باس پروكۋرور ۇلەسكەرلىك ماسەلەسىندە جارناماعا سەنبەۋگە شاقىردى

كەز-كەلگەن جارناماعا, اۋىزشا بەرگەن ۋادەگە سەنىپ, «ءۇي سالاتىن جەرى بار ەكەن عوي» دەپ اقشالارىڭىزدى كىم بولسا سوعان بەرمەڭىزدەر. بۇگىن قازاقستان حالقىنا ۇندەۋ جاساعان ەلىمىزدىڭ باس پروكۋرورى جاقىپ اسانوۆ وسىلاي مالىمدەدى, دەپ حابارلايدى egemen.kz «تۇرعىن ءۇي ومىردەگى ەڭ باستى قاجەتتىلىكتىڭ ءبىرى. حالقىمىز «ءۇيى جوقتىڭ كۇيى جوق» دەپ بەكەر ايتپايدى. ونى قول جەتىمدى ەتۋ ءۇشىن ەلىمىزدە ارنايى باعدارلامالار ىسكە اسۋدا. 25 جىلدا ميلليوننان استام وتباسى باسپانالى بولدى. بىراق, وسى ماسەلەنىڭ باسقا دا جاعى بار. كەيبىر قۇرىلىس كومپانيالارى ارزان باعامەن قىزىقتىرىپ, كۇماندى شارتتار ۇسىنىپ, كوپ ادامدى الداپ كەتتى. ازاماتتار جىلداپ جيناعان اقشاسىنان ايىرىلىپ, ارمانداعان پاتەرىن الا الماي قالعان. 3 كۇن بۇرىن, 10 قازاندا جاڭا زاڭ قولدانىسقا ەندى. ەندى قۇرىلىس كومپانيالارى ۇلەسكەرلەردىڭ اقشاسىن تەك ەكى جاعدايدا - ارنايى قور كومپانياعا كەپىلدىك بەرسە نەمەسە اكىمدىكتىڭ رۇقسات قاعازى بولسا عانا تارتا الادى», - دەدى باس پروكۋرور. وسى رەتتە جاقىپ اسانوۆ حالىققا اكىمدىك رۇقساتتى قانداي جاعدايدا بەرىلەتىندىگىن دە تولىق ءتۇسىندىرىپ بەردى. «قۇرىلىس بىتەدى دەپ بانك كەپىلدىك بەرسە نەمەسە ءۇيدىڭ قاڭقاسى (كاركاسى) سالىنىپ بىتسە. ءسويتىپ, بۇل زاڭ الاياقتاردىڭ قارماعىنا ءتۇسىپ قالماۋعا بوگەت بولماق. سوندىقتان قازاقستاندىقتاردى زاڭعا سۇيەنىپ, ەسكەرتەتىنىم  كەز-كەلگەن جارناماعا, اۋىزشا بەرگەن ۋادەگە سەنىپ, «ءۇي سالاتىن جەرى بار ەكەن عوي» دەپ اقشالارىڭىزدى كىم بولسا سوعان بەرمەڭىزدەر! ءسوزسىز, اركىم ءوز اقشاسىنا ءوزى يە. بىراق, كومپانيانىڭ قۇجاتتارى زاڭ تالاپتارىنا سايكەس بولماسا دا, وعان اقشاسىن بەرىپ, الدانىپ قالعانداردىڭ الدىندا جەرگىلىكتى اكىمدىك تە, كەپىلدىك قورى دا جاۋاپ بەرمەيدى. ارينە, الاياقتار قىلمىستىق جاۋاپكەرشىلىككە تارتىلار. بىراق, تۇبىندە ءۇيدىڭ قۇرىلىسى اياعىنا دەيىن بىتپەي, اقشاڭىز قايتارىلماي قالۋى مۇمكىن», - دەدى اسانوۆ. ايتا كەتەيىك, باس پروكۋرور بۇل ۇندەۋىن «پروكۋراتۋرا تۋرالى» زاڭنىڭ 25-2 بابىن باسشىلىققا الا وتىرىپ جاسادى.