ەكسترەميزم – بۇگىنگى زاماننىڭ زاۋالى – ا. ابدىراسىلقىزى

«زامانىنا قاراي – امالى, دەيدى قازاق. مەن سوڭعى ۋاقىتتا زامانىنا قاراي – زاۋالى دەگەندى كوپ ايتىپ ءجۇرمىن. سەبەبى, ءار زاماننىڭ وزىنە قاراي, شىنىندا دا, زاۋالى بولادى ەكەن. بىزدەن بۇرىنعىلاردىڭ بىرەۋىنە – اشتىق, بىرەۋىنە – قۋعىن-سۇرگىن, بىرەۋىنە – سوعىس زاۋال بولسا, ءبىزدىڭ كەزەڭىمىزگە اقپاراتتىق اعىننىڭ, سونىڭ زاردابى بولىپ تۋىنداعان ەكسترەميزم سەكىلدى كەرى قۇبىلىستارمەن, ءتۇرلى مادەنيەتسىزدىكتەرمەن كۇرەسۋ زاۋالى تاپ كەلگەن سەكىلدى». ءدىن ىستەرى جانە ازاماتتىق قوعام مينيسترلىگىنە قاراستى ءدىن ىستەرى كوميتەتىنىڭ ۇيىتقى بولۋىمەن «ايەلدەر ۇيىمدارىنىڭ جاستار اراسىندا ءدىني ەكسترەميزمنىڭ الدىن الۋداعى ءرولى» تاقىرىبىندا وتكەن عىلىمي-تاجىريبەلىك كونفەرەنتسيا بارىسىندا اتالعان ۆەدومستۆونىڭ ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعىنىڭ ديرەكتورى اينۇر ابدىراسىلقىزى وسىلاي دەدى. قوعام قايراتكەرi, باۋىرجان مومىش ۇلىنىڭ كەلiنi زەينەپ احمەتوۆا ءوز ويىن ورتاعا سالدى: «ءبىز ءاردايىم ءوزىمىزدىڭ ىزباسارلارىمىزعا, ارتىمىزداعا ۇرپاققا نە بەرە الدىق دەگەن توڭىرەكتە ويلانىپ وتىرۋىمىز كەرەك. قازاق «ىقتىرماڭ بولماسا, جەلگە وكپەلەمە» دەيدى. دەمەك, جاھاندانۋعا ەڭ الدىمەن, انا ءتىل ارقىلى ساناعا سىڭەتىن ۇلتتىق ونەگە, سالت-ءداستۇر, ءتالىم-تاربيە, ءبىر سوزبەن ايتقاندا حالىق پەداگوگيكاسى ارقىلى عانا قارسى تۇرا الامىز. ادامنىڭ بويىنداعى يگى قاسيەتتەر, تەكتىلىك تەك قانا انانىڭ سۇتىمەن عانا كەلەدى. ەندەشە, ەڭ الدىمەن, ەرتەڭگى كۇنى انا, كەلىن بولاتىن, ءبىر بوساعانى اتتايتىن قىزداردىڭ تاربيەسىنە كوڭىل ءبولۋىمىز كەرەك. قىزى تەكسىز, تاربيەسىز ەلدىڭ ىرگەسىنەن ىرىسى كەتەدى», – دەدى زەينەپ اپا. ال ءدىن ىستەرى جانە ازاماتتىق قوعام مينيسترلىگى ءدىن ىستەر كوميتەتى توراعاسىنىڭ ورىنباسارى عابيت ابزالبەك تە قوعامدا كەرى اعىمدار تاراپىنان كەلەڭسىزدىكتەر بەلەڭ العان كەزدە نازىك جاندىلاردىڭ قوعامداعى ءرولى وراسان ەكەنىن جەتكىزدى. «بۇگىندە وسى ماسەلە توڭىرەگىندە بىرنەشە ايەلدەر ۇيىمى جۇمىس ىستەپ جاتىر. ماسەلەن, قازىرگى تاڭدا قوعامىمىزداعى رۋحاني ماسەلەلەردى نازاردا ۇستاپ جۇرگەن ايەلدەر ۇيىمدارى «ءدىل يمان» دەپ اتالاتىن اسسوتسياتسيانى قۇردى. ەلىمىزدە «قىز جىبەك», «ايعانىم» سەكىلدى كلۋبتاردىڭ تەتىگى ىسكە قوسىلدى», – دەدى ع.ابزالبەك. ءلايلا ەدىلقىزى