شاكارىمنىڭ نەمەرەسى دۇنيەدەن ءوتتى

2016 جىلعى 19 قىركۇيەكتە قازاقتىڭ ۇلى اقىن-ويشىلى شاكارىم قۇدايبەردى ۇلىنىڭ نەمەرەسى, الماتى وبلىسىنىڭ تالعار اۋدانىنداعى بەساعاش اۋىلىنىڭ تۇرعىنى, اسىلدىڭ سىنىعى مەرەكە زيات ۇلى 78 جاسىندا دۇنيەدەن ءوتتى. مەرەكە زيات ۇلى شاكارىمنىڭ نەمەرەسى. زيات ەل باسىنا زوبالاڭ تۇسكەن, شاكارىم ۇر­پاقتارى قۋعىنعا ۇشىراعان كەزدە اكەسىنىڭ ۇيعارۋىمەن قىتايعا كوشۋىنە تۋرا كەلەدى. 1937 جىلى شىڭجاڭداعى حالىقتىڭ بەتكە ۇستار ينتەلليگەنتسياسىن جاپپاي ۇستاپ, قىرعىنعا ۇشىراتقان ۋاقىتتا ەل جاقسىلارىمەن بىرگە تۇتقىندالادى. مەرەكە اكەسى تۇتقىندالعاندا ىشتە قالعان بالا ەكەن. ول 1938 جىلى 8 ءساۋىر­دە قىتايدا دۇنيەگە كەلدى. اناسى مۋنيرا سەيىتقازىقىزى نۇرتاەۆا ۇرىمجىدە ورىسشا وقىپ, قىتاي, ۇيعىر تىلدەرىن دە جەتىك مەڭگەرگەن بولاتىن. التايداعى سارىسۇمبە قالاسىندا مۇعالىم قىزمەتىن اتقارعان كوزى اشىق, ءبىلىمدار ەدى. مەرەكە اناسىنىڭ كومەگىمەن العاش حات تانىپ, ساۋاتىن اشادى. مۋنيرا سەيىتقازىقىزى 1946 جىلى سۇزەك اۋرۋىنان قايتىس بولعاننان كەيىن مەرەكە اكەسىمەن بىرگە قىتايعا كەلگەن تۋىسى تاكەجاننىڭ ءازىمبايىنىڭ بالاسى بەردەشتىڭ قولىندا بولادى. ول 1955 جىلى 10 مامىردا زايسانعا قونىس اۋدارادى. 1956 جىلى تامىز ايىندا جان-جاقتاعى تۋىستارىن ىزدەپ جۇرگەن اعاسى احات شاكارىم ۇلى مەرەكەنى تالعارعا اكەلدى. مەرەكە زيات ۇلى كراسنويارسك ولكەسىندە ءۇش جىل اسكەري بورىشىن وتەيدى. الماتى وبلىسىندا زەينەتكەرلىككە دەيىن اۋىل شارۋاشىلىعىندا جۇمىس اتقارادى. كەيىنىرەك تۋعان جەرى شىڭعىستاۋعا ءجيى كەلىپ تۇرعان. زايىبى كلارا مۇقانقىزى ەكەۋى نۇرلان, گاۋھار, مەرۋەرت, ساۋلە ەسىمدى بالالارىن تاربيەلەپ ءوسىردى. مەرەكە زيات ۇلىنىڭ كەڭپەيىلدىگى, پارا­ساتتىلىعى جانە زيالىلىعىمەن ەرەكشەلەنگەن جارقىن بەينەسى ءبىزدىڭ جادىمىزدا ءاردايىم ساقتالادى. مارقۇمنىڭ تۋعان-تۋىستارىنا قايعىلارىنا ورتاقتاسىپ كوڭىل ايتامىز. جاتقان جەرى جايلى بولىپ, رۋحى پەيىشتە شالقىسىن. ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۇراجايىنىڭ ۇجىمى