قوستانايدا پايدالانىلماعان جەر تەلىمدەرى سوت ارقىلى قايتارىلادى

وبلىستا جەر پايدالانۋ جانە قورعاۋ جونىندەگى باسقارما اۋىل شارۋاشىلىعى ماڭىزى بار 13 361 گەكتار جەردى كەرى قايتارۋ ءۇشىن ءىستى سوتقا بەردى. باسقارما توراعاسى نۇرلان قاتاربەكوۆ ءباسپاسوز بريفينگىندە ونىڭ باستى سەبەپتەرىن اتادى. باستى سەبەپ – جەردى جالعا العان ازاماتتار وعان كۇتىممەن قارامايدى, القاپ قاۋ ءوسىپ بوس جاتادى. تەكسەرۋ جالعا الۋشىلارعا 2012-2014 جىلى بەرىلگەن جەرلەرگە جۇرگىزىلگەن. ال 2016 جىلدىڭ 8 ايىندا باسقارما جەر تەلىمدەرىنە 228 تەكسەرۋ جۇرگىزىپ, جەرگە بايلانىستى 152 زاڭ بۇزۋشىلىقتى تىركەگەن. 92,5 مىڭ گەكتار جەردىڭ بوس جاتقاندىعىن انىقتاعان. ول بويىنشا اكىمشىلىك-وندىرىستىك ءىس قوزعالىپ, 22,6 ميلليون تەڭگە ايىپ سالىندى. سونىمەن قاتار, قۇرىلىس سالۋعا ءتيىستى 2 جەر تەلىمى دە زاڭمەن كەرى قايتارىلدى. اۋداندىق اكىمدىكتىڭ ۇسىنىسى نەگىزىندە اۋداندىق ءماسليحاتتار قازاقستان رەسپۋبليكاسىنىڭ «سالىقتار مەن بيۋدجەتكە تولەنەتىن مىندەتتى تولەمدەر تۋرالى» كودەكسىنىڭ 386- بابىنا سايكەس جالعا الىپ, پايدالانباعان اۋىل شارۋاشىلىعى ماڭىزى بار جەرلەرگە سالىقتى 10 ەسە كوبەيتكەن بولاتىن. جەر پايدالانۋ جانە قورعاۋ باسقارماسى قازىردىڭ وزىندە كۇتۋسىز قالعان 88,9 مىڭ گەكتارعا يەلىك ەتىپ وتىرعان 44 جالعا الۋشىعا قاتىستى ءىستى مەملەكەتتىك كىرىستەر دەپارتامەنتىنە جىبەردى. ءنازيرا جارىمبەتوۆا