جىلىنا 255 ميلليون شىنى ىدىس شىعارادى

«ەۆروكريستالل» جشس وسىنشا شىنى ىدىس شىعاردى وتكەن عاسىردىڭ سەكسەنىنشى جىلدارىنىڭ اياعىندا اسكەري بورىشىمىزدى ساحالين ارالىنىڭ انيۆا قالاسىندا وتكەردىك. كەيىن بىلسەك, داڭقتى كومپوزيتور ءشامشى قالداياقوۆ اعامىز دا وسى انيۆادا جاۋىنگەر بولىپتى.  ىرگەدە ۇلى مۇحيت تەڭسەلەدى. كەڭەس وداعىنىڭ اتاعى جەر جارىپ تۇرعان شاعى. سول كەزدەرى جاپونيا مەن اقش بىرلەسكەن اسكەري كۇشى ساحالينگە تاياۋ ارالدا وقۋ-جاتتىعۋ جيىنىن وتكىزەتىن بولدى دا, ءبىزدىڭ پولكتى تەڭىز جاعالاۋىنا اكەلدى. تانكتەرىمىزدى قازىلعان ورعا كومىپ, وقپانىن اشىق تەڭىزگە قاراتىپ ون كۇن جاتتىق. ىستەر ءىس جوق, تەڭىز جاعاسىندا جۇرەسىڭ. جاپون ارالى جاقتان تولقىن ايداپ ءتۇرلى زاتتار اعىپ كەلەدى. شاعىن داستارقاننىڭ كولەمىندەي جايىلىپ-بۇكتەلىپ تەڭىز كاپۋستاسى جاتادى. بىلمە­گەن­گە كوسەۋ تاڭ, ادام اعزاسىنا كەرەكتى يودتىڭ كوكەسى وسى كاپۋستادا ەكەنىن كەيىن ءبىلىپ جاتىرمىز عوي. الدەكىمدەر ىشىندەگىسىن سارقىپ ءىشىپ, لاقتىرعان شىنى بوتەلكەلەر جاعالاۋعا شىعىپ قالادى. سىرتقى ءپىشىنى كەرەمەت. ءبىز ۇيرەنگەن باقا باس بوتەلكەلەردىڭ قاسىندا ادەمى م ۇلىكتەي كورىنەدى. «شىركىن-اي, وسىنداي ىدىس­تار ءبىزدىڭ ەلدە دە شىعارىلار ما ەكەن». ايتىپ تۇرعانىڭ ماقتاعاندا اياعىن جەر-كوككە تيگىزبەيتىن ورتاق وتانىڭ – كسرو, جۇرەگى – ماسكەۋ. سولار شىعارماسا قازاقستاننىڭ شاماسى جەتپەيدى دەپ ويلايسىڭ. ۇلكەن ءبىر الىپ يمپەريانىڭ قولىنان كەلە مە ەكەن دەپ جۇرگەن سول شىنى ىدىستاردىڭ كوكەسىن بۇگىندە شىمكەنتتەگى «ەۆروكريستالل» جشس ءبىر ءوزى شىعارىپ جاتىر. ءوندىرىس ورنىندا بولعانىمىزدا شولمەكتەردىڭ قالاي قۇيىلاتىنىن كورىپ تاعى دا تاڭعالدىق. الىپ قوندىرعىنىڭ ەتەگىنەن جىلت ەتىپ تۇيمەدەي شوق بولىنەدى دە اعىنداپ بارىپ ءبىر تىعىنعا كىرەدى. قۇيىنداي قۇيعىتىپ وتىرىپ تاعى بىرەر جەرگە ات شالدىرىپ بارىپ, ۇزىنشا تۇتىكتەن شولمەك بولىپ ءۇرىلىپ شىعادى. ءبىر شوق – ءبىر ءشول­مەك. ارينە, ءبارى ءمىنسىز ەمەس. ءىشىن­دەگى جالىنى ءالى باسىلماعان ءشول­مەكتەر سۋىتۋ تسەحىنان وتكەن سوڭ كى­نا­راتى بارلارى جەلىمەن كەلە جا­تىپ ءوزى سىپىرىلىپ ءتۇسىپ قالادى. ۇلكەن بيزنەسكە مەملەكەتتىك قولداۋ كەرەك. «بيزنەستىڭ جول كارتاسى-2020» باعدارلاماسى بويىنشا «قازاقستان دامۋ بانكىنەن» پايىزى تومەن قارجى العان سەرىكتەستىكتە 250-دەن استام ادام جۇمىس جاساپ جاتىر. ينۆەستيتسيالىق قۋاتى 3,9 ملرد تەڭگە قۇرايتىن زاۋىت جوعارى ساپالى شىنى ىدىستارىن ءارتۇرلى پىشىندە شىعارادى. وندىرىستىك جانە مەديتسينالىق ىدىستاردى 190 مل-دان 2 ليترگە دايىنداي الاتىن, ءارى ءارتۇرلى ءتۇس, پىشىنمەن ارلەيتىن قوندىرعىلارمەن جابدىقتالعان زاۋىت وسى قالپىندا مىقتى ءوندىرىس وشاقتارىنىڭ ءبىرى. وندىرىستىك شىنىنىڭ حيميالىق جانە فيزيكالىق قاسيەتتەرىن ساقتايتىن زەرتحانا جۇمىس جاسايدى. گەرمانيادان الدىرىلعان «نەۋە» قوندىرعىسى تاپسىرۋشىنىڭ قالاۋىنا قاراي شىنىلاردى ءتۇرلى پىشىندە دايىنداپ بەرەدى. الەمدەگى جەتەكشى وندىرۋشىلەردىڭ قازىرگى اۆتوماتتاندىرىلعان قوندىرعىلارىمەن جابدىقتالعان زاۋىتتىڭ وندىرىستىك قۋاتى جىلىنا 225 ملن دانا شىنى ىدىستار دايىنداۋعا جەتەدى. شىنىلاردىڭ ساپاسىن بەكىتەتىن لازەرلىك سكانەرلەۋ قوندىرعىسى جوعارى تەحنولوگيا تيىمدىلىگىن ارتتىرادى. كاسىپورىن قىزمەتكەرلەرى رۋستام ساحوۆ پەن بەكزات بەردىمۇراتوۆ وسىندا اتقارىلىپ جاتقان جۇمىستاردى ءار قوندىرعىنىڭ قىزمەتىن تالداي وتىرىپ بايانداپ بەردى. وڭتۇستىكتىڭ كاسىپكەرلەرى بۇرىن شىنى ىدىستارعا تاپسىرىستى وزگە مەملەكەتتەرگە بەرەر ەدى. «ەۆروكريستالل» ونداي قيىندىقتان قۇتقاردى. قوندىرعىلارىنىڭ تەحنيكالىق دارەجەسى مەن ءوندىرىس ورنىنىڭ قۋاتى حالىقارالىق ساپا ستاندارتى ISO-9000 جانە ەكولوگيالىق قاۋىپسىزدىك ISO-14000 تالاپتارىنا ساي كەلەتىن زاۋىتپەن جۇمىس جاساۋعا كورشىلەس رەسپۋبليكا كاسىپكەرلەرى تالاپتانىپ جاتىر. ۇلكەن ءوندىرىس وسىلاي وركەنىن جايىپ كەلەدى. باقتيار تايجان, «ەگەمەن قازاقستان» وڭتۇستىك قازاقستان وبلىسى