اقمولا وبلىسىندا اداسىپ قالعان اۆستراليالىق ساياحاتشى قۇتقارىلدى

22 جاستاعى اۆستراليالىق ۆيلليام تيموتي بيورننىڭ موتوتسيكلى اقمولا وبلىسىنىڭ جايلاۋىندا سىنىپ قالدى. جاڭبىر جاۋىپ, ساياحاتشى سۋىق سالدارىنان باقيلىق بولا جازدادى, دەپ حابارلايدى «ەگەمەن-اقپارات» قازاقپاراتقا سىلتەمە جاساپ. قر ءىىم توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆ حابارلاعانداي, 2016 جىلى 17 قازاندا 12 ساعات 38 مينۋتتا جاقسى اۋدانى جاقسى اۋىلىنىڭ  №13 ءورت ءسوندىرۋ بولىمىنە بەلگىسىز ازامات  نوۆوكيەنكا اۋىلىنىڭ جانىندا شەتەل ازاماتىنىڭ  موتوتسيكلى سىنىپ, وعان كومەك كەرەك ەكەنىن حابارلاعان. وقيعا ورنىنا توتەنشە جاعدايلار بويىنشا اۋداندىق ءبولىم مەن ءورت ءسوندىرۋ ءبولىمىنىڭ قىزمەتكەرلەرى شىقتى. «وقيعا ورنىنا جەتكەندە موتوتسيكل تابىلدى. ونىڭ يەسى 1994 جىلى تۋعان اۆستراليا ازاماتى (ساياحاتشى) ۆيلليام تيموتي بيورن. ول استاناعا بارا جاتقان, الايدا اۋا رايىنىڭ قولايسىزدىعىنا بايلانىستى اداسىپ, موتوتسيكلى سىنعان», - دەلىنگەن حابارلامادا. «لۋچ» شارۋا قوجالىعىنىڭ باسشىسى دىچوك بيورن مەن ونىڭ موتوتسيكلىن جاقسى اۋىلىنىڭ  №13 ءورت ءسوندىرۋ بولىمىنە جەتكىزدى. ۆيلليام تيموتي بيورندى تاماقتاندىرىپ, كيىندىرىپ, بولىمدە تۇنەپ شىعۋعا قالدىردى. سونىمەن قاتار №13 ءورت ءسوندىرۋ ءبولىمىنىڭ جۇرگىزۋشىلەرى شەتەلدىكتىڭ موتوتسيكلىن جوندەدى. 18 قازاندا ساياحاتشى استاناعا ساپارىن جالعاستىردى.