ايماقتار ءتىل مەرەكەسىن قالاي اتاپ ءوتتى؟

قازاقستان حالقىنىڭ تىلدەرى كۇنى اياسىندا رەسپۋبليكامىزدى مەكەندەيتىن ءارتۇرلى ۇلت وكىلدەرى بۇگىنگى تاڭداعى قوعامدىق  كەلىسىم مەن تۇراقتىلىقتىڭ تۇتقاسى – ىنتىماق پەن بىرلىك ەكەندىگىن تاعى دا پاش ەتتى. استانا كونگرەسس-حولل سارايىندا استانا قالاسى تىلدەردى دامىتۋ باسقار­ما­سىنىڭ ۇيىمداس­تى­رۋىمەن قازاقستان حالقى تىلدەرى فەستيۆالىنىڭ اشىلۋ سالتاناتى ءوتتى. وعان پارلامەنت ءما­جىلىسىنىڭ دەپۋتاتتارى, زيالى قاۋىم وكىلدەرى, ارداگەرلەر مەن كوپ بالالى انالار, ستۋدەنتتەر قاتىستى. – قازاقستان حالقى تىلدەرى فەستيۆالى بيىل 18-ءشى رەت وتكىزىلۋدە. مەرەكەنىڭ اياسىندا, ياعني قىركۇيەك ايىندا كوپتەگەن مەكەمەلەر ءتۇرلى شارالار وتكىزدى, دەگەن استانا قالاسى تىلدەردى دامىتۋ باسقارماسىنىڭ باستىعى ت.قىشقاشباەۆ مەملەكەتتىك ءتىلدى ناسيحاتتاۋعا, ونىڭ دامۋىنا ەرەكشە ۇلەس قوسىپ جۇرگەن بىرنەشە ءتىل جاناشىرىن استانا قالاسى اكىمىنىڭ العىس حاتىمەن ماراپاتتادى. بيىلعى ماراپات قازاقستاننىڭ حالىق اقىنى قونىسباي ابىلگە, جازۋشى, مەملەكەتتىك سىيلىقتىڭ لاۋرەاتى الدان سمايىلعا, ەكونوميكا عىلىمدارىنىڭ دوكتورى, قوعام قايراتكەرى سايلاۋ باتىرشا ۇلىنا, قوعام قايراتكەرى ورازگۇل اسانعازىقىزىنا, ش.شاياحمەتوۆ اتىن­داعى رەسپۋبليكالىق تىلدەردى دامىتۋ ورتالىعىنىڭ ديرەك­تورى ەربول تىلەشوۆكە, استانا قالاسى تىلدەردى دامىتۋ باسقارماسىنىڭ بۇرىنعى اردا­گەرلەرى كوپبوسىن بەكماعامبەت پەن سۆەت­لانا سۇلەيمەنوۆاعا, سونداي-اق, باس­قارمادا ون جىلدان ارتىق قىزمەت ىستەپ, مەملەكەتتىك ءتىل­دىڭ ءورىس الۋىنا ۇلەس قوسقان قۇرا­لاي اقسەيىتوۆا, تالعات ەرماعامبەت, اينۇر نۇر­مانوۆا مەن گاۋھار ەلەنباەۆاعا تاپسىرىلدى. اتالعان كەشتە ق.قۋانىشباەۆ اتىنداعى قازاق مۋزىكالىق دراما تەاترىنىڭ,  «ناز» مەملەكەتتىك بي تەاترىنىڭ ارتيستەرى, «سەرپەر» دومبىراشىلار ءانسامبلى, «الاش» توبى ونەرلەرىن كورسەتتى.  ايگۇل سەيىلوۆا, «ەگەمەن قازاقستان» الماتى قازاق مەملەكەتتىك قىزدار پەداگوگيكالىق ۋنيۆەرسيتەتىندە «قازاق لينگۆيستيكاسى: بولاشاعى مەن وزەكتى ماسەلەلەرى» اتتى عىلىمي كونفەرەنتسيا ءوتتى. وعان ۋنيۆەرسيتەتتىڭ وقىتۋشىلارى مەن ا.