كوميسسيا جۇمىسى قورىتىندىلاندى

وبلىس اكىمى بەردىبەك ساپارباەۆ جەر كودەكسىنە وزگەرىستەر مەن تولىقتىرۋلار ەنگىزىلۋىنە بايلانىستى قۇرىلعان ۇشجاقتى كوميسسيانىڭ مۇشەلەرىمەن كەزدەسىپ, ولاردىڭ بەلسەندى ءىس-قيمىلىنا  ريزاشىلىعىن ءبىلدىردى. ءتۇيىپ ايتقاندا, ءوڭىر باسشىسىنىڭ تاپسىرماسىنا وراي, جەر كودەكسىنە وزگەرىستەر مەن تولىقتىرۋلار ەنگىزىلۋىنە بايلانىستى ەلىمىزدە ءبىرىنشى بولىپ, اقتوبە وبلى­سىندا جەر كودەكسىنىڭ نورمالارىن تالقىلاپ, ءوز ۇسى­نىس­تارىن ەنگىزۋ ءۇشىن ۇشجاقتى كوميسسياسى قۇرىلعان ەدى.  كوميسسيا مۇشەلەرى اقتوبە قالاسىندا جانە وبلىس اۋداندارىندا جەر رەفورماسىنىڭ نەگىزگى نورمالارىن جانە بيلىكتىڭ وسى ماسەلەگە وراي جاعدايدى تۇراقتاندىرۋدا اتقارىپ جاتقان شارالارى بو­يىنشا بىرلەسكەن ءتۇسىندىرۋ جۇمىستارىن جۇرگىزدى. كوميسسيانىڭ جۇمىسى ناتيجەلى بولۋى ءۇشىن اۋدان ورتالىقتارىندا جانە اقتوبە قالاسىن­دا ازاماتتاردى قابىلداۋ پۋنكتتەرى جۇمىس ىستەدى. ءوڭىر باسشىسى جەر ماسەلەسىن تالقىلاۋدا, حالىق اراسىندا تۇسىنىك جۇمىستارىن جۇرگىزۋدە ءۇش ايدان استام جۇمىس ىستەگەن كوميسسيا قىزمەتىنە وڭ باعا بەردى. كوميسسيا مۇشەلەرى ەستاي جايلىباەۆ, ىزىمعالي كوبەنوۆ, كوشكىنباي احمەتوۆ ءوز كەزەگىندە وبلىس اكىمىنە كوميسسيا قۇرۋ تۋرالى دەر كەزىندە شەشىم شىعارىپ, بۇل پروبلەماعا ەرەكشە نازار اۋدارىپ, ونىڭ جۇمىسىنا قولداۋ كورسەتكەنى ءۇشىن العىستارىن ءبىلدىردى. – ءبىزدىڭ كوميسسيا ءوز جۇمىسىندا جاقسى ءناتي­جەلەر كورسەتتى. ءبىز سىزگە بۇل ماسەلەگە قاتىستى قولداۋ جاساعانىڭىز ءۇشىن ىقىلاس سەزىمىمىزدى بىلدىرەمىز, – دەدى ەستاي جايلىباەۆ. كوشكىنباي احمەتوۆتىڭ ايتۋىنشا, رەسپۋبليكالىق كوميسسيادا قابىلدانعان 10 شەشىمنىڭ 9-ى اقتوبەلىك بەلسەندىلەردىڭ ۇسىنىستارى ەكەن. – ءبىزدىڭ نەگىزگى مىندەتىمىز – حالىقتىڭ ءال-اۋقاتىن جاقسارتۋ ءۇشىن بارلىق جاعدايدى جاساۋ. بۇل  – مەملەكەت باسشىسىنىڭ تاپسىرماسى. ءبىز ءوز تاراپىمىزدان بۇل مىندەتتى شەشۋ ءۇشىن بارلىق مۇمكىندىكتەردى ويلاس­تىرامىز. كوميسسيا الدا دا جۇمىس ىستەيتىن بولادى. حالىقتىڭ تاعدىرىنا بەيجاي قاراي المايتىن جاندارمەن جۇمىس ىستەۋ ماعان ۇنايدى, سىزدەرمەن باسقا دا ماڭىزدى ماسەلەلەر بويىنشا بىرلەسىپ جۇمىس ىستەيتىن بولامىز, – دەدى بەردىبەك ساپارباەۆ. ءوڭىر باسشىسى كوميسسيا مۇشەلەرىنە جەر ماسەلەسىنە قاتىستى بەلسەندى جۇمىستارى ءۇشىن العىس حاتتار تاپسىردى. ساتىبالدى ءساۋىرباي, «ەگەمەن قازاقستان» اقتوبە وبلىسى