ءومىردىڭ وزىنەن الىنعان سەريال

ورتالىق كوممۋنيكاتسيالار قىزمەتىنىڭ بريفينگى «قازاقستان» ۇلتتىق ارناسى جۋىردا عانا ەفيرگە شىعارعان «ايمان-شولپان» 100 سەريالى تەلەحيكاياسىنا ارنالدى. ۇلتتىق ارنا وتاندىق تەلە­حيكايا­لاردى ءتۇسى­رۋدى جىلدان جىلعا كوبەيتىپ كەلەدى. مى­سا­ل­مەن سويلەيىك, 2009 جىلى ءبىر سەريال ءتۇسى­رىل­گەن بولسا, قازىرگى كۇنگە دەيىن ءتۇسى­رىل­گەن تەلەحيكايانىڭ سانى 62-گە جەت­كەن. سە­ريا­مەن شاعىپ ەسەپتەيتىن بولساق – 1332 سەريا. بۇل ۇلتتىق ارنانىڭ ادى­مىن كەڭگە سالا باس­تاعانىنان حابار بەرە­دى. ءتىپ­تى قارا­پايىم كورەرمەننىڭ ءوزى سوڭ­عى جىل­دارى «قازاقستان» ارناسىنان كەش­كى ۋا­قىت­تا تەك قانا قازاق سەريالدارى بەرى­لە­تى­نىن اڭعارىپ ءجۇر. تەلەۆيزيا تىلىندە «پرايم-تايم» دەپ اتالاتىن كورەرمەنى كوپ كەشكى ۋاقىتتا, ياع­ني كەشكى توعىزدىڭ كەزىندە اپتاسىنا بەس كۇن وتاندىق تەلەحيكايالاردىڭ كورسەتىلۋى, تاڭەرتەڭ ونىڭ قايتالانىپ بەرىلۋى –  جاق­­سى­­لىقتىڭ نىشانى. بۇل جىلدان جىلعا وتان­­دىق سەريالداردىڭ دا قۋات الىپ كەلە جات­­قا­­نىن كورسەتەدى. كۇنى كەشە عانا ەفيرگە جول­­دا­­ما العان «ايمان-شولپان» – سونىڭ ايعاعى. بريفينگ بارىسىندا ءسوز العان «قازاق­ستان» رترك» اق باسقارما توراعاسى نۇر­جان مۇحامەدجانوۆا «ايمان-شول­پان­نان» بولەك, وسى جىلدىڭ سوڭىنا دەيىن ءتۇسىرىلىپ ءبىتۋى ءتيىس تاعى دا جەتى جوبا بار ەكە­نىن ايتتى. الداعى ۋاقىتتاردا «سۇيە بىلسەڭ», «قىزىل الما», «ىڭكار جۇرەك» (ەكىنشى ماۋسىمى), «شەكارا شەبىندە» سەكىل­دى تەلەحيكايالار كورەرمەندەرگە جول تار­تاتىن بولادى. سونداي-اق ۇلت­تىق ارنانىڭ جاڭا باعدارلاما­لارى «ويتولعاۋ», «قوعامدىق كەڭەس», «سۇحبات» تۋرالى دا باسقارما ءتور­اعاسى ايتىپ ءوتتى. «مىسالى, «سۇحبات» باعدار­لاماسىنا توقتالاتىن بولساق, بۇل قوعامدا ۇلكەن قىزىعۋشىلىق تۋعىزعان باعدارلامانىڭ ءبىرى بولدى دەپ ايتا الامىز. ول ءوزى اپتاسىنا ءبىر رەت شىعادى. وسى ۋاقىتقا دەيىن ەكى اداممەن سۇحبات وتكىزىلدى. سۇحبات بەرۋشىنىڭ ءبىرى – دەنساۋلىق ساقتاۋ جانە الەۋمەتتىك دامۋ ءمينيسترى دە, ەكىنشىسى – ءبىلىم جانە عىلىم ءمينيسترىنىڭ ورىنباسارى بولدى», دەدى نۇرجان جالاۋقىزى. ال ەندى «ايمان-شولپانعا» ورالاتىن بولساق, بۇل فيلم – دۇنيە ەسىگىن اشقان ساتتەن باستاپ ءومىر