بايتۇرسىن ۇلى اتىنداعى ءتىل ءبىلىمى ينستيتۋ­تىنىڭ عالىمدارى قاتىستى. كونفەرەن­تسيا بارىسىندا قازاق ءتىلىنىڭ مەملەكەتتىك ءتىل رەتىندە قوعامنىڭ ءتۇرلى سالالارىندا قول­دانىلۋ بارىسى ايتىلدى. بۇگىندە وزگە ۇلت وكىلدەرىنىڭ قازاق ءتىلىن ۇيرەنۋگە دەگەن قى­زى­عۋشىلىعىنىڭ ارتىپ كەلە جاتقاندىعى, قازاق ءتىلىنىڭ عىلىم تىلىنە اينالا باستاعاندىعى ءجو­نىن­دە ءسوز قوزعالدى. كونفەرەنتسيا سوڭىندا انا ءتى­لىن ارداق تۇتقان, ءتىل جاناشىرلارى بو­لۋدى مۇرات ەتكەن ستۋدەنت جاستار تىلگە قاتىستى ءوز ولەڭدەرىن وقىدى.  ايگۇل احانبايقىزى, «ەگەمەن قازاقستان» اقتاۋ اقتاۋدا «ماڭگىلىك ەل – مارتەبەلى ءتىل» اتتى پاتريوتتار فورۋمى ءوتتى. ماڭعىستاۋ وبلىستىق تىلدەردى دامىتۋ, مۇراعاتتار مەن قۇجاتتاما باسقارماسىنىڭ ۇيىمداستىرۋىمەن وتكەن شاراعا مەملەكەتتىك مەكەمەلەردىڭ قىزمەتكەرلەرى, ستۋدەنتتەر مەن جاستار, وقۋشىلار جانە ەلىمىزدىڭ وزگە قالالارىنان قۇرمەتتى قوناقتار قاتىستى. سوناۋ ءبىر جىلدارى ەل ىقىلاسىنا بولەنگەن «ءۇش تاتيانانىڭ» ءبىرى تاتيانا بۋرميستروۆا دا فورۋمعا ارنايى شاقىرىلىپتى. پاتريوتتىق شارا قازاقستاندى مەكەن ەتكەن ءتۇرلى ۇلت وكىلدەرى اراسىنداعى دوستىق پەن بىرلىكتى نىعايتۋدى, مەملەكەتتىك ءتىل ساياساتىن جۇزەگە اسىرۋداعى جەتىستىكتەرگە ءۇن قوسۋدى, سون­داي-اق وسى ىزگى ۇستانىمدا جاستاردىڭ ۇلە­س­ىن ارتتىرۋدى, باسەكەگە قابىلەتتى قوعام ءمۇ­شەسى رەتىندە جاس بۋىنىڭ پاتريوتتىق سەزى­مىن كۇ­شەيتۋدى جانە ءۇش ءتىلدى مەڭگەرگەن جاڭا بۋىن­نىڭ ۇلگىلى ءيميدجىن ناسيحاتتاۋدى ماقسات ەتتى.  گۇلايىم شىنتەمىرقىزى, «ەگەمەن قازاقستان» اقتوبە وبلىستىق تىلدەردى دامىتۋ باسقارماسىنىڭ ۇيىمداستىرۋىمەن «ءتىل – تاۋەلسىزدىك تىرەگى» اتتى سالتاناتتى شارا وتكىزىلدى. جيىن بارى­سىندا وبلىستىق تىلدەردى دامىتۋ باسقار­ما­سىنىڭ باسشىسى گۇلايىم تولەباەۆا مەن وبلىستىق ىشكى ساياسات باسقارماسىنىڭ باسشىسى ەربول نۇرعاليەۆ مەملەكەتتىك ءتىلدىڭ ءورىسىن كەڭەيتۋگە اتسالىسىپ كەلە جاتقان جاستارعا العىس حات جانە سىيلىقتار تاپسىردى. مارا­پات­تاۋ راسىمىنەن كەيىن «نۇرلى الەم» قوعامد­ىق قورى «مەملەكەتتىك ءتىل – مەنىڭ ءتىلىم» اتتى بايقاۋىن وتكىزدى. بۇل بايگەدە ءبىرىن­شى ورىندى اقتوبە فەرروقورىتپا زاۋىتى­نىڭ ديسپەتچەرى رۋسلان گاتساەۆ, ەكىنشى ورىندى گۋمانيتارلىق كوللەدجىنىڭ وقۋشى­سى ايجان يۋن, ءۇشىنشى ورىندى اۋىل شا­رۋاشىلىق كولللەدجىنىڭ وقۋشىسى ۆالەنتينا ميششەنسكايا يەلەندى. بايقاۋدىڭ قورىتىندىسى بويىنشا جۇلدەگەرلەر باعالى سىيلىقتارمەن, ديپلومدارمەن ماراپاتتالدى.  ساتىبالدى ءساۋىرباي, «ەگەمەن قازاقستان» كوكشەتاۋ ستەپنوگورسك قالاسىندا مادەنيەت جانە تىلدەردى دامىتۋ ورتا­لى­عىنىڭ ۇيىمداستىرۋىمەن وتكىزىلگەن كور­كەمسوز وقۋ شەبەرلەرىنىڭ بايقاۋىندا اقسۋ ورتا مەكتەبىنىڭ 10-سىنىپ وقۋشىسى تاتيا­نا كوتەنكو ۇزدىك اتاندى ول مۇقاعالي ماقا­تاەۆتىڭ «ءۇش باقىتىم» ولەڭىن, «قازاقستان قاھارماندارى» كىتابىنان الىنعان «عالىم شوقان» ەسسەسىن تولعانىستى كوركەمدىكپەن جەتكىزە ءبىلدى. سونداي-اق, قالانىڭ جۇمىسشى كەنتتەرىندە «ءتىل – دوستىقتىڭ دانەكەرى» بايقاۋى كوپشىلىكتىڭ كوڭىلىنەن شىقتى. اسىرەسە, ءۇش تۇعىرلى ءتىل باعىتى بالاباقشا تاربيەلەنۋشىلەرى اراسىندا قىزى­عۋ­شىلىق تۋدىردى. ءما­سەلەن, «بالدىرعان» بالاباقشاسىنداعى «ءتىل­دىڭ مەرەيى – ەلدىڭ مەرەيى» بايقاۋىنا جوعا­رى توپتىڭ بۇلدىرشىندەرى تۇگەل قاتىس­تى. ال جالپىقالالىق باسەكەدە «كولو­سوك» بالاباقشاسىنان گاردەي كراەۆا, «بالدىر­عاننان» تولەش ءادىلحان مەن ءالتايىر مۇقانوۆ, «بۋراتينودان» اسەل چەركاسوۆا ءۇش تىلدە مانەرلەپ تاقپاق ايتۋىمەن تاڭعالدىرىپ, ءبىرىنشى ورىندى يەمدەندى.  باقبەرگەن امالبەك, «ەگەمەن قازاقستان» قاراعاندى وبلىس بويىنشا 800 ادام مەملەكەتتىك تىلدەن ديكتانت جازدى. بۇل شاراعا ءوز ساۋاتىن تەكسەرگىسى كەلگەندەر ەرىكتى تۇردە قاتىستى. «ءماتىندى ءبىز تىلدەردى وقىتۋ ورتالىعىمەن بىرلەسە وتىرىپ تاڭدادىق. ناتيجەسىندە, ارقايسىسى 120 سوزدەن تۇراتىن ءۇش نۇسقا ىرىكتەلىنىپ الىندى. ال ديكتانت ورتالىقتىڭ اعا ادىسكەرى جۇپار جاقانوۆا تاڭداعان نۇسقا بويىنشا جازىلدى. تاقىرىپ ماتىنىنە تاۋەلسىزدىكتىڭ 25 جىلدىعى جانە باسقا دا ايتۋلى داتالار ارقاۋ بولدى», دەپ اتاپ ءوتتى وبلىستىق تىلدەردى دامىتۋ جونىندەگى باسقارمانىڭ اعا مامانى سالتانات راحمەتوۆا. ديكتانت «قازتەست» جۇيەسى بويىنشا تەكسەرىلەدى. ونىڭ تالاپتارىنا ساي, ەڭ جوعارى ۇپاي 25 بالعا تەڭ. ال وزاتتاردىڭ قاتارىنا قوسىلۋ ءۇشىن ديكتانت جازۋشى كەم دەگەندە 18 بالل الۋى كەرەك.  