سوت تاريحىنان سىر تارتقان

ەلوردادا تاۋەلسىزدىكتىڭ 25 جىل­دىعىنا وراي 7-قازاندا بولاتىن قازاق­ستان رەسپۋبليكاسى سۋديالارىنىڭ VII سەزىنە ارنالعان «قازاقستانداعى سوت بيلىگى: وتكەن تاريحى مەن قازىرگى كە­زەڭى» اتتى كورمەنىڭ سالتاناتتى اشىلۋ ءراسىمى بولدى. ونى ءسوز سويلەپ اشقان جوعارعى سوت توراعاسى قايرات ءمامي كورمەنىڭ ماقساتى مەن ماڭىزىنا ەرەكشە توقتالدى. ول وسىندا ەجەلگى داۋىردەن باس­تاپ, بۇگىنگى كۇنگە دەيىنگى قازاقستاندىق سوت جۇيەسىنىڭ دامۋ تاريحىنا قاتىستى بارلىق ماتەريالدارمەن تانىسۋعا بولاتىنىن جەتكىزدى. «قاسىم حاننىڭ – قاسقا جولى, ەسىم حان­نىڭ – ەسكى جولى جانە تاۋكە حاننىڭ «جەتى جارعىسى» كوشپەلى ۇلى دالا ەلىندەگى سوت ادىلدىگىنىڭ نەگىزىن قالادى. اتالعان جارعىلار سول داۋىردەگى قۇقىقتىق قاتى­ناس­تاردى رەتتەۋمەن قاتار, قوعامدىق كەلىسىمدى ساقتاۋعا ىقپال ەتتى. قازاق بيلەرى سوت ىستەرىمەن بىرگە زاڭ شىعارۋشىلىق, ات­­قارۋشىلىق جانە ديپلوماتيالىق قىز­مەت­تى دە قوسا اتقارىپ كەلگەن», – دەدى قاي­رات ءابدى­رازاق ۇلى. سونداي-اق, كەلۋ­شىلەر نازارىنا بيلەردىڭ قول قويعان سايا­سي اكىمشىلىك قۇجاتتارى, حاندار مەن سۇل­تاندارعا جانە شەتەلدىك بيلەۋشىلەرگە جاز­عان حاتتارى ۇسىنىلعاندىعى ورتاعا سالىندى. ەكسپوزيتسيا «ەجەلگى ءداۋىر, ورتا عاسىر جانە رەۆوليۋتسياعا دەيىنگى كەزەڭدەگى قازاقستانداعى ءداستۇرلى قۇقىق پەن سوت بيلىگى», «قازاقستاننىڭ جاڭا تاريحي كەزەڭىندەگى سوت-قۇقىق جۇيەسى» جانە «قا­زاقستان رەسپۋبليكاسىنىڭ تاۋەلسىزدىك جىلدارىنداعى سوت جۇيەسىنىڭ قالىپتاسۋى مەن دامۋى» دەگەن ءۇش بولىمنەن تۇرادى. مۇن­دا قويىلعان ەكسپوناتتار مەن فوتوسۋرەتتەر, قۇجاتتار, ماتەريالدار مەن بەينەماتەريالدار جوعارعى سوت مۋ­زەيىنەن, پرەزيدەنت, تۇڭعىش پرەزيدەنت, ۇلتتىق جانە ورتالىق مەملەكەتتىك مۇ­راعاتتارىنان جيناقتالعان. كورمەگە 210 فوتوسۋرەت پەن 50 ەكسپونات قويىلعان. اسقار تۇراپباي ۇلى, «ەگەمەن قازاقستان»