ءتورت عاسىر ساقتالعان ساۋىت

وتكەنسىز بۇگىن, بۇگىنسىز ەرتەڭ بولماسى انىق. ەل تاۋەلسىزدىگىنىڭ 25 جىلدىق مەرەكەسى قارساڭىن­دا ارال اۋدانىنداعى ەلدىمە­كەن­دەردىڭ بىرىنەن XVI عاسىردىڭ سوڭعى شيرەگىندە عۇمىر كەشكەن, ۇلت بوستاندىعى جولىندا سەكسەن جاستان اسقانشا ات ءۇستى­نەن تۇسپەگەن ايداربەك باتىر ءورىس­ ۇلىنىڭ اق ساۋىتى تابىلدى. ءتورت عاسىردان استام ۋاقىت بويى اتادان بالاعا, ۇرپاقتان-ۇرپاققا اسىلدىڭ كوزىندەي, اقيقاتتىڭ وزىندەي بولىپ جەتكەن باتىر بابا ساۋىتى قازىر ارال قالاسىنداعى ۇرپاقتارىنىڭ ءبىرى, زەينەتكەر جەتكەرگەن نۇرعابىلوۆتىڭ قولىندا ساقتاۋلى ەكەن. ول كىسىنىڭ ايتۋىنشا, تازا بولاتتان جاسالعان تور كوزدى بۇل ساۋىتتىڭ سالماعى 10 كيلو. بۇرىن ۇلكەن بولعان ەكەن. ۋاقىت تەزىنە شىداماي ەتەك تۇسى قيىلىپ, ەپتەپ ب ۇلىنسە دە ءمىنى قۇرىماي بۇگىنگە جەتكەن ساۋىتتىڭ ەل تاريحىنىڭ ءبىر بولشەگى ەكەنى اقيقات. تەك زەرتتەۋشىلەرى تابىلىپ, ەجەي-تەگجەيلى ساراپتاسا, نۇر ۇستىنە نۇر بولار ەدى. وتكەن جىلى قازاق حاندىعىنىڭ 550 جىلدىعىنا وراي ۇرپاقتارى باتىر رۋحىن ۇلىقتاۋ ماقساتىندا ات ۇستىندەگى ەڭسەلى ەسكەرتكىشىن اسقاقتاتىپ, تاريحي-تانىمدىق كىتاپ شىعاردى, ات شاپتىرىپ اس بەر­گەن بولاتىن. ەندى مىنە, باتىر­دىڭ ءتورت ءجۇز جىلدان استام ۋاقىت بويى ساقتالىپ كەلگەن اق ساۋىتى تابىلىپ وشكەنىمىز جانعانداي بولدى. بۇل جاس ۇرپاقتى وتانشىلدىققا, ەرلىككە, ەلدىككە باۋليتىن ناعىز قۇندى جادىگەر ەكەنى داۋسىز. الداعى ۋاقىتتا باتىر بابا ساۋىتى جەرگىلىكتى مۇراجايلارعا ساقتاۋعا تاپسىرىلاتىن بولادى. ءسويتىپ, وتكەن عاسىرلاردان جەتكەن باعا جەتپەس مۇرا كوپشىلىك كوزايىمىنا اينالماق.  تولىباي ابىلاەۆ, قازاقستان جازۋشىلار وداعىنىڭ مۇشەسى  قىزىلوردا