قايرات ءابىلدينوۆ, «ەگەمەن قازاقستان» قوستاناي «مەملەكەتتىك ءتىل – مەنىڭ ءتىلىم» اكتسيا­سى اياسىندا كوپتەگەن يگى شارالار وبلىس ورتالىعىنان باستاپ, قالالار مەن اۋدانداردى, اۋىلداردى دا قامتىدى. وبلىستىق تىلدەردى دامىتۋ باسقارماسى جانە «سوتسيۋم & يا» قوعامدىق بىرلەستىگىنىڭ ۇيىتقى بولۋىمەن «ءتىلدارىن» كلۋبىنىڭ مۇشەلەرى قوستاناي اۋدانىنىڭ جاستارىمەن كەزدەستى. شارانى كلۋبتىڭ بەلسەندى مۇشەلەرى ينديرا يۆانوۆا, الەكساندرا كاشەليۋك, ولگا تيحوۆا مەملەكەتتىك تىلدە جۇرگىزدى. اكتسيانىڭ ماقساتى مەملەكەتتىك ءتىلدى ناسيحاتتاۋ, ونىڭ قولدانىس اياسىن كەڭەيتۋ بول­عاندىقتان, جاس­تار وسى تاقىرىپتار توڭىرەگىندە پىكىر الماس­تى. قىزىقتى شارانىڭ ءبىرى ىشكى ىستەر مينيستر­لىگىنىڭ قوستاناي وقۋ ورتالىعىندا ءوتتى. «ءتىل – بىرلىگىمىزدىڭ نىشانى» اتتى شارادا پوليتسەيلەر «ءتىل جانە دوستىق» دەپ اتالاتىن سپورتتىق ويىندارعا, ءتىل ساۋاتتىلىعىن پاش ەتەتىن شىعارما, ديكتانت جازۋدان, اۋدارمادان وتكەن بايقاۋعا قاتىستى. «جاستار جارىس­تى ۇناتادى. سوندىقتان تىلگە بايلانىستى مەرەكەلىك شارانىڭ بارلىعى دا دۋماندى ءوتتى. ەڭ باستىسى, بايقاۋعا دايىندالعان جاستاردىڭ جەڭىسكە جەتۋىنە مەملەكەتتىك ءتىل كومەكتەسەدى» دەيدى وقۋ ورتالىعىنىڭ ديرەكتورى ت.مەڭدىباەۆ.  نازيرا جارىمبەتوۆا, «ەگەمەن قازاقستان» قىزىلوردا «دوستىق ۇيىندەگى» «ءتىل – تاتۋلىق تىرەگى» وبلىستىق فەستيۆالىنە ايماقتاعى زيالى قاۋىم وكىلدەرى, ءتىل جاناشىرلارى, بارلىق مەكە­مە جانە جوعارى وقۋ ورىندارىنىڭ باس­شىلارى, مۇناي كومپانيالارى مەن ەتنوما­دەني بىرلەستىك وكىلدەرى, ستۋدەنت جاس­تار مەن وبلىستىق, اۋماقتىق مەكەمەلەردىڭ مەملە­كەتتىك تىلگە جاۋاپتى قىزمەتكەرلەرى قاتىستى. شارادا بىرقاتار ءتىل جاناشىرلارى ماراپاتتالدى. سونىمەن قاتار, ەتنومادەني