كينوتۋىندىلار تەگىن كورسەتىلەدى

قازاقستان كينەماتوگرافياسىن ورىستەتىپ, ۇلتتىق كينو ءوندىرىسىنىڭ مادەني ەرەكشەلىگى مەن نەگىزىن ساقتاپ قالۋعا جانە قازاقستان مەن ورتالىق ازيانىڭ ەڭ ۇزدىك كينوتۋىندىلارىن ىنتالاندىرىپ, جاس تالانتتاردىڭ كينوجوبالارىن حالىقارالىق دەڭگەيدە ناسيحاتتاۋعا باعىتتالعان ءحىى «ەۋرازيا» حالىقارالىق كينوفەستيۆالىنىڭ بيىلعى جاڭالىعى كوپ. بەلگىلى رەجيسسەر راشيد نۇعى­ما­نوۆتىڭ ايتۋىنشا, كينوفەستيۆالدى «يندۋستريالىق» پىشىمنەن شىعارىپ, مەيلىنشە دەموكراتيالىق, حالىقتىق سيپاتقا كوشىرىپ, بارلىق كينوتۋىندىلاردى تەگىن كورسەتپەك. كينوگەرلەردىڭ جۇمىسى بىرنەشە اتالىم بويىنشا سىنعا ءتۇسىپ, «تۇلپار» ۇلتتىق سىيلىعىمەن ماراپاتتالادى. سونداي-اق وسى فەس­تي­ۆال اياسىندا «بالا ەۋرازياسى» مي­ني-فەستيۆالى وتەدى. ەڭ ۇزدىك بالالار ءفيلمى ساراپقا سالىناتىن باعدارلامادا بايگەدەن ءبى­رىنشى ورىن العان فيلمگە ابدوللا قار­ساقباەۆ اتىنداعى سىيلىق ۇسىنىلىپ, ونى ا.قارساقباەۆتىڭ نەمەرەسى, 8-سىنىپ وقۋشىسى مۇسا قار­ساقباەۆ تابىستايدى. وتكەن جىلعى ءداستۇردىڭ ىزىمەن وراز ابىشەۆ اتىنداعى ەڭ ۇزدىك دەرەكتى فيلم جۇلدەسى دە ءوز يەسىن كۇتەدى. فەستيۆال شەڭبەرىندەگى ءىس-شارالار ءۇش بولىمنەن تۇرادى. اتاپ ايتقاندا, «قالاعا دەگەن ماحاببات» بولىمىندەگى كينوتۋىندىلار قوعامدىق ورىنداردا كورسەتىلەدى. ال «كينوعا دەگەن ماحاببات» بولىمىندە نەگىزگى بايقاۋ جانە بايقاۋدان تىس باعدارلامالار قامتىلعان. «كاسىپكە دەگەن ماحاببات» ءبولىمى بويىنشا ەسىمى ەلگە تانىمال بەلگىلى رەجيسسەرلەردىڭ شەبەرلىك-سىنىپتارى, ءباسپاسوز ءماس­ليحاتتارى, دوڭگەلەك ۇستەلدەر, كاسىبي كەزدەسۋلەر وتكىزىلەدى. فەستيۆالدا قازاقستان مەن ورتالىق ازيادان, الىس جانە جاقىن شەتەلدەردەن 100-دەن استام فيلم كورسەتىلەدى. تۇڭعىش رەت ءتۇرلى جانردا تۇسىرىلگەن اراب فيلمدەرى كورەرمەن نازارىنا ۇسىنىلماق. الەمدى جاقسىلىققا جەتەلەيتىن ادەمى يدەيانى ارقاۋ ەتكەن رەجيسسەرلەردىڭ الەۋمەتتىك تاقىرىپتاعى تۋىندىلارى دا قوعام نازارىن اۋدارۋ ءۇشىن ماقساتتى تۇردە قاتىستىرىلىپ وتىر. كينوفەستيۆال 25-30 قىركۇيەك ارا­لىعىندا مادەنيەت جانە سپورت مي­­نيس­­تر­­لىگىنىڭ قولداۋىمەن الماتىدا وتەدى. ايگۇل احانبايقىزى, «ەگەمەن قازاقستان» الماتى