فينليانديا – ساياسي جانە ەكونوميكالىق سەرىكتەسىمىز

ءماجىلىس توراعاسى نۇرلان نىعماتۋلين فينليانديانىڭ قازاقستانداعى توتەنشە جانە وكىلەتتى ەلشىسى يلككا رايسانەندى قابىلدادى, دەپ حابارلادى وسى پالاتانىڭ ءباسپاسوز قىزمەتى. تاراپتار ەكىجاقتى قارىم-قا­تىناستى, سونىڭ ىشىندە, پار­لا­مەنتارالىق ۇنقاتىسۋدى نىعايتۋ ماسەلەلەرىن تالقىلادى. ءماجىلىس توراعاسى اتالعان كەزدەسۋدىڭ ەكى مەملەكەتتىڭ تاريحي كەزەڭىمەن سايكەس كەلىپ وتىرعانىنا نازار اۋداردى. ياعني, بيىل قازاقستاننىڭ تاۋەلسىزدىك العانىنا 25 جىل تولسا, كەلەر جىلى فينليانديا تاۋەلسىزدىگىنە – 100 جىل. ءماجىلىس توراعاسى اتاپ وتكەندەي, فينليانديا – قازاقستاننىڭ بارلىق دەڭگەيدە سىندارلى ۇنقاتىسۋعا قول جەتكىزگەن سىرتقى ساياسي جانە ەكو­نو­ميكالىق ارىپتەسى. وتكەن جىلى ەكى­جاقتى تاۋار اينالىمى 467 ملن اقش دوللارىن قۇرادى. ودان ءارى ءماجىلىس توراعاسى: – ۇلت جوسپارىن جانە ەڭ دامىعان 30 ەلدىڭ قاتارىنا كىرۋ جولىنداعى اۋقىمدى شارالاردى جۇزەگە اسىرۋ بارىسىندا يننوۆاتسيالىق دامۋدى زاڭنامالىق قامتاماسىز ەتۋ, ءبىلىم جۇيەسىن جەتىلدىرۋ, اقپاراتتىق-كوممۋنيكاتسيالىق تەحنولوگيالاردى, عىلىمي جانە ىسكەر ورتانىڭ ىنتىماقتاستىق تەتىكتەرىن دامىتۋ ماسەلەلەرىندە فيندىك ارىپتەستەرىمىزدىڭ تاجىريبەسىنە قىزىعۋشىلىق جوعارى, – دەدى. قازان ايىندا ءماجىلىس دەلەگاتسياسى فينلياندياعا رەسمي ساپارمەن بارادى دەپ جوسپارلانعان. ن.نىعماتۋلين حەلسينكيدە وتەتىن بۇل كەزدەسۋدىڭ ماڭىزدى سالالار بويىنشا ەكىجاقتى ءوزارا ءىس-قيمىلدى ودان ءارى نىعايتۋعا ىقپال ەتەتىنىنە سەنىم ءبىلدىردى.