ءبىر­لەستىكتەر اراسىندا وتكىزىلگەن «مەملە­كەتتىك ءتىل – مەنىڭ ءتىلىم» وبلىستىق بايقاۋىنىڭ جەڭىمپازدارىنا دا قۇرمەت كورسەتىلدى. فەستيۆال بارىسىندا جينالعان قاۋىم­عا مەرەكەلىك شاشۋ رەتىندە ازىرلەنگەن كونتسەرت­تىك باعدارلاما ۇسىنىلدى. ەتنومادەني ءبىر­لەس­تىكتەر وزدەرىنىڭ ءان-بي ونەرلەرىن كورسەتتى.  ەرجان بايتىلەس, «ەگەمەن قازاقستان» پاۆلودار «مەملەكەتتىك تىلدە ۇزدىك قىزمەت كورسەتۋ» كونكۋرسىنىڭ جەڭىمپازدارى انىقتالدى. بۇل بايقاۋعا مەملەكەتتىك قىزمەتكەرلەر, جەكە كاسىپكەرلەر, مەيرامحانا داياشىلارى جانە قارجىلىق ۇيىمداردىڭ ماماندارى قاتىستى. بايقاۋعا باعا بەرۋشىلەر قاتىسۋشىلاردىڭ مەملەكەتتىك تىلدە سويلەۋ مانەرىنە, كاسىبي شەبەرلىگىنە جانە ولار ازىرلەگەن بەينەروليكتىڭ مازمۇنىنا نازار اۋداردى. – ءتىل ساياساتىنا وراي تامىز جانە قىركۇيەك ايلارىندا وبلىس بويىنشا 200-دەن استام ءىس-شارا ۇيىمداستىرىلدى. ال «مەملەكەتتىك تىلدە ۇزدىك قىزمەت كورسەتۋ» بايقاۋىن بيىل العاش رەت وتكىزدىك. قاتىسۋعا ءۇمىت بىلدىرگەندەر قاتارى كوپ بولدى جانە ۇسىنعان ماتەريالدارىنىڭ ساپاسى دا جوعارى, – دەدى وبلىستىق تىلدەردى دامىتۋ باسقارماسى باسشىسىنىڭ ورىنباسارى گۇلسارا كوكينا. بايقاۋ قورىتىندىسى بويىنشا «الەۋ­مەتتىك تولەمدەردى ۆەدومستۆوارالىق ەسەپتەۋ ورتالىعى» دەپارتامەنتىنىڭ قۇجاتتاردى قا­بىلداۋ جونىندەگى مامانى ءسانيا قاسانوۆا ءبىرىنشى, «ەۋرازيالىق بانك» اق قارجى كەڭەسشىسى جانەركە تۇراربەكوۆا ەكىنشى, «بىرىڭعاي جيناقتاۋ زەينەتاقى قورى» اق پاۆلودار وبلىسى بويىنشا جەتەكشى مامانى گۇلبيرا تەمىروۆا ءۇشىنشى ورىنعا يە بولدى.  فاريدا بىقاي, «ەگەمەن قازاقستان» پەتروپاۆل بيىل وڭىردە قازاقستان حالقى تىلدەرىنىڭ فەس­­تيۆالى اياسىندا ءۇش جۇزگە جۋىق ءىس-شارا وتكى­زۋ بەلگىلەنگەن. «ءتىل–پاراسات» سايىسىنا قازاق ءتىلىن ەركىن مەڭگەرگەن ورىس جاستارى قاتىسىپ, ءۇش كەزەڭ بويىنشا شەبەرلىك سىناستى. ۇمىتكەرلەردىڭ اراسىنان پەتروپاۆلدىق ستۋدەنت گالينا جۋ­كوۆا ەرەكشەلەندى. ول قازاقشا تامىلجىتا ءان سالىپ, ابايدىڭ قارا سوزدەرى مەن ولەڭدەرىن جاتقا وقىپ, وزا شاپقاندىقتان ءبىرىنشى ورىنعا لايىق دەپ تانىلدى. 