دەنساۋلىقتىڭ «سىرقاتىن» ءدوپ باسقان

ەلىمىزدىڭ باس باسىلىمى – «ەگەمەن قازاقستان» گازەتى قاراپايىم حالىقتىڭ كوكەيكەستى مۇددەلەرىن قوزعاعان وتكىر تاقىرىپتارعا قالام تارتا باستادى. وعان گازەتتىڭ بيىلعى 11 تامىز كۇنگى سانىندا جارىق كورگەن جۋرناليست جىلقىباي جاعىپار ۇلىنىڭ «دەۆياتكودان دۇيسەنوۆاعا دەيىن» دەگەن ماقالاسى تولىق دالەل بولا الادى. ماقالا بۇگىندە دارىگەرگە سەنىمىن جوعالتا باستاعان حالىقتىڭ اششى مۇڭىن اشىق كورسەتىپتى. («ەگەمەن قازاقستان», №153. 11 تامىز, 2016 جىل) اۆتور جىلقىباي جاعىپار ۇلى دەنساۋلىق ساقتاۋ سالاسىنىڭ «سىرقاتتارىن» ءدوپ باسقان. مىندەتتى الەۋمەتتىك مەديتسينانى ساقتاندىرۋعا قاتىستى ونىڭ «قولدا بار بىلىكتى كادرلار مەن مەملەكەت قارجىسىنا الىنعان قىمبات زاماناۋي قوندىرعىلارعا يەلىك جۇرگىزە باستاعان دەنساۋلىق ساقتاۋ سالاسىنىڭ جاڭا بايشىكەشتەرى ادىلەتتى جۇيەنىڭ تامىر جايۋىنا كەدەرگى كەلتىرىپ باعاتىنى انىق» دەگەنىنىڭ ءوزى-اق تۇسىنگەن جانعا تالاي نارسەنى مەڭزەپ تۇر. مۇنى جۋرناليست ءوز باسىنان وتكىزگەن ماشاقاتپەن دالەلدەگەن. جەكەمەنشىك مەديتسينا­لىق ورتالىقتاردىڭ بىرەۋىنەن باستاپ, ءارى قاراي باسىنان وتكەرگەن سەرگەلدەڭ جايىندا وقىپ وتىرىپ, جاعاڭدى ۇستاماسقا امال قايسى؟ الدىنا كەلۋشىلەردەن ەڭ الدىمەن تەك اقشا دامەتكەن دارىگەرلەرمەن ءبىزدىڭ ەلىمىز الىسقا بارمايدى. وسى بىزدە مەديتسينالىق مەكەمەلەر دەنساۋلىقتى ساقتاۋشى ما, الدە دەنساۋلىقتى قورلاۋشى ما؟ كابينەتتەن كابينەتكە بارعان سايىن قالتاسىن قاققان ەمدەلۋشىدە نە كۇي قالسىن؟ ياعني, ول «مىناعان اقشام جەتە مە؟» دەگەن ۋايىمنىڭ وزىنەن-اق شارشاپ كەتپەي مە؟ كولەمدى ماقالادان تۇيگەن ويىمىز وسى. دەمەك, ادام دەنساۋلىعىن ساۋداعا سالعان جەكەمەنشىك مەديتسينالىق مەكەمەلەر تولىق تەكسەرىلۋگە ءتيىستى. دۇرىسىنىڭ دۇرىس ەكەنى ايتىلىپ, بۇرىسى بۇرىس ەكەنى جالعاننىڭ جارىعىنا شىعۋى قاجەت. ال «بۇرىس» دەگەنىڭە شاش جەتپەيتىنىن ايتىپ جاتۋ ارتىق شىعار. پروكۋراتۋرا ورگاندارى وزدەرىن وسىندايدا كورسەتپەگەندە, باسقا قاشان دەپ ويلايمىن. زاڭ ساقشىلارىن مىنا ماقالا بەيجاي قالدىرماۋى كەرەك. كوكەيكەستى ماقالادا ايتىلعان كەلەڭسىز كەمشىلىكتەر قاعاز جۇزىندە قالماۋى كەرەك. ءتيىستى ورگاندار جانە دەنساۋلىق ساقتاۋ جانە الەۋ­مەتتىك دامۋ مينيسترلىگى ماقالادا كەلتىرىل­گەن ماسەلەلەرگە بايلانىستى گازەت ارقىلى حالىق­قا ناقتى جاۋاپ بەرۋگە ءتيىس. سوندىقتان قولى­ما قالام الىپ, ماقالاعا ءۇن قوسۋدى پارىز سانادىم. بولات قوسجان ۇلى, «ەگەمەن قازاقستاننىڭ» بايىرعى وقىرمانى باتىس قازاقستان وبلىسى, اقجايىق اۋدانى, چاپاەۆ اۋىلى