ولجاستى يتاليالىقتار وقيدى

يتاليانىڭ پوردەنون قالاسىندا ۇيىم­داس­تىرىلعان «Festa del libro con gli autori» (اۆتورلاردىڭ قاتىسۋىمەن كىتاپ فەستيۆالى) اتتى ءىرى كىتاپ جارمەڭكەسى اياسىندا قازاقتىڭ كورنەكتى اقىن-جازۋشىسى, قوعام قايراتكەرى ولجاس سۇلەيمەنوۆتىڭ يتاليا تىلىنە اۋدارىلعان «جازۋ ءتىلى» كىتابىنىڭ تۇساۋكەسەرى ءوتتى. قازاقستاننىڭ يتالياداعى ەلشىلىگى ەلىمىز تاۋەلسىزدىگىنىڭ 25 جىلدىق مەرەيتويى قارساڭىندا كىتاپتىڭ اۋدارماسى مەن باسىلۋىن تاريح, مادەنيەت, ادەبيەت جانە فيلولوگيا سالاسىندا كىتاپتاردى باسىپ شىعارۋعا مامانداندىرىلعان «ساندرو تەتي ەديتورە» باسپا ۇيىمەن بىرلەسىپ دايىندادى. تۇساۋكەسەرگە يتاليانىڭ ونەرپاز جانە عىلىمي زيالى وكىلدەرى, ساياسي, قوعامدىق, ىسكەرلىك توپتارى, يتاليا ۋنيۆەرسيتەتتەرىنىڭ پروفەسسورلارى جانە ستۋدەنتتەرى, ءىرى كىتاپ باسپالارىنىڭ وكىلدەرى قاتىستى. يتاليانىڭ اتاقتى تاريحشىسى, جازۋشى فرانكو كارديني جينالعاندارعا كىتاپتىڭ اۆتورىن تانىستىردى. ول ءوز سوزىندە الەمدە العاش رەت انتيادرولىق قوزعالىسىنىڭ نەگىزىن قالا­عان و.سۇلەيمەنوۆتىڭ قوعامدىق-ساياسي قىزمەتى جونىندە دە ايتىپ ءوتتى. بۇدان ءارى اقىننىڭ ادەبي قىزمەتىنە توقتالىپ, ولەڭدەرى مەن داستاندارى الەمنىڭ كوپتەگەن تىلدەرىنە اۋدارىلعانىن ءسوز ەتتى. «جازۋ ءتىلى» كىتابىنىڭ ەۋروپا تىلدەرى اراسىندا ءبىرىنشى بولىپ يتاليا تىلىنە اۋدارىلدى. سونداي-اق ف.كارديني قازاق كالامگەرىنە ەكى ەل اراسىنداعى مادەنيەت باۋىرلاستىعى بۇرىننان جاقىن ەكەنىن ايتا كەلىپ, ونىڭ يتاليا تىلىندەگى كىتابىنىڭ باسىلىپ شىعۋى بىزدەردى بۇرىنعىدان دا جاقىنداتا تۇسەتىنىن تىلگە تيەك ەتتى. «ەگەمەن-اقپارات»