1400-دەي وقۋشى ءبىلىم الاتىن, 9 ەتنوبولىم جۇمىس ىستەيتىن ۇلتتىق وركەندەۋ مەكتەبىندە ۇيىمداستىرىلعان شارا «نۇر وتان» پارتياسى جەرگىلىكتى فيليالىنىڭ قولداۋىمەن ءوتىپ, مازمۇندىلىعىمەن ەستە قالدى. بايقاۋ-سايىستاردىڭ قاي-قايسىسىندا بولسىن تىل–حالىق قازىناسى, ۇلتتىڭ جانى, مەم­لەكەتتىك ءتىل قازاقستاندى وتانىم دەپ ارداق­تاي­تىن ءار پەرزەنتتىڭ ورتاق ءتىلى دەگەن ماقسات نىسانا ەتىلدى.  ومىر ەسقالي, «ەگەمەن قازاقستان» وسكەمەن ءبىر اي بويى شىعىس وڭىرىندەگى ءتۇرلى ۇلتتىڭ ءتىلى مەن ءداستۇرىن پاش ەتكەن «وتانىمىز ورتاق, ءتىلىمىز ءتۇرلى, تىلەگىمىز ءبىر» اتتى وبلىستىق فەستيۆال ەل تاۋەلسىزدىگىنىڭ 25 جىلدىعىنا ارنالدى. سەمەيدىڭ ورتالىق ساياباعىندا وتكەن شاراعا وسكەمەن, كۋرچاتوۆ سەكىلدى قالالار مەن جارما, بەسقاراعاي, بورودۋليحا, زىريان, ۇلان اۋداندارىنان ارنايى كەلگەن ءتۇرلى ەتنوس وكىلدەرى وزدەرىنىڭ تاريحى مەن سالت-داستۇرىنە بايلانىستى كورمەنى جۇرت نازارىنا ۇسىندى. شىعىسقازاقستاندىق ءتىل جاناشىرلارى ال­­دىمەن ساياباقتاعى شاكارىم ەسكەرتكىشىنە گۇل شوقتارىن قويىپ, اقىن رۋحىنا تاعزىم ەتتى. – تمد ەلدەرى ىشىندە تىلدەر مەرەكەسى قا­زاق­­ستاندا عانا تويلانادى. بۇل مەرەكەنىڭ ارتىق­­شىلىعى ەلىمىزدە تۇراتىن بارلىق حالىق­­تاردى جاقىنداستىرىپ, تۋىستىرادى, – دەدى وبلىستىق «ۆوزروجدەنيە» نەمىس قوعام­دىق بىرلەستىگىنىڭ ءتورايىمى ليليا گونچارۋك. سونداي-اق, شاراعا جينالعان جۇرتشى­لىق­تى سەمەيدەگى تاتار جەكسەنبىلىك مەكتەبىنىڭ وقىتۋشىسى راۋفا نۋرلينا, ورىس الەۋمەتتىك-مادەني ورتالىعى توراعاسىنىڭ ورىنباسارى نادەجدا كوزىرەۆا جانە تاعى باسقالار قۇتتىقتاپ, جىلى لەبىزدەرىن ءبىلدىردى.  دۋمان اناش, «ەگەمەن قازاقستان» تالدىقورعان تالدىقورعانداعى دوستىق ءۇيى – قوعامدىق كەلىسىم ورتالىعىندا «ءتىل تۇتاستىعى – ەل تۇتاستىعى» اتتى دوڭگەلەك ۇستەل ءماجىلىسى ءوتتى. جيىندا الماتى وبلىسىندا 105 ەتنوس وكىلدەرى ءبىر اتانىڭ بالالارىنداي تاتۋ-ءتاتتى ءومىر ءسۇرىپ, مەملەكەتتىك ءتىلدى جەتە ۇيرەنۋدە ەكەندىگى باسا ايتىلدى. باسقوسۋدا ەتنوس وكىلدەرى مەن مەكتەپ وقۋشىلارى, ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى ءسوز الىپ, مەملەكەتتىك ءتىلدىڭ دامۋى جايلى, بو­لاشاقتاعى قازاق ءتىلىنىڭ احۋالى توڭىرە­گىندە وي ءوربىتىپ, ءوز پىكىرلەرىن ورتاعا سالدى. ال «پاراسات» ءتىل جاناشىرلارى كلۋبى­نىڭ توراعاسى يگور سكورومنىي قازاق حالقى­نىڭ جاناشىرلىعى مەن ونىڭ قاسيەتتى ءتىلى­نىڭ عۇمىرى ۇزاق بولاتىنىن جەتكىزىپ, سول جولدا كلۋب مۇشەلەرى جابىلا جۇمىس اتقارا­تىندىعىنا سەنىم ءبىلدىردى. نۇربول الدىباەۆ, «ەگەمەن قازاقستان» تاراز تىلدەردى دامىتۋ باسقارماسى ءتىل جاناشىرلارى مەن مەملەكەتتىك ءتىلدى جەتىك مەڭگەرگەن ەتنوس وكىلدەرىنىڭ جانە وبلىستاعى ەتنومادەني بىرلەستىك وكىلدەرىنىڭ اراسىندا «ءتىل – تاتۋلىق تىرەگى» اتتى وبلىستىق فەستيۆال وتكىزدى. بۇگىندە قاسيەتتى اۋليەاتا جەرىندە تاتۋلىعى مەن بىرلىگى جاراسقان 80-نەن استام ۇلت پەن ۇلىس تاتۋ-ءتاتتى ءومىر ءسۇرىپ جاتىر. مەملەكەتتىك ءتىلدىڭ قولدانىلۋ اياسىن كەڭەيتۋ, مارتەبەسىن كوتەرۋ مەن ماڭىز­دى­لىعىن كەڭىنەن ناسيحاتتاۋ جانە وڭىردەگى ءتۇرلى ەتنوستاردىڭ انا تىلدەرىن دامىتۋعا قولداۋ كورسەتۋ, سونداي-اق ەلىمىزدەگى تاتۋلىق پەن ازاماتتىق كەلىسىمدى نىعايتۋدى باستى ماقسات تۇتقان بۇل ءىس-شارا بارىسىندا بىرقاتار ءتىل جاناشىرلارى العىس حاتپەن ماراپاتتالدى. ورالحان ءداۋىت, «ەگەمەن قازاقستان» شىمكەنت «ءوزىڭ تۇرىپ جاتقان, بولاشاعىڭدى بايلانىستىرعان مەملەكەتتىڭ ءتىلىن بىلمەسەڭ, بىلۋگە تىرىسپاساڭ, ول سەنىڭ بىلىگىڭنىڭ, مادە­نيە­تىڭنىڭ تومەندىگى. ونى وسىنداعى بارشا ۇلتتار مەن ۇلىس وكىلدەرى بىلۋگە ءتيىستى». وبلىستا وتكەن «مەملەكەتتىك ءتىل» باي­قاۋ­ىندا يران ەتنومادەني ورتالىعىنىڭ توراعاسى كاپار پۋر وسىلاي دەدى. شىمكەنت قالالىق تىلدەردى وقىتۋ ورتا­لىعى وتكىزگەن بايقاۋعا قاتىسقان مەملەكەتتىك قىزمەتكەرلەر سەگىز كوماندا بولىپ سىنعا ءتۇستى. ولار ءتورت بولىمنەن تۇراتىن سايىس بارىسىندا ءتىل شەبەرلىگى, شەشەندىك ءسوز ونەرى جاعىنان دا وزدەرىنىڭ بىلىكتىلىگىن بايقاتتى. مەملەكەتتىك تىلدە قولدانىستاعى جۇرگەن ءۇش جۇزگە جۋىق تەرميندەردىڭ ءمانىن تارقاتتى. باقتيار تايجان, «ەگەمەن قازاقستان»