قاراعاندى وبلىسىندا 15 تۇرعىن قۇلاعالى تۇرعان ۇيدەن كوشپەي وتىر

قاراعاندى وبلىسىنداعى شەت اۋدانىنا قاراستى اقجال اۋىلىنداعى كوپقاباتتى ۇيلەردىڭ ءبىرى قۇلاعالى تۇر. قازىرگى ۋاقىتتا مۇندا تۇرىپ جاتقان 303 ادام باسقا جاققا كوشىرىلگەن. «ساقتىقتا قورلىق جوق» دەگەن, ءۇيدىڭ اينالاسى قورشالىپ, كۇزەت تە قويىلىپتى. اقاۋى بار بۇل ءۇي 1980 جىلى سالىنعان ەكەن. بيىلعى  جىلدىڭ 6 قىركۇيەگىندە شەت اۋدانى اكىمىنىڭ قاۋلىسىمەن ۆەدومستۆوارالىق كوميسسيا قۇرىلىپ, ءۇيدىڭ اپاتتى جاعدايدا تۇرعانى انىقتالىپتى. ال ءبىر اپتادان كەيىن ۇيگە قاتىستى توتەنشە جاعداي جاريالانعان. سول كۇننەن باستاپ اۋدان اكىمشىلىگى تۇرعىندار اراسىندا تۇسىنىك جۇمىستارىن جۇرگىزىپ, اقاۋلى ۇيدەگى 69 پاتەردىڭ 288 تۇرعىنىن باسقا جاققا كوشىرگەن. ولاردىڭ ءبىر بولىگى (15 وتباسى) بۇرىنعى دارىگەرلىك امبۋلاتورياعا قونىستاندىرىلىپتى. اپاتتىڭ الدىن الۋ ءۇشىن ءۇيدىڭ قابىرعالارىنداعى جارىقشاقتاردى بەكىتىپ, جەرتولەسىن سۋدان تازارتىپ, قۇرعاتۋ كەرەك. سونداي-اق شاتىر دا توزىپ كەتكەن: كۇردەلى جوندەۋ جۇرگىزۋدى قاجەت ەتەدى. باسقا دا مايدا-شۇيدە جۇمىستارى جەتەرلىك. وكىنىشكە قاراي, ءۇيدىڭ قۇلاعالى تۇرعانى تۋرالى ەسكەرتۋلەردى ەلەمەگەن ءتورت پاتەردىڭ 15-كە تارتا تۇرعىنى مەكەندەرىن  بوساتقىلارى كەلمەي وتىر. بۇگىنگى كۇندە بۇل ادامدارعا ۋاقىتشا باسپانا بەرۋ ماسەلەسى تالقىلانۋ ۇستىندە. جەرگىلىكتى بيلىك وكىلدەرى اپاتتى جاعدايدا تۇرعان ءۇيدى ءالى  سۋ مەن جىلۋدان اجىراتقان جوق. قاراعاندى وبلىسىنىڭ باسشىلىعى قازىرگى ۋاقىتتا اقجالداعى اپاتتى ءۇيدى قالپىنا كەلتىرۋدىڭ جولدارىن قاراستىرۋدا. ال سمەتالىق قۇجاتتارعا سايكەس, جوندەۋ جۇمىستارىنا از دا ەمەس, كوپ تە ەمەس, شامامەن 100 ميلليون تەڭگە قاراجات قاجەت ەكەن.   قايرات ءابىلدينوۆ, قاراعاندى وبلىسى,