وزگەرىستەردىڭ ءوزى ومىرشەڭ

ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ەلىمىزدەگى مادەني سايا­سات تۇجىرىمداماسىنا ەنگىزىلگەن نەگىزگى جاڭالىقتار مەن ونى جۇزەگە اسىرۋ بارىسى تۋرالى تالقىلاندى. جيىنعا مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى ا.رايىمقۇلوۆا, ۇلتتىق مۋزەيدىڭ ديرەكتورى د. مىڭباي, قوعام قايراتكەرى, اكادەميك ع.ەسىم, رەجيسسەر, كينەماتوگرافيستەر وداعىنىڭ تەڭ توراعاسى ا. يبراەۆ قاتىستى. جيىندا ءسوز العان مادەنيەت جانە ونەر ىستەرى دەپارتامەنتىنىڭ ديرەكتورى اقتوتى رايىمقۇلوۆا مادەنيەت سالاسىنداعى مەنەدج­مەنتتى جاڭعىرتۋ مادەنيەت سالاسىن بيزنەس باستامالار ءۇشىن تارتىمدى ەتۋمەن تىعىز بايلانىستى ەكەنىن اتاپ ءوتتى. دەپارتامەنت ديرەكتورى مينيسترلىكتىڭ مادەنيەتتەردى جاقىنداستىرۋ ورتالىعىن قۇرعانىن, ورتالىق جۇمىسى ۇزدىك تاجىريبە, يۋنەسكو-نىڭ گۋمانيتارلىق قىرلارى مەن تۇراقتى مادەني دامۋ قاعيداتتارى نەگىزىندە ورتالىق ازيا ەلدەرىندە دىنارالىق سۇحبات پەن مادەني كوپتۇرلىلىكتى ساقتاۋ مەن دامىتۋعا باعىتتالعانىن باياندادى. – تۇجىرىمدامانىڭ باسە­كەگە قابىلەتتىلىكتى ارتتىرۋ مەن يننوۆاتسيالىق دامىتۋ بولىگىندە ەلىمىزدىڭ مۋزەيلەرىنە مۋلتيمەديالىق قۇرالداردى ەنگىزۋ تۋرالى ماسەلە قولعا الىنۋدا. سونداي-اق, 2015-2020 جىل­دارعا ارنالعان اۋقىمدى كينو جانە تەلەجوبالار سەرياسىن جاساۋ بويىنشا «ماڭگىلىك ەل» كەشەندى جوس­پارى ازىرلەنىپ, بەكىتىلدى.  كەشەندى جوسپاردى ىسكە اسىرۋ اياسىندا وزىق حالىقارالىق تاجىريبە ەسەبىمەن «قازاقفيلم» اق جۇمىسىن دامىتۋ تۇجىرىمداماسى ازىرلەندى», – دەدى ول. ءباسپاسوز ءماسليحاتىنا قاتىسقان ۇلتتىق مۋزەي­دىڭ ديرەكتورى دارحان مىڭباي مۋزەيدىڭ اۆتو­ماتتان­دىرىلعان جۇيەگە كوشىپ جاتقانىن حابارلادى. – بۇل جۇيەنىڭ نەگىزگى مىندەتى – جۇيەلەۋ, زەرتتەۋ, سيپاتتاۋ. تەك ۇلتتىق مۋزەيگە عانا ەمەس, جۇيەنىڭ ەلىمىزدىڭ بارلىق مۋزەيلەرىنە قاتىسى بار. بۇگىنگى كۇندە, ۇلتتىق مۋزەيدىڭ ايماقتىق مۋزەيلەرمەن بايلانىسى جولعا قويىلدى. ويتكەنى, ەلىمىزدىڭ بارلىق مۋزەيلەرىندە قۇندى جادىگەرلەر بارشىلىق. ءبىز ەكى ايدى سول ايماقتىق مۋزەيلەرگە ءبولىپ وتىرمىز. وسى ۋاقىتتا ولار ءوز جادىگەرلەرىن استانا جۇرتشىلىعىنا ۇسىنادى. سونداي-اق, «ۇلتتىق مۋزەي سەنىڭ قالاڭدا» دەگەن اكتسيا اياسىندا ءبىز «التىن ادامدى» ءاربىر وبلىس ورتالىعىنا اپارىپ كورسەتۋدى باستادىق, – دەدى ۇلتتىق مۋزەي ديرەكتورى. ال قازاقستان كينەماتو­گرافيستەر وداعىنىڭ تەڭ توراعاسى احات يبراەۆ قازاق كينوسىنىڭ اۋقىمدى كولەمدەگى توپتاماسىن ساندىق فورماتقا كوشىرۋ ماسەلەسى تالقىلانىپ جاتقانىن العا تارتتى. مەملەكەتتىك كينوفيلم قورىن دامىتۋداعى ءبىزدىڭ تۇجىرىمدامادا قازاق كينوسىنىڭ اۋقىمدى كولەمىن ساندىق فورماتقا كوشىرۋ تالقىلانۋدا. قازىرگى كەزدە قورداعى تۋىندىلاردىڭ ءبىر بولىگى ساندىق نۇسقادا بولسا, قالعاندارى تاسپادا ساقتاۋلى. ءبىز مىڭنان استام ءفيلمدى ساندىق پىشىمگە كوشىرۋدى جوسپارلادىق. ولاردىڭ اراسىندا دەرەكتى فيلمدەر دە بار, – دەدى ول. احات يبراەۆ ەلىمىزدە كينو سالاسىن دامىتۋدىڭ 2050 جىلعا دەيىنگى تۇجىرىمداماسىنىڭ دايارلانۋى كينو سالاسىندا سوڭعى بىرنەشە جىلدا ازىرلەنگەن ەڭ ماڭىزدى قۇجات ەكەنىن دە نازاردان تىس قالدىرمادى. ايگۇل سەيىلوۆا, «ەگەمەن قازاقستان»