پرەمەر-مينيستر باقىتجان ساعىنتاەۆتىڭ توراعالىعىمەن ۇكىمەت وتىرىسى ءوتتى. وندا الەۋمەتتىك ماڭىزى بار تاۋارلار باعاسىنىڭ قىمباتتاۋ سەبەپتەرى ايتىلدى.
كۇن تارتىبىندەگى ماسەلە بويىنشا بايانداعان ۇلتتىق ەكونوميكا ءمينيسترى قۋاندىق بيشىمباەۆ ازىق-ت ۇلىك تاۋارلارىنىڭ قىمباتتاۋ سەبەپتەرىن ءتۇسىندىردى.
«ۇلتتىق ەكونوميكا مينيسترلىگى نارىقتار تەڭگەرىمىنە تالداۋ جۇرگىزدى, ناتيجەسىندە ىشكى نارىقتاعى الەۋمەتتىك ءمانى بار تاۋارلار باعاسىنىڭ وسۋىنە اسەر ەتەتىن بىرقاتار سەبەپتەر انىقتالدى. ءبىرىنشىسى – الەمدىك نارىقتارداعى باعا جاعداياتىنىڭ وزگەرۋى جانە ۇلتتىق ۆاليۋتانىڭ السىرەۋى يمپورتتىق جەتكىزۋلەرگە تاۋەلدى تاۋارلارعا اسەر ەتتى. ولار بويىنشا وتاندىق تاۋارلاردى تۇتىنۋدىڭ قامتاماسىز ەتىلۋى 60 پايىزدان تومەن», – دەدى ق.بيشىمباەۆ. مينيستر سونداي-اق, بۇعان اعىمداعى جىلى تابيعي مونوپوليالاردىڭ قىزمەتتەرىنە تاريفتەردىڭ جانە ججم باعاسىنىڭ ارتۋى دا ىقپال ەتىپ وتىرعانىن اتاپ ءوتتى. تاعى ءبىر سەبەپ ماۋسىمدىق اۋىتقۋدىڭ اسەرى.
«جىل سايىن تاۋاردىڭ جەكەلەگەن تۇرلەرى بويىنشا قويماداعى قوردىڭ ازايۋىنا بايلانىستى ولاردىڭ باعاسى قۇبىلىپ تۇرادى. بۇل ەڭ الدىمەن كوكونىستەر – كارتوپ, ءسابىز, پياز, قىرىققابات, قىزىلشا. باعا ادەتتە, مامىر-تامىز ايلارىندا كوتەرىلەدى», – دەدى مينيستر. ءتورتىنشى سەبەپ – ەكسپورتتىق جەتكىزۋدىڭ اسەرى. ەۋرازيالىق ەكونوميكالىق وداق اياسىندا, رەسەي مەن قىرعىزستاننىڭ شەكارا ماڭىنداعى باعالاردىڭ وسكەن جاعدايدا ىشكى نارىقتاعى تاۋارلار قۇنى دا كوتەرىلەدى. ق.بيشىمباەۆتىڭ مالىمدەۋىنشە, بۇگىنگى تاڭدا جوعارىدا اتالعان فاكتورلار باعانىڭ وسۋىنە اسەر ەتتى, جىل سوڭىنا دەيىن ايتارلىقتاي ءوسىم بولمايدى دەپ كۇتىلۋدە.
رەسمي مالىمەتتەرگە سۇيەنسەك, جىل باسىنان باستاپ تۇتىنۋ باعاسىنىڭ يندەكسى 5,4 پايىزعا, ونىڭ ىشىندە ازىق-ت ۇلىك تاۋارلار 5,2 پايىزعا ءوستى. 2016 جىلعى 30 تامىزداعى جاعداي بويىنشا جىل باسىنان الەۋمەتتىك ماڭىزى بار ازىق-ت ۇلىك تاۋارلارىنا باعا يندەكسى 9 پايىزدى قۇرادى.
ۇكىمەت وتىرىسىندا نەگىزىنەن بەس ماسەلە قارالعان بولاتىن. ايتالىق, الەۋمەتتىك ماڭىزى بار ازىق ت ۇلىك تاۋارلارىنىڭ باعاسىن تۇراقتاندىرۋ, جۇمىسپەن قامتۋ, مەملەكەتتىك قىزمەت كورسەتۋ سالاسىن ارتتىرۋ, الداعى جىلىتۋ ماۋسىمىنا دايىندىق جانە ەگىن جيناۋ ناۋقانى تالقىلاندى.
دينارا بىتىكوۆا
