جانىبەك ءالىمحان ۇلى كاسىپقوي بوكستا العاشقى كەزدەسۋىن وتكىزەدى

ريو وليمپياداسىندا ەلىمىزدىڭ نامىسىن لايىقتى قورعاعان جانىبەك ءالىمحان ۇلى جاقىندا كاسىپقوي بوكستاعى العاشقى كەزدەسۋىن وتكىزەدى. بيىل 29 قازانىندا الماتىدا WBA Fedelatin جانە WBA FideCaribe تۇجىرىمدارى بويىنشا الەم چەمپيونى قانات يسلامنىڭ كاسىپقوي بوكستاعى كەزەكتى جەكپە-جەگى وتەدى. ول گانالىق پاتريك اللوتەيمەن WBA (Interim) تۇجىرىمى بويىنشا ۋاقىتشا الەم چەمپيونى اتاعىنا تالاسادى. جانىبەك ءالىمحان ۇلىنىڭ كاسىپقوي بوكستاعى دەبيۋتتىك كەزدەسۋى اتالعان بوكس كەشى شەڭبەرىندە وتەدى. ودان بولەك, شارشى الاڭعا جانقوش تۇراروۆ, ايدار شارىپباەۆ, ايدوس ەربوسىن ۇلى, ءالي احمەدوۆ جانە رۋسلان مىرساتاەۆ شىعادى. اۋەسقوي بوكستان الەم چەمپيونى جانىبەك ءالىمحان ۇلى ءۇشىن بۇل اسا قيىن كەزدەسۋ بولماق. سەبەبى ونىڭ قارسىلاسى – كولۋمبيالىق ميلتون نۋنەز بۇعان دەيىن شارشى الاڭدا 50 كەزدەسۋ وتكىزىپ, ونىڭ 33-ىندە جەڭىسكە جەتكەن تاجىريبەلى بوكسشى. جانىبەك كاسىپقوي بوكسقا ءبىرجولا اۋىسۋ تۋرالى ناقتى شەشىم قابىلداماعان. ازىرگە ول ۇلتتىق قۇرامانىڭ دەمالىسىن پايدالانىپ, ءوزىن كاسىپقوي بوكستا ءبىر مارتە سىناپ كورۋدى ءجون ساناپ وتىر. ەگەمەن-اقپارات