بالامىزدى قۇشاقتاپ, باۋىرىمىزعا باسايىق

اقش الەۋمەتتانۋشىسى ءارى وتباسىلىق پسيحوتەراپەۆت ۆيردجينيا ساتير ءوزىنىڭ ۇزاق جىلدىق زەرتتەۋلەرىنە سۇيەنىپ, بالانى كۇنىنە ونشاقتى رەت قۇشاقتاۋعا كەڭەس بەرەدى. ونىڭ ەسەبىنشە, تاۋلىگىنە ءتورت رەت قۇشاقتاۋ بالانىڭ تەك تىرشىلىك ەتۋىنە قاجەتتى سەزىمدەرىن وياتۋعا عانا جەتەدى ەكەن. ال بالاقايدىڭ كوڭىل كۇيى كوتەرىڭكى بولىپ, ءوزىن جاقسى سەزىنۋى ءۇشىن سەگىز رەت قۇشاقتاۋ كەرەك. ساتير ءوز ەكسپەريمەنتىن بىلاي دەپ تۇيىندەپتى: «بالانىڭ وي-ءورىسى دامىپ, وزىنە سەنىمدى بولسىن دەسەڭىز, ون ەكى رەت قۇشاقتاڭىز!» جالپى, ءبىزدىڭ بۇل تاقىرىپقا قالام تارتۋىمىزعا تالدىقورعان قالاسىنداعى №18 مەكتەپ-ليتسەيىنىڭ باستاۋىش سىنىپ مۇعالىمى مەرۋەرت بۋراتاەۆامەن بولعان پىكىر الماسۋ تۇرتكى بولىپ ەدى. مەرۋەرت مۇعالىم ايتادى: «جاس ۇستاز رەتىندە ءبىلىم مەن ءتار­بيە بەرۋ ىسىندە بالا مەن اتا-انا قارىم-قاتى­نا­سىنىڭ ماڭىزى زور دەپ ويلايمىن. نەگى­زىن­دە, بالانىڭ تاربيە الۋىنا اسەر ەتەتىن فاك­تور­لار: قوعام, وتباسى, مەكتەپ بولىپ تابى­­لا­تىنى بەلگىلى. سوندىقتان دا ءوز ءتاجى­ري­بەمدە وقۋشىنىڭ ساباققا ىنتاسى مەن ءتار­تى­بىنە, اينالاسىنا دەگەن كوزقاراسىنا ەڭ ءبىرىن­شى ىقپال ەتۋشى كۇش رەتىندە اتا-انامەن جۇمىستى جولعا قويۋدى ماقسات ەتەمىن. جاقىندا ءوزىم وقىتاتىن 3 «ۆ» سىنىبىنداعى وقۋشىلاردىڭ اتا-انالارىمەن بولعان كەزەكتى جينالىستا وتباسىلىق ءومىر زاڭدارى تۋرالى اشىق پىكىرلەسۋ بولعان ەدى, پىكىر الماسۋ ار­قىلى وتباسىنىڭ ءوزارا قارىم-قاتىناس ەرە­جە­لەرىن, ءومىر ءسۇرۋ زاڭدارىن انىقتاۋعا قادام جاسادىق. وسى ماقساتتا وقۋشىلارعا ساۋال­ناما تاراتىپ, بالالاردىڭ وتباسىنداعى ور­نىن, اكە مەن اناسىنا دەگەن قارىم-قاتىناسىن باع­دارلاپ الۋدى ويلادىم…» دەيدى. ۇستازدىڭ وقۋشىلارىنا تاراتقان ساۋال­ناماسىندا «سەنى اتا-اناڭ كۇنىنە نەشە رەت قۇشاقتايدى؟» دەگەن سۇراق بولىپتى. نەگىزگى ايتپاعىمىزدى وسى ساۋال مەن وعان بەرىلگەن جاۋاپتاردان تاراتساق. «بالالى ءۇيدىڭ ۇرلىعى جاتپايدى…» دەگەندەي, بارلىق ساۋالدارعا شىنايى جاۋاپ بەرىلگەن ەكەن. تالداۋ ناتيجەسى بويىنشا وقۋشى­لار­دىڭ جاۋاپ جازۋعا قينالعان سۇراعى – جوعارىدا كەلتىرىلگەن «سەنى اتا-اناڭ كۇنىنە نەشە رەت قۇشاقتايدى؟» دەگەن