ءتىل جاناشىرلارى ماراپاتتالدى

كەنشىلەر استاناسىنداعى دوستىق ۇيىندە وبلىس اكىمىنىڭ «ءتىل جاناشىرى» سىيلىعىمەن ماراپاتتاۋ ءراسىمى ءوتتى. وڭىردە مەملەكەتتىك ءتىلدىڭ كوسەگەسىن كو­گەرتۋ جولىندا ەرىنبەي ەڭبەك ەتىپ جۇرگەن لايىقتىلار قاتاڭ ىرىكتەۋدەن سۇرىنبەي ءوتىپ, قارجىسى قوماقتى سىياقىلارعا يە بولدى. بايقاۋ وتكىزىلگەن بەس جىلدىڭ ىشىندە بۇل سىنعا 185 ۇمىتكەر قۇجات تاپسىرعان ەكەن. ونىڭ ىشىندە 32 قاتىسۋشى وزىپ شىعىپ, ءار جىلدارى لاۋرەات اتاعىن يەمدەنگەن. ال بيىلعى بايقاۋدا 28 ۇمىتكەر باق سىنادى. «ءتىل جاناشىرى» بايقاۋىنىڭ ماراپاتىنا وبلىس اكىمى نۇرمۇحامبەت ابدىبەكوۆ قاتىسىپ, ءسوز سويلەدى. – مەملەكەتتىك ءتىل تاۋەل­سىزدىگىمىز­دىڭ نەگىزى بولىپ تابىلادى. سوندىقتان دا ونىڭ دامۋى – مەملەكەتتىك ساياساتتىڭ اسا ماڭىزدى قۇرامداس بولشەگى. بۇگىنگى تاڭدا ەلىمىزدە ءتىل ساياساتى بايىپتى جانە ساۋاتتى تۇردە جۇرگىزىلىپ كەلەدى. بۇل وتە نازىك قۇرال – ونى دارىگەردىڭ قولىنداعى وتكىردەي اسا ساقتىقپەن