مەملەكەت باسشىسى اقمولا وبلىسىنا جۇمىس ساپارىمەن كەلدى

ەلباسى كوكشەتاۋ قالاسىنا جۇمىس ساپارى اياسىندا «قازاقستان اگرو يننوۆاتسيالىق كورپوراتسياسى» جاۋاپكەرشىلىگى شەكتەۋلى سەرىكتەستىگىنە بارىپ, ونداعى قۇراستىرۋ ۇدەرىسىمەن جانە شىعارىلاتىن تەحنيكا ۇلگىلەرىمەن تانىستى, دەپ حابارلادى اقوردانىڭ ءباسپاسوز قىزمەتى. سونىمەن قاتار, نۇرسۇلتان نازارباەۆ اقمولا وبلىسى جۇرتشىلىعى وكىلدەرىمەن كەزدەستى. كەزدەسۋگە ارداگەرلەر, اۋىل شارۋاشىلىعى كاسىپورىندارىنىڭ, مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە جاستار ۇيىمدارىنىڭ جەتەكشىلەرى, سونداي-اق بيزنەس قوعامداستىعىنىڭ وكىلدەرى قاتىستى. قازاقستان پرەزيدەنتى جينالعاندارعا ارناعان سوزىندە تاۋەلسىزدىك جىلدارىندا مەملەكەت تۇراقتى ەكونوميكالىق ءوسىم مەن جوعارى الەۋمەتتىك ستاندارتتاردى قامتاماسىز ەتە العانىن اتاپ ءوتتى. – بۇگىنگى تاڭدا قازاقستانعا كەلگەن ينۆەستيتسيا كولەمى 250 ميلليارد اقش دوللارىنان استى. 1995 جىلدان بەرى قازاقستاندىقتاردىڭ تابىسى 40 ەسەدەي ءوستى. تۇرعىندار ءال-اۋقاتىنىڭ ارتۋى ءومىر جاسىنىڭ ۇزاقتىعىن 67-دەن 72 جاسقا دەيىن ۇزارتۋعا مۇمكىندىك بەردى. بالا تۋ ءوسىمى – 60%. بۇل ورايدا بالالارعا تولەنەتىن جاردەماقى ءوسىمى 7 ەسەدەن استى, – دەدى نۇرسۇلتان نازارباەۆ. قازاقستان پرەزيدەنتى وبلىستى ەكونوميكالىق تۇرعىدان ءارتاراپتاندىرۋدىڭ باستى قاينار كوزى اگرارلىق سەكتور ەكەنىن اتاپ ءوتتى. – استانانىڭ ءبىر عانا ازىق-ت ۇلىك بەلدەۋى اياسىندا 100-دەن استام جوبانى جۇزەگە اسىرۋ ءۇشىن 85 ميلليارد تەڭگەگە جۋىق ينۆەستيتسيا تارتىلدى. سوڭعى 15 جىلدا 10 مىڭنان استام جاڭا تراكتور, استىق جينايتىن كومباين مەن ەگىن ەگەتىن كەشەن ساتىپ الىندى, – دەدى نۇرسۇلتان نازارباەۆ. بۇعان قوسا, مەملەكەت باسشىسى ءوڭىردىڭ تۋريستىك سالاسىن دامىتۋ قاجەتتىگىن اتاپ ايتتى. – جىل سايىن وبلىسقا ءجۇز مىڭنان استام تۋريست كەلەدى, وعان شورتاندى-بۋراباي كۋرورتى ايماعىنا مەملەكەتتىك قولداۋ كورسەتىلگەنى دە سەپتىگىن تيگىزىپ وتىر. كەلەر جىلى جازدا استانادا ماڭىزدى تاريحي شارا – «ەكسپو-2017» حالىقارالىق كورمەسى وتەدى. وعان 100-دەن استام ەلدىڭ وكىلدەرى قاتىسادى. ولاردىڭ كوبى استاناعا عانا ەمەس, وسى ءوڭىردىڭ تۋريستىك نىساندارىن دا تاماشالاۋعا كەلەدى, – دەپ اتاپ ءوتتى قازاقستان پرەزيدەنتى.