سۇراق بولىپتى. سىنىپتاعى وقۋشىلار­دىڭ كوپ­شىلىگى ءوز اتا-انالارىنىڭ كۇنىنە 2-3 رەت­تەن عانا قۇشاقتاپ, جاقسى كورۋ سەزىمىن ءبىل­دىرەتىنىن ايتسا, ءبىر بولىگى اتا-انا تارا­پى­نان مۇنداي قيمىلدىڭ سوڭعى رەت قاشان بول­عانىن ەستەرىنە تۇسىرە الماعان. كەيبىرى انا­سى­نىڭ ۇيقىدا جاتقاندا قۇشاق­تاپ, ەمىرە­نەتى­نىن, ويتكەنى باسقا ۋاقىتتا قولى تيمەي­تىنىن ايتىپ, اقتالعان ءتۇر تانىتقان ەكەن… وسى ءبىر عانا ساۋالعا بەرىلگەن ءتۇرلى جاۋاپتاردان شىعاتىن الدىن الا قورى­تىن­دى بويىنشا اتا-انا تاراپىنان بالاعا دەگەن لايىقتى مەيىرىمنىڭ ازايىپ بارا جاتقاندىعىن بايقاۋعا بولادى. ارينە, بارلىق اتا-اناعا قاتىستى كەسىمدى شەشىم شىعارۋعا اسىقپالىق, بىراق, 6-7 جاس ارا­لىعىندا ءجاسوسپىرىم بالانىڭ ناعىز قالى­پ­تاسۋ كەزەڭىندە بولاتىنىن ەسكەرسەك, جالپى دابىل قاعۋعا تۇرارلىق سەبەپ تابى­لادى دەپ ويلايمىز. ماناعى مەرۋەرت مۇعالىمنىڭ ءتاجىري­بەسىنە قايتا ورالايىق, ۇستاز ءوز ساۋالنا­ماسىنىڭ ناتيجەسىنە قاراپ, وقۋشىلارعا اتا-انا تاراپىنان لايىقتى كوڭىل ءبولۋدىڭ جەتكىلىكتى دەڭگەيدە ەمەستىگىن ايتادى. بۇل ءوز كەزەگىندە وقۋشىنىڭ ۇلگەرىمى مەن دامۋىنا كەرى ىقپال ەتەدى. ناعىز ايالى الاقان, مەيىرلى قۇشاق قۋاتىن قاجەت ەتەتىن ءجاسوسپىرىم وزىنە دەگەن ىنتانىڭ ازايعاندىعىن نەمەسە جوقتىعىن سەزىنسە, داعدارىسقا ۇشىرايدى دەپ پايىمدايدى ۇستاز. بۇل تەك بالانىڭ ساباققا دەگەن ىنتاسىنا ىقپال ەتىپ قويماي, دۇنيەتانىمىنا دا تەرىس اسەر ەتۋى مۇمكىن. مەيىرىمگە مەيلىنشە قانباعان بالادا سۋيتسيدالدى سيندروم پايدا بولاتىنىن بالالار پسيحولوگتارى ءجيى ەسكەرتەدى. دەمەك, بالاڭىزدى باسى ارتىق قۇشاقتاپ, ءبىر مەزگىل انالىق, اكەلىك ماحابباتقا بولەۋ بولۋى ىقتيمال ۇلكەن قاسىرەتتىڭ جولىن كەسەتىن شىعار. ايتپاقشى, مۇعالىمنىڭ وسى ەسپەريمەن­تىندەگى تاعى ءبىر ساۋالعا توقتالا كەتەيىك: «اناڭنىڭ سۇيىكتى سەريالى قانداي؟» دەگەن ساۋالعا وقۋشىلاردىڭ بارلىعى ءفيلمنىڭ اتاۋىن عانا ەمەس, ونداعى كەيىپكەرلەردىڭ اتى-ءجونى مەن وقيعانىڭ وربۋىنە دەيىن سيپاتتاپ جاۋاپ بەرۋگە تىرىسىپتى. ويلاناتىن جايت پا؟ ءتىپتى, قاۋىپتەنەتىن قۇبىلىس سياقتى عوي! بالامىزدى قۇشاقتاپ, باۋىرىمىزعا باسۋدى ۇمىتپالىقشى… قالماحانبەت مۇقامەتقالي, «ەگەمەن قازاقستان» الماتى