سال بولىپ اۋىراتىن بالا يليا يلين سياقتى بولۋدى ارماندايدى

استانانىڭ 10 جاسار تۇرعىنى ءامىر قۇسا­يىنوۆ­تىڭ ارمانى – اتاعى جەر جارعان سپورتشى بولىپ, بايراقتى باسەكەدە توپ جارىپ, چەمپيون اتانىپ, ەلىمىزدىڭ ءانۇرانىن ويناتىپ, كوك تۋىن بيىككە كوتەرتۋ. قاي بالانى دا نەبىر اسقاق ارماندار العا جەتەلەيتىن شىعار, ال ءامىردىڭ جاعدايىندا مۇنى اتا-انا مەن بارشا جاقىن-جۋىق قوسىلا تىلەيتىن ەرەكشە قۇبىلىس, ءتىپتى مۇعجيزا دەۋگە بولادى. ويتكەنى ءامىر بالالاردىڭ تسەرەبرالدى سال اۋرۋىمەن اۋىرادى. ال ونى وسى ۇكىلى ارمانعا جەتەلەۋشى – «BI-جۇلدىزاي» كورپوراتيۆتىك قايىرىمدىلىق قورى. ءامىردىڭ اناسى جازيرانىڭ ايتۋىنشا, «ءامىر ءومىر ەسىگىن اشقاندا العان جاراقاتتان زاقىمدانىپ, بالالاردىڭ تسەرەبرالدى سال اۋرۋىنا شالدىقتى. ەمدەلۋ ءۇشىن بارماعان جەرىمىز جوق, شەتەلگە دە جۇگىندىك, بىراق ايتار­لىق­تاي ناتيجە بولمادى. سودان 7 جاسقا دەيىن بالام­دى ءدارى-دارمەكتەرمەن ەمدەپ-ەمدەپ, اقىرى ءۇمىت جەتەلەپ وسى ورتالىققا كەلىپ, 3 جىلدان بەرى مامانداردىڭ كومەگىنە جۇگىننەن باستاپ, ءتىل تيمە­سىن, ءامىردىڭ جاعدايى كادىمگىدەي جاقساردى. قازىر ليتسەيدە, گيمنازيالىق 4 سىنىپتا وقىپ ءجۇر, ۇلگەرىمى دە جاقسى. ۇستازدارى باعدارلامانى جاقسى يگەرەدى, وعان وزگە بالالارعا قويعانداي تالاپ قويامىز, بارلىعىن ورىندايدى», دەيدى. ءبىزدىڭ ويىمىز ءامىردى ومىرگە بەيىمدەۋ, ەلدىڭ ءبارى اتا-انا ءتارىزدى ەمەس, ءومىردىڭ بۇرالاڭ­دى جولدارىندا, مىنا قوعامدا بارلىعى بىردەي باستان سيپاي بەرمەيدى عوي, سودان ەرتەڭ الەۋ­مەتتىك ورتادا قاتارىنان قالىپ قويم­اسىن دەيمىز. ال ونىڭ ءوزىنىڭ دە قۇلشىنىسى كەرەمەت, قازاق­ستاندىق ۇزدىك سپورتشىلاردى قاداعالاپ, جەڭىستەرىنە قۋانىپ, سولارداي بولسام دەپ ارمان­دايدى. وسىنىڭ بارلىعى ورتالىق مامان­دارىنىڭ, امىرمەن كۇندەلىكتى جاتتىعۋ جاسايتىن نۇسقاۋشى سادىق بايىمبەتوۆتىڭ ارقاسى. وتكەندە ءامىردىڭ جاتتىعۋلارىن بەينەتاسپاعا ءتۇسىرىپ, وليمپيادا چەمپيونى يليا يلينگە كورسەتكەن ەكەن, يليا باتىر ازاماتتىق جاساپ, ورتالىققا ارنايى كەلىپ, امىرگە ۇلكەن قۋانىش سىيلادى. ءامىردىڭ ارمانى – ەلگە تانىمال اتاقتى ازامات بولۋ دەپ ءوز ءۇمىتىن دە ورتاعا سالدى. ءامىردىڭ ءوزىن سوزگە تارتقاندا : «يليا يلين – مەنىڭ كۋميرىم. العاشىندا ساعان يلين كەلەدى دەگەنگە نانا المادىم. بىراق ول شىنىمەن دە كەلدى. سونداي قاتتى قۋاندىم جانە ول ماعان اۋرۋدى جەڭىپ, شىنىعىپ جۇرگەنىمدى, شتانگا كوتەرگەنىمدى ماقتاپ, التىن مەدال بەردى. ءوزىنىڭ قالاي جاتتىعاتىنىن ايتتى. مەن قازىر سادىق اعا بەرگەن اۋىر گىردى كوتەرىپ ءجۇرمىن, ال ۇلكەن بولعانىمدا يليا ءتارىزدى شتانگا كوتەرەمىن. سىنىپتاستارىم ماعان يليانىڭ مەدال بەرگەنىنە نانبايدى. ول مەنىڭ ەڭ ءبىرىنشى مەدالىم بولعاسىن, تورگە ءىلىپ قويعانىمدى ايت­تىم. ەندى يلينمەن تۇسكەن فوتومدى كورسە­تە­مىن, سوندا قالاي نانباس ەكەن», – دەيدى. بيزنەستىڭ الەۋمەتتىك جاۋاپكەرشىلىگى جايىن­داعى ءسوز ءجيى اڭگىمە وزەگىنە اينالادى. الايدا بيزنەستىڭ الەۋمەتكە جاسار شاراپاتى كوپ رەتتە ءبىر رەت كورسەتىلگەن كومەكپەن, الدەبىر شارا­نى جان-جاقتان تىلشىلەر شاقىرىپ, جالپاق جۇرت­قا جاريا ەتىپ, دابىرلاتىپ وتكىزۋمەن شەكتەلىپ جاتادى. ال كۇن سايىن, جىلدار بويى­نا مۇگەدەك بالالاردى قاتارعا قوسۋدا تىن­باي ەڭبەكتەنۋ ناعىز ىزگى جۇرەكتىلىكتى, الەۋ­مەت الدىنداعى شىنايى جاۋاپكەرشىلىكتى كورسەتەدى ەمەس پە؟! BI Group كومپانياسىنىڭ كورپو­راتيۆتىك قولداۋىمەن قۇرىلعان «BI-جۇلدىزاي» كق كومەگىمەن بىلتىرعى جىلى ءامىر ءتارىزدى اۋىراتىن 100 بالاعا وتا جاسالىپ, 287 بالا ورتالىقتىڭ كومەگىنە جۇگىنىپتى. ال بيىلعى جىل ولاردىڭ قاراسى ەداۋىر ۇلعايعان. 560-تان استام بالانىڭ ەرتەڭىنە ءۇمىت وتى جاعىلعان. اشىلعاننان بەرگى 11 جىل بويىنا «BI-جۇلدىزاي» كق ءتۇرلى مۇگەدەك بالالارى بار قي­نال­عان اتا-اناعا قارلىعاشتىڭ قاناتىمەن سۋ سەپ­كەنىندەي, ولارمەن بىرگە قينالىپ, قيىندى­عىن بىرگە كوتەرىسۋدە ەكەن. بىزگە تەك تسەرەبرالدى سال اۋرۋىنا شالدىققاندار ەمەس, داۋن اۋرۋى, تۇتىق­پا-كەكەش, گيدروتسەفاليا, سكاليوز, ماي­تابانعا ۇشىراعان بالالار دا كەلەدى, ولاردىڭ ارقايسىنا جەكە-جەكە دەنەنى شىنىقتىراتىن جاتتىعۋ, سىلاۋ جاسالىپ, پسيحولوگ, دەفەكتولوگ پەن لوگوپەد سىندى ماماندار جۇمىس ىستەيدى. بىزگە العاش كەلگەندە اتا-انا جۇيكەسى جۇقارىپ, ومىرگە نالا ايتىپ كىرەتىن بولسا, قازىر ءوزىڭىز كورگەندەي جايماشۋاق, بالالارىن مامانداردىڭ قولىنا تاپسىرىپ كۇتىپ وتىرادى. ەڭ باستىسى, وزىندە دە, بالاسىندا دا بىزگە