بالدىرعاندار بايقاۋى

بۇل كۇندە ونەرگە تالاسى بارلار كوپ-اق. شىن تالانت پەن ءانشى بولۋعا تالاپ­تانۋ­­دىڭ اراسى جەر مەن كوكتەي ەكەنى ءام­بەگە ايان. الايدا ءانشى بولىپ تۋعان ادام­­دى جورگەگىنەن تانىپ, دارىنداردى دەمەۋ قازىرگى ساحنا تارلاندارىنا, ءتاجى­ري­بەلى تۇلعالارعا دا امانات. وسىدان ءبىراز جىل بۇرىن كسرو حالىق ءارتيسى بيبىگۇل تولەگەنوۆا ءبىر بايقاۋدى باس­تاپ, كلاسسيكالىق ونەرگە بەيىم بىرقاتار جاستاردىڭ ۇلكەن ساحناعا جولداما الۋىنا سەپتىگىن تيگىزگەن ەدى. الماتىنى ءبىر اجارلاندىرىپ وتەتىن سول ونەر بايقاۋى بيىل سەگىزىنشى رەت وتپەك. قىركۇيەكتىڭ 19-27 ارالىعىندا وتەتىن بيبىگۇل تولەگەنوۆا ۆوكاليستەرىنىڭ VIII حالىقارالىق بايقاۋى بۇل جولى تاۋەل­سىزدىگىمىزدىڭ 25 جىلدىعى مەن الما­تى قالاسىنىڭ 1000 جىلدىعىنا ارنالماق. بايقاۋعا الەمنىڭ ءار شالعايىنان ايتۋلى مۋزىكانتتار قازىلىق ەتۋگە كەلەدى. ىرگەمىزدەگى قىرعىزستان, وزبەكستان, ودان ءارى ازەربايجان, ليتۆا, رەسەي, گەرمانيا, چەحيا, موڭعوليا, بولگاريا سىندى مەملەكەتتەردەن وپەرا سالاسىنا قۇلاش ۇرعان 65 ءانشى الماتىدا باس قوسادى. جوعارىدا اتاپ وتكەندەي, وسىناۋ اۋقىم­دى وقيعا جاس انشىلەردىڭ بيىك تال­عامىن, ونەرگە دەگەن تەرەڭ ءتۇسىنى­گىن قالىپتاستىرۋدى ماقسات ەتەدى. حالىق­ارا­لىق بايقاۋ جاس ونەرپازداردىڭ نازارىن كلاسسيكالىق جانە حالىق اندەرىنە اۋدارىپ, ولاردى ناعىز ونەردىڭ بۇلاعىنان سۋسىنداۋعا شاقىرادى. ءان سايىسى جاڭا تالانتتاردىڭ ەسىمىن انىقتاپ, ۇلتتىق كلاسسيكالىق ونەردى ۇلىقتاماق. بايقاۋ باعدارلاماسى دا بەكزات ونەر­دەگى بۇرىن-سوڭدى تاڭداۋلى تۋىن­دى­لارعا قۇرىلعان. وعان قوسا قازاق­­ستان كوم­پو­زيتورلارى شىعارماشى­لىعى­نان دا حا­لىق اندەرىنە ۇقساس تۋىندىلار ۇسى­نىلادى. ىرىكتەۋ كەزەڭى جانە فينالدىق سايىس جامبىل اتىنداعى مەملەكەتتىك فيلارمونيا زالىندا, ال اشىلۋ جانە جابىلۋ سالتاناتى اباي اتىنداعى مەملەكەتتىك وپەرا جانە بالەت تەاترىندا وتپەك. حالىقارالىق دەڭگەيدەگى ونەر مايتالماندارى كونكۋرس اياسىندا كەزدەسۋلەر وتكىزىپ, دارىندى جاستارمەن ديدارلاسىپ, تاجىريبە بولىسەدى. قاتىسۋ­شىلاردىڭ ونەرىن باعالاپ, ولاردىڭ ورىنداۋلارىنا قاتىستى جەكە-جەكە كوز­­قاراستارىن بىلدىرەدى. سونداي-اق جاس­تارعا باعالى اقىل-كەڭەستەرىن دە ايتادى. حالىقارالىق كونكۋرستىڭ باس سەرىكتەسى – «SAMRUK KAZYNA TRUST» الەۋمەتتىك جوبالاردى دامىتۋ قورى. ال ۇيىمداستىرۋشى – «ميراس» قوعام­دىق قورى. سونداي-اق ۆوكاليس­تەر­دىڭ حالىقارالىق بايقاۋىن وتكىزۋگە الماتى قالاسى اكىمدىگى قولداۋ ءبىلدىرىپ وتىر. ايناش ەسالي, «ەگەمەن قازاقستان» الماتى