گولف ويىندارى تۋرالى ءسوز بولا قالسا, ەسىمىزگە گولليۆۋدتىق كينولارداعى كورىنىستەر تۇسەتىنى انىق. جاسىل قىرات ۇستىندە وتەتىن ويىننىڭ بۇل ءتۇرىن الەمگە تانىمال ساياسات, ەكونوميكا, ونەر جۇلدىزدارىنىڭ باسىن قوساتىن اقسۇيەكتەرگە ءتان جارىس دەپ قابىلدايتىنىمىز تاعى بار.
نەگىزى, گولف تۋرنيرلەرى كاسىبي سپورتقا قاراعاندا جارناماسى ازداۋ ءارى شەكتەۋلى اۋديتورياعا ارنالعانداي كورىنگەنىمەن, الەمدە ءبىر سۇيەم تەمىر مەن جۇدىرىقتاي دوپ دەسە ىشكەن اسىن جەرگە قوياتىندار كوپتەپ سانالادى ەكەن. ءارى بۇل ويىن - ادامزاتتىڭ ەرتەدەن ەرمەك ەتكەن ويىندارى ساناتىندا.
كارى قۇرلىقتىڭ جازبا شەجىرەسى گولف ويىنىن شوتلاندىقتار ويلاپ تاپتى دەپ جازىپ جۇرگەنىمەن, يمەك تاياق ۇستاپ, يىرىلگەن ءجۇندى دوپ ورنىنا ۇرىپ ويناۋ سالتى عالامداعى بارلىق حالىقققا ءتان سياقتى. ماسەلەن, ريم جاۋىنگەرلەرى ۇرىس اراسىندا جەردى ۇڭعىپ جىبەرىپ, وعان شاعىن شار تارىزدەس دومالاق زاتتى قۋالاپ, سالىپ وينايتىن بولعان. بۇل ءۇردىس تەك باتىس جۇرتىندا عانا ەمەس, شىعىستىقتارعا دا تانىمال بولسا كەرەك. قىتاي جازبالارىندا دا وسىعان ۇقساس ويىن ءتۇرى بولعانى جانە ونى بەكزادالاردىڭ اۋەستىگى جايلى دەرەكتەر كەزدەسەدى-مىس. ال, ءبىزدىڭ ەجەلگى بابالارىمىزدىڭ زامانىندا دا وسىعان ۇقساس ويىن ءتۇرى اسا تانىمال بولعان ەكەن. كوكتۇرىكتەر داۋىرىندە ىشىنە ءشوپ-شالاڭ تولتىرىلعان تەرى دوربانى, ۇزىن يمەك تاياقتار ارقىلى ات ۇستىندە قاقپاقىلعا سالىپ, قىزۋ تالاساتىن ويىننىڭ بولعانى انىق ەدى. ۇلى دالادان ەۋروپاعا سالت اتتى جاۋىنگەرلەردىڭ داڭقىمەن ەرە بارعان وسى تۇركىلىك سارىن ۋاقىت وتە كەلە قازىرگى گولف ويىنىنىڭ شىعۋىنا سەبەپ بولعان شىعار. ءتىپتى, بۇل تۇسپالىمىز قازىرگى حوككەي تۇرلەرىنىڭ تۇپكى ءىزى قايدان شىعاتىنىن دا اڭداتپاي ما؟..
ءجا, دەگەندە قازىرگى وركەنيەتتى الەم ءۇشىن گولف تۋرنيرلەرى ەڭ قازىنالى ويىنداردىڭ قاتارىندا ەكەنى انىق. جانە تالاپقا ساي, ۇلكەن سپورتتىق جارىستار وتەتىن گولف الاڭدارىن كەز-كەلگەن ەلدەن تابۋ قيىن. ەلدىڭ اۋقاتتىلىعىن بىلاي قويعاندا, تابيعي ەرەكشەلىكتەردىڭ ماڭىزى زور ەكەن. قۋانىشتىسى, قازاقستانداعى گولفتىڭ دامۋى ويداعىداي جولعا قويىلعان. تاۋەلسىزدىكتىڭ العاشقى جىلدارىنان-اق وتانداستارمىزدىڭ بۇل ويىنعا دەگەن قىزىعۋشىلىعى ويانىپ, جىلدان جىلعا ارتىپ كەلەدى. ەلىمىزدى قويىپ, ورتا ازياداعى تەڭدەسىز گولف كەشەنى الماتىدا سالىندى. قازىر الاتاۋ باۋرايىنداعى جاسىل الاڭدا الەمدىك دەڭگەيدەگى جارىستار ءوتىپ تۇرادى. سونىڭ ءبىرى بيىل ون ەكىنشى رەت ۇيىمداستىرىلىپ وتىرعان «Kazakhstan Open» ءتۋرنيرى.
الماتى قالاسىنداعى «جايلاۋ» گولف كەشەنىندە جىل سايىن 29 قىركۇيەك پەن 2 قازان ارالىعىندا ءوتىپ, داستۇرگە اينالعان جارىسقا بيىل الەمنىڭ ءار قيىرىنان 132 سپورتشى قاتىسىپ, باقتارىن سىناماقشى. بۇل دودا «Europen Challenge» جارىسىنىڭ ءبىر پۇشپاعى سياقتى. وسى جارىستان توپ جارعان سپورتشىلار «European Tour» جاھاندىق گولف ويىندارىنا قاتىسۋعا جولداما الادى. باستالۋىنا ساناۋلى كۇندەر قالعان جارىستىڭ جۇلدە قورى 450 000 ەۋرونى قۇرايدى. بۇعان دەيىن وتكەن ءتورت جىلدىڭ ويىندارىندا جەڭىمپاز اتانعان سپورتشىلار الماتى تورىندە شەبەرلىكتەرىن تاعى ءبىر رەت شىڭداپ, مىقتىلىعىن دالەلدەيتىن بولادى.
ايتپاقشى, جاقىندا «جايلاۋ» گولف كلۋبىندا الداعى ويىنداردىڭ ۇيىمداستىرىلۋ بارىسىمەن تانىستىرۋ ماقساتىندا Media day شاراسى وتكىزىلگەن بولاتىن. شارادا تۋرنير بارىسىنان اقپارات تاراتۋعا نيەتتى جۋرناليستەردىڭ باسى قوسىلىپ, ويىن ءتارتىبى مەن ەرەكشەلىكتەرى تۋرالى ەركىن اڭگىمە ءوربىدى. ءتىپتى, وتىزعا جۋىق الماتىلىق جۋرناليس گولف الاڭىنا شىعىپ, ءوزارا سايىسقا دا ءتۇستى.
قالماحانبەت مۇقامەتقالي, الماتى.