جول­دارى ەكى ايىرىلعان ەگىز قىزدار تۋرالى. سيۋجەت جەلىسىنە قىز­دار­دىڭ قوعامداعى ەكى ءتۇرلى ورنى, سودان تۋىن­دايتىن قاراما-قايشىلىقتى كوز­قاراس­تارى, ءتۇرلى توپتار اراسىنداعى كەلىس­پەۋ­شىلىكتەر ارقاۋ بولعان. ەكى وتباسى ار­قىلى تۋىنداپ جاتاتىن وقيعالاردىڭ شيە­لەنىسى كورەرمەندەردى وزىنە ەرىكسىز باۋراي­دى دەپ ويلايمىز. ونىڭ ۇستىنە باس­تى كەيىپكەردىڭ ءبىر مەزەتتە ەكى ءرولدى قاتار سومداۋى وتان­دىق تەلەسەريال تاري­حىندا العاش رەت ورىن الىپ وتىر. بۇل تۋرالى بريفينگ بارىسىندا باس­تى ءرولدى سومداعان سالتانات باقاەۆا بىلاي دەيدى: «مەن ءۇشىن بۇل ۇلكەن جوبا بولدى. ونىڭ الدىندا ءتۇسى­رىلىمدەرگە قاتىسقانمىن. باستى ءرولدى سوم­داۋىم ءبىرىنشى رەت. ءوزىن ءتۇرلى-ءتۇرلى قىرى­نان كورسەتۋ – ءار اكتريسانىڭ ارمانى. جيىندا تەلەحيكايانىڭ قويۋشى-رەجيسسەرلەرىنىڭ ءبىرى ارمان ساندى­باەۆ «ايمان-شولپاندا» وتباسى­لىق قۇندىلىق ناسيحاتتالعانىمەن, ماحاب­بات, ساتقىندىق, دەتەكتيۆ قاتار ورىلەتىنىن باياندادى. سونداي-اق تەلە­حيكايادا ەكى ءتۇسىرۋ توبىنىڭ قاتار جۇمىس ىستەگەنىن ايتتى. «بۇل فيلم مەن ءۇشىن كاسىبي دەبيۋت بولدى. ءبىز ءبىر-بىرىمىزبەن تاجىريبە الماستىق. ءار ادامنىڭ العا جاساعان قادامى تەلەيندۋستريا ءۇشىن ماڭىزدى», دەدى ول. جيىن سوڭىندا «قازاقستان» ۇلتتىق ارناسىنىڭ باسقارما توراعاسى ەگەر «ايمان-شولپاننىڭ» كورەرمەندەر تاراپىنان جوعارى رەيتينگكە قول جەتكىزسە, كەلەر جىلى ەكىنشى ماۋسىمى تۇسىرىلەتىنىن حابار­لادى. ويتكەنى بۇل ءۇردىس تەلەارنادا قا­لىپ­­تاس­قان. مىسالى, «ىڭكار جۇرەكتىڭ» بيىل ەكىنشى ماۋسىمى تۇسىرىلۋدە. «سىر­عالىم» تەلەحيكاياسى ءۇشىنشى رەت ءتۇسى­رىل­گەن. تاعى ءبىر ايتا كەتەتىنى, «سىرعالىم» تەلەحيكاياسىن تاتاردىڭ نتۆ تەلەارناسى ساتىپ الىپ, تاتار تىلىندە كورسەتىپ جاتىر. سول سەكىلدى «ايمان-شولپانعا» دا سۇرانىس بولىپ جاتسا, باسقا تەلەارنالارعا ساتۋعا دايار ەكەندىكتەرىن باسقارما توراعاسى اتاپ ءوتتى. ويتكەنى مەملەكەتتەن الىنىپ جاتقان قارجىلاردى ءتيىمدى جۇمساۋ, ۇلتتىق ارنانىڭ تابىس كولەمىن ۇلعايتۋ ماڭىزدى. بۇل تۇرعىدان كەلگەندە, بىل­تىر ۇلتتىق ارنا 5 ميلليون تەڭگە كولەمىندە تابىس تاپقان بولسا, ارنانىڭ بيىلعى تابىسى سەگىز ايدا 38 ميلليون تەڭگەنى قۇراعان. ايگۇل سەيىلوۆا, «ەگەمەن قازاقستان»