دەگەن, وزدەرىنىڭ قيىندىقتارىنىڭ ارتتا قالاتىنىنا دەگەن سەنىم ۇيالايدى. سەنەسىز بە, ءبىز جىلدا تۇساۋكەسەر ءراسىمىن سالتاناتتى جاعدايدا وتكىزەمىز. كوزىڭىزگە ەلەستەتىپ كورىڭىزشى, ولار 2 جاس پەن 12 جاس ارالىعىنداعى بالالار. ومىرىندە اياعىن جەرگە تىرەي الماعان بالاسىنىڭ قادام باسقانىن كورگەندەگى اتا-انانىڭ قۋانىشى قانداي؟! سول ءساتتى كورۋ ءۇشىن عانا نەشە جىل تەر توگۋگە بولا­دى ەمەس پە؟! جانە ولاردىڭ اربىرەۋىنىڭ ارتىن­دا قانشاما كوز جاسى, ۇيقىسىز تۇندەر, توگىل­گەن تەر مەن قاجىر قايرات بار دەسەڭىزشى دەپ بىزبەن اڭگىمەلەسكەن ورتالىق قىزمەتكەرى التى­ناي مۇراتجانقىزى: «بالالاردى نەعۇرلىم ەرتە­رەك اكەلسە, سوعۇرلىم ناتيجەسى دە جاقسى, ال سۇيەك قاتىڭقىراپ كەتكەندە قيىنىراق. دەمەۋ­شى­لەرى­مىزدىڭ كومەگىمەن قىتاي, گەرمانيا, چەحيا, رەسەي, ليتۆادان شاقىرىلعان اسا جوعارى ساناتتاعى پروفەسسور, دوكتورلار كەلىپ قانشاما بالاعا وتا جاسادى. №2 قالالىق اۋرۋحانادا وتا جاسالادى دەپ كەزەكتە تۇرعان بالانى الدىمەن وزىمىزدە ەمدىك دەنەشىنىقتىرۋ جاتتىعۋلارىمەن الدىن الا دايىندايمىز. ايتپەسە جىلداپ قيمىل كورمەگەن بۇلشىق ەتتەرگە قانشا وتا جاسالسا دا وڭ وزگەرىس بولا بەرمەيدى. سوندىقتان ءبىز وتانىڭ الدىندا دا, سودان كەيىن دە ساۋىقتىرىپ, قاتارعا قوسۋمەن جۇيەلى تۇردە اينالىسامىز. قۇدايعا شۇكىر, جاقىندا تاعى ءبىر توپ بالانى وتاعا دايىنداپ, ەندى ءبىر توبىنىڭ تۇساۋىن كەسپەكشىمىز. بۇل – ءبىزدىڭ ۇلكەن قۋانىشىمىز. جالپى ەۋروپا ەلدەرىندە قازىر بىزدەردەگىدەي بالالار مۇگەدەكتىگى جوق, ولاردى كىشكەنتاي كۇنىنەن وسىنداي ورتالىقتاردا ساۋىقتىرۋمەن اينالىسىپ, ولاردى الەۋمەتتىك ورتاعا كىرىكتىرىپ جىبەرگەن», دەيدى. ورتالىقتىڭ قىزمەتىنە ەندى ءبىر جۇگىنۋشى گۇلزيرانىڭ ەكى بالاسىنىڭ ەكەۋى دە مۇگەدەك: «قىزىم تۋعاننان مۇگەدەك. بۋىنىن مۇلدە ۇستاي الماي بىلق-سىلق ەتەتىن. الىپ كەلگەنىمدە دارىگەرلەر شوشىپ كەتكەن, ەندى قازىر وتىرا الاتىن جاعدايعا جەتتى, ال ۇلىم ەڭبەكتەۋگە تال­پىنۋدا, وسىنىڭ بارىنە اينالدىرعان 8 ايدىڭ ءىشىن­­دە قول جەتتى. شۇكىر, بالاپاندارىم ءجۇرىپ كەت­سە ارمانىم جوق, قازىرگى كورگەن قيىندىعىم كور­­گەن تۇستەي بولار. پاتەرىمىز جوق, كەيدە ءتىپتى ىشەر تاماعىمىزدى دا تابا الماي قالاتىن كۇن­دە­رى­­مىز كوپ, الايدا سونىڭ ءبارىن ەلەمەس ەدىم, با­لا­­­پان­­­دارىم ءوز اياقتارىمەن ءجۇرىپ كەتسە», دەيدى. ال ءامىردىڭ سادىق اعاسى: «ەڭ الدىمەن اتا-انامەن ءتىل تابىسۋ قاجەت. باسىنا تاۋقىمەت تۇسكەن, باۋىر ەتى بالاسىنىڭ قينالعانىن كورىپ, كومەكتەسە الماعان اتا-انادا قاي ءجوندى جۇيكە بولادى. شىرتىلداپ, ءسال شەرتىپ قالساڭ جارىلايىن دەپ تۇرادى. كەيدە باسىڭنان ءسوز اسىرىپ, ۇندەمەي قالىپ, كەيدە كىشكەنتاي ءبىر تابىسىنا ماقتاپ قويماساڭ جانە ەڭ الدىمەن بالالاردى جاقسى كورمەسەڭ, ولاردىڭ جانىنىڭ اۋىرعانىنا, مۇشكىل حالىنە دەگەن اياۋشىلىق پەن جاناشىرلىق تابا الماساڭ, بۇل جەرگە جۇمىس ىستەيمىن دەپ كەلىپ تە كەرەگى جوق. ءامىردىڭ بويىندا سپورت­قا دەگەن قىزىعۋشىلىق پەن تاباندىلىق بار, شتانگاعا قاراعاندا كوزى جانادى. سونى كورىپ اناسىنا: «ەگەر مەن امىرگە كۇندەگىدەن 10-15 مينۋت ارتىعىراق ۋاقىت بولسەم, ءسىز توسا الاسىز با؟» دەسەم, ول كىسى: «جاقسى, اسىقپاي كۇتەمىن», دەدى. بىردە امىرگە: «كانە, كوتەرشى, مەن سەنىڭ قانداي مىقتى ەكەنىڭدى كۋميرىڭە كور­سەت­ەمىن»,  دەپ قالتافونىما ءتۇسىرىپ الدىم. كەزەك­تى جات­تىعۋعا سپورت كەشەنىنە بارعاندا يليا­نى كورىپ قالدىم دا سالەمدەسىپ, جاعدايدى ءتۇسىن­دىر­دىم. ءسوزبۇي­داعا سالماي, سول جەردە بىردەن بەينە سالەم جولداپ: «ءامىر, جارايسىڭ, مەن جاقىن ارادا ساعان مىندەتتى تۇردە بارامىن», دەدى. ناعىز ەر جىگىت. كەلىپ بالالاردى قولداپ, ولارمەن وتىرىپ اڭگى­مە­لەسىپ, رۋح بەرىپ كەتتى. الدا بولا­تىن تۇساۋ­كە­سەرگە يليا باتىردى شاقىرعالى وتىرمىز», دەدى. جۇلدىزايلىقتاردىڭ نەبارى 200 شارشى مەتردى الىپ جاتقان ورىنجايىنان ءتۇرلى وي ارقا­لاپ جۇمىسىما ورالدىم. قانشاما جاقسى ىستەر اتقارىپ جاتقان, قايىرىم مەن ىزگىلىكتىڭ وشاعىنا وتىرعان ورنى تارلىق ەتەدى ەكەن. BI Group كومپانياسىندا جۇمىس ىستەيتىن بارلىق ادام اي سايىن ەڭبەكاقىلارىنان بولگەن جارنا نەگىزىندە بالالارعا كومەكتەسىپ جاتقان ورتالىقتى وزگەلەر دەمەسە دە ارتىق ەتپەس ەدى. ءبىزدىڭ ەلىمىزدە دە ەۋروپاداعىداي اۋرۋ بالالار جويىلىپ, قوعام جىلاعان بالا مەن اتا-انانىڭ كوز جاسىن سۇرتسە, ول اللاعا جاعار ءىس بولار ەدى عوي دەگەن ويدىڭ جەتەگىندە وسى جولدار جازىلدى. انار تولەۋحانقىزى, «ەگەمەن قازاقستان»