1993
*25 قازاندا قازاقستانعا يران يسلام رەسپۋبليكاسىنىڭ پرەزيدەنتى الي اكبار حاشەمي-رافساندجاني رەسمي ساپارمەن كەلدى. نۇرسۇلتان نازارباەۆتىڭ وتكەن جىلعى كۇزدە يرانعا بارعان ساپارىنان كەيىن ەكىجاقتى بايلانىستار ءوزارا ءتيىمدى ىنتىماقتاستىقتىڭ بارعان سايىن جاڭا سالالارىن قامتي وتىرىپ, قارقىندى دامىپ كەلە جاتقاندىعى كەزدەسۋ بارىسىندا اتاپ ءوتىلدى. بۇل جونىندە «ەگەمەن قازاقستان» گازەتىنىڭ 26 قازان كۇنگى نومىرىندە «يرانمەن ءوزارا ءتيىمدى ىنتىماقتاستىق نىعايۋدا» اتتى ماقالا جاريالاندى.
*3 قاراشادا ماسكەۋدە وتكەن رەسەي مەن قازاقستان پرەمەر-مينيسترلەرىنىڭ كەزدەسۋىندە ەلىمىزدىڭ سوم ايماعىنان شىعاتىندىعى تۋرالى شەشىم حابارلاندى.
* 5 قاراشادا قازاقستان پرەزيدەنتىنىڭ «اقشا جۇيەسىن تۇراقتاندىرۋ جونىندەگى شۇعىل شارالار تۋرالى» جارلىعىنا قول قويىلدى. سونداي-اق بۇل كۇنى پرەزيدەنت ن.ءا.نازارباەۆ «بولاشاق» باعدارلاماسىن تاعايىندادى. وسى جىلى «بولاشاق» باعدارلاماسى بويىنشا شەتەلگە جاستاردى وقىتۋ باستالدى.
*12 قاراشادا پرەزيدەنتتىڭ «قازاقستان رەسپۋبليكاسىنىڭ ۇلتتىق ۆاليۋتاسىن ەنگىزۋ تۋرالى» جارلىعى شىقتى. وسى كۇنى تۇندە قازاقستان رەسپۋبليكاسى جوعارعى كەڭەسى مەن مينيسترلەر كابينەتىنىڭ «قازاقستان رەسپۋبليكاسى پرەزيدەنتىنىڭ ۇلتتىق ۆاليۋتا – تەڭگەنى ەنگىزۋ تۋرالى شەشىمى جونىندە» قاۋلىسى قابىلداندى.
* 13 قاراشادا پرەزيدەنت ن.ءا.نازارباەۆتىڭ «قازاقستان رەسپۋبليكاسىنىڭ ۇلتتىق ۆاليۋتاسىن ەنگىزۋ تۋرالى» جارلىعى مەن ەلباسىنىڭ قازاقستان رەسپۋبليكاسىنىڭ ازاماتتارىنا, بارلىق حالىقتارىنا ۇندەۋى «ەگەمەن قازاقستان» گازەتىندە جاريالاندى.
*15 قاراشادا قازاقستان رەسپۋبليكاسىنىڭ ۇلتتىق ۆاليۋتاسى – تەڭگە ەنگىزىلدى. وسى كەزگە دەيىن جاڭا ۆاليۋتانىڭ بانكنوتتارى مەن تيىندارى رەسپۋبليكانىڭ بارلىق وبلىستارى مەن اۋداندارىنا تاسىپ جەتكىزىلگەن بولاتىن.
*16 قاراشادا پرەزيدەنت نۇرسۇلتان نازارباەۆ اقش-تىڭ قازاقستانداعى ەلشىسى ۋيليام كورتنيدى ونىڭ ءوتىنىشى بويىنشا قابىلدادى. پرەزيدەنت بيلل كلينتوننىڭ قازاقستان باسشىسىنا جەكە حاتىن تاپسىرعان ەلشى اقش قازاقستاننىڭ ۇلتتىق ۆاليۋتا ەنگىزۋ تۋرالى شەشىمىن جاقتايتىنىن جانە حالىقارالىق قارجى ۇيىمدارى تاراپىنان كەڭ كولەمدە قولداۋ ۇيىمداستىرۋ جولىمەن ەلگە قاجەتتى كومەك كورسەتۋگە ءازىر ەكەندىگى تۋرالى حابارلادى.
* 19 قاراشادا ەلىمىزدىڭ ۆاليۋتا بيرجاسىندا اقش دوللارىنا كەزەكتى ساۋدا ءوتتى. ناتيجەسىندە 1 اقش دوللارىنىڭ بەلگىلەنگەن باعام دەڭگەيى 4 تەڭگە 68 تيىنعا تەڭ بولىپ شىقتى.
* 20 قاراشادا نۇرسۇلتان نازارباەۆقا «جىل ادامى» قۇرمەتتى اتاعى بەرىلگەنى تۋرالى حابار «ەگەمەن قازاقستان» گازەتىندە جاريالاندى. «رۋحانيات» حالىقارالىق قاۋىمداستىعى بۇل قۇرمەتتى اتاقتى قازاقستان باسشىسىنا تمد ەكونوميكالىق وداعىن قۇرۋعا, مەملەكەتتەر اراسىنداعى قاتىناستاردى تۇراقتاندىرۋعا, بەيبىتشىلىك پەن تاتۋ كورشىلىكتى جاقتاۋ ىسىنە قوسقان زور ۇلەسى ءۇشىن بەردى.
* 25 قاراشادا «توتەنشە جاعدايدىڭ قۇقىقتىق رەجيمى تۋرالى» قازاقستان رەسپۋبليكاسىنىڭ زاڭى «ەگەمەن قازاقستان» گازەتىندە جاريالاندى.
* 8 جەلتوقساندا پرەزيدەنت ن.ءا.نازارباەۆ مەملەكەتتىڭ تۇراقتى جۇمىس ىستەيتىن بىردەن-ءبىر زاڭ شىعارۋشى جانە جوعارى وكىلدى ورگان رەتىندەگى ءبىرىنشى سايلاناتىن قازاقستان رەسپۋبليكاسى جوعارعى كەڭەسى دەپۋتاتتارىنىڭ جانە قازاقستان رەسپۋبليكاسىنىڭ وبلىستىق, اۋداندىق جانە قالالىق وكىلەتتى ورگاندارى دەپۋتاتتارىنىڭ سايلاۋىن 1994 جىلعى 7 ناۋرىزعا تاعايىنداۋ جونىندە زاڭعا قول قويدى.
* 9 جەلتوقساندا «قازاقستان رەسپۋبليكاسى حالىق دەپۋتاتتارى جەرگىلىكتى كەڭەستەرىنىڭ وكىلەتتىگىن مەرزىمىنەن بۇرىن توقتاتۋ تۋرالى» زاڭعا پرەزيدەنت قول قويدى.
* 10 جەلتوقساندا جوعارعى كەڭەس ءوز وكىلەتتىگىن مەرزىمىنەن بۇرىن توقتاتۋ تۋرالى شەشىم قابىلدادى. پارلامەنت تارادى.
* 13 جەلتوقساندا اقش-تىڭ ۆيتسە-پرەزيدەنتى البەرت گور قازاقستانعا رەسمي ساپارمەن كەلدى. البەرت گور مەملەكەت باسشىسى نۇرسۇلتان نازارباەۆقا مۇحيتتىڭ ارعى جاعىنا رەسمي ساپار جاساۋعا اقش پرەزيدەنتىنىڭ شاقىرۋىن تاپسىرا وتىرىپ, بيلل كلينتوننىڭ پرەزيدەنت نۇرسۇلتان نازارباەۆپەن مۇمكىندىگىنشە جاقىنىراق تانىسقىسى كەلەتىنىن اتاپ ءوتتى.
* 16 جەلتوقساندا قازاقستان حالقى تاۋەلسىزدىك كۇنىن كەڭ كولەمدە اتاپ ءوتتى.
* 17 جەلتوقساندا مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا قازاقتاردىڭ دۇنيەجۇزىلىك قاۋىمداستىعىنىڭ تۇساۋكەسەر سالتاناتى وتكىزىلدى. جينالعاندار الدىندا قازاقستان پرەزيدەنتى, قاۋىمداستىقتىڭ قۇرمەتتى توراعاسى نۇرسۇلتان نازارباەۆ ءسوز سويلەدى.
* 22 جەلتوقساندا ەكىباستۇز-2 گرەس-ءىنىڭ ەكىنشى ەنەرگيا بلوگى ىسكە قوسىلدى. وسىعان وراي وتكىزىلگەن ميتينگىدە پرەزيدەنت نۇرسۇلتان نازارباەۆ بۇكىل رەسپۋبليكا ءۇشىن ماڭىزدى وقيعامەن ەنەرگيا قۇرىلىسشىلارىن, ەنەرگيا مونتاجشىلارىن جانە پايدالانۋشىلاردى قۇتتىقتاپ, بۇدان بىلاي جەلتوقساننىڭ 22-ءسى قازاقستان ەنەرگەتيكاسىنىڭ كاسىپتىك مەرەكەسى بولاتىندىعىن مالىمدەدى. بۇل تۋرالى «ەگەمەن قازاقستان» گازەتىنىڭ 24 جەلتوقسانداعى نومىرىندە «ەكىباستۇز قۋاتى – ەل قۋاتى» تاقىرىبىمەن ماقالا جارىق كوردى.
* 24 جەلتوقساندا اشعابادتا تمد ەلدەرى باسشىلارىنىڭ كەزەكتى كەزدەسۋى ءوتتى. پلەنارلىق ءماجىلىس 21 قۇجاتقا قول قويۋمەن اياقتالدى.
* 27 جەلتوقساندا اۋىل تۇرعىندارىنىڭ قاجەتىن نەعۇرلىم تولىق قاناعاتتاندىرۋ ماقساتىندا پرەزيدەنت ن.ءا.نازارباەۆ «سەلولىق جەردىڭ تاۋار ءوندىرۋشىلەرى مەن حالقىنا قىزمەت كورسەتۋدى جاقسارتۋ شارالارى تۋرالى» جارلىققا قول قويدى. قازاقستان رەسپۋبليكاسى تۇتىنۋ قوعامدارى وداعىنىڭ سەلو حالقىنا قىزمەت كورسەتۋدى جاقسارتۋ جانە كووپەراتيۆتىك ۇيىمدار قىزمەتىنىڭ اياسىن كەڭەيتۋ جونىندەگى باعدارلاماسى ماقۇلداندى.
