاس ۇلى قاتىستى. سونىمەن قاتار, ەسكەرتكىشتىڭ اشىلۋىنا قاتىسقان جۇزدەگەن ادام ۇلى قازاق جاۋىنگەرىنىڭ مۇسىنىنە گۇل شوقتارىن قويدى. مونۋمەنتتى ورناتۋعا ەلوردا اكىمدىگى باستاماشى بولدى, ەسكەرتكىشتى دايىنداعان جانە ورناتقان «BI-Group». راقىمجان قوشقارباەۆقا ارنالعان ەسكەرتكىشتىڭ اشىلۋى ماڭىزدى وقيعا, ويتكەنى ول قازاق جاۋىنگەرىنىڭ ەكىنشى ۇلى وتان سوعىسىندا جاساعان ولشەۋسىز ەرلىگى تۋرالى تاعى دا ءبىر ەسكە سالادى. كوپ جىلدار بويى كەڭەستىك تاريحشىلار ونىڭ ەرلىگىن مويىنداماي كەلگەنىن ايتا كەتۋ كەرەك. 2007 جىلى عانا رەسەيلىكتەر ەكىنشى دۇنيەجۇزىلىك سوعىستا بەرليندە رەيحستاگتى باسىپ الۋ كەزىندە راقىمجان قوشقارباەۆ پەن گريگوري بۋلاتوۆتىڭ ءبىرىنشى بولىپ تۋ تىككەندەرىن رەسمي تۇردە ءمالىم ەتتى. وسى ەرلىكتى جاساعان كەزدە قوشقارباەۆ نەبارى 21 جاستا بولعان. باتىرلىعىنا قاراماستان كەڭەس اسكەرى قازاق جاۋىنگەرىن ەشقانداي ماراپاتقا ۇسىنعان جوق. الايدا 2001 جىلى قازاقستان رەسپۋبليكاسى پرەزيدەنتىنىڭ جارلىعىمەن راقىمجان قوشقارباەۆقا قايتىس بولعاننان كەيىن «حالىق قاھارمانى» اتاعى بەرىلدى.