جانىبەك ءالىمحان ۇلى توكيو وليمپياداسىنا دايىندالادى

قازاقستاندىق بەلگىلى بوكسشى جانىبەك ءالىمحان ۇلى ريو-دە-جانەيرو وليمپيالىق ويىندارىنان كەيىن ءوزىن كاسىپقويلار رينگىندە سىناپ كورۋگە بەل بايلاپتى. بۇل جاڭالىقتى جالپاق جۇرتقا بىلعارى قولعاپ شەبەرىنىڭ جەكە جاتتىقتىرۋشىسى مۇرات سيحىمباي جەتكىزدى. – جاسىراتىنى جوق, وليمپيادادان كەيىن جانىبەكتىڭ كوڭىل كۇيى بولا قويمادى, – دەدى باپكەر كەشە ءبىز ارنايى حابارلاسقانىمىزدا. – سون­داي كوڭىلىنىڭ حوشى بولماي جۇرگەن كۇن­دەرىندە وعان كاسىپقويلار رينگىندە باعىن سىناپ كورۋ جونىندە ۇسىنىس ءتۇستى. ءبىز سوسىن ءارى-بەرى ويلاسا كەلىپ, ۇسىنىستى قابىل العاندى ءجون كوردىك. – بۇل ءبىرجولا كاسىپقويلارعا كەتەدى دەگەن ءسوز ەمەس شىعار؟ – جوق. الداعى وليمپياداعا دەيىن ءالى ءتورت جىل بار. سوعان دەيىن مۇندا دا شاما-شارىقتى كورىپ, تاجىريبە تولىستىرا ءتۇسۋ كەرەك بولىپ تۇر. ءبىر جاعى, بۇل اۋەسقوي بوكستان ازداپ تىنىس الۋ دا بولىپ تابىلادى. ەكىنشىدەن, شاكىرتىم ءوزىن باسقا قىرىنان, باسقا سالادا كورگىسى كەلدى. مەن ونىڭ مۇنىسىن قۇپتايمىن. ال اللا جازىپ جاتسا, توكيونىڭ الدىندا ارەكەت جاساپ, ليتسەنزيا الىپ, وليمپياداعا قايتا قاتىسۋعا ابدەن بولادى. – جانىبەك بۇل سىندا اسا قاتتى توسىلا قويماس. – مەن دە سولاي ويلايمىن. نەگىزىندە, جانىبەك – وتە كۇشتى جىگىت. ونىڭ 23 جاسىنا دەيىن الەمنىڭ دە, ازيانىڭ دا چەمپيونى بولىپ ۇلگەرگەنى بەكەر ەمەس. راس, وليمپيالىق ويىنداردا العا قويعان ماقساتى ورىندالماي قالدى. دەگەنمەن, بۇل ساتسىزدىكتە ءبىز وعان قولداۋ كورسەتتىك. مۇنىمەن ءومىر توقتاپ قالعان جوق. الدا الاتىن ءالى تالاي اسۋ بار دەپ بىلەمىن. جانىبەك ريو رينگىندە ءۇش شايقاس وتكىزدى. ول 1/16 فينالدىق ايقاستا بريتانيالىق ەنتوني فوۋلەردى, 1/8 فينالدا الجيرلىك يلياس ءاباديدى ۇتتى. الايدا, شيرەك فينالدا قازىر ازەربايجان نامىسىن قورعايتىن بۇرىنعى قازاقستاندىق كامران شاحسۋۆارلىدان ۇتىلىپ قالدى. جانىبەك ءالىمحان ۇلىنىڭ كاسىپقويلار شارشى الاڭىنداعى العاشقى جەكپە-جەگى 29 قازان كۇنى الماتىدا بولاتىن بوكس كەشى شەڭبەرىندە وتكەلى تۇر. قازىرگە دەيىن ونىڭ دەبيۋتتىك جەكپە-جەگى كىممەن وتەتىنى دە بەلگىلى بولدى. ول – 28 جاستاعى كولۋمبيالىق ميلتون نۋنەس. ورتا سالماقتا سىنعا ءتۇسىپ جۇرگەن نۋنەس بۇعان دەيىن كاسىپقويلار رينگىندە 50 كەزدەسۋ وتكىزىپ, سولاردىڭ 33-ىندە جەڭگەن, 29-ىن نوكاۋت­پەن اياقتاعان, تاعى 16 شايقاسىندا جەڭىلىس تاپقان, ءبىر جەكپە-جەكتى تەڭ بىتىرگەن. سول كۇنگى باستى شايقاس قازاقستاندىق قانات يسلام مەن WBA Fedelatin نۇسقاسىنىڭ ءبىرىنشى ورتا سالماقتاعى چەمپيونى, گانالىق پاتريك اللوتەي اراسىندا وتەدى.  رۋسلان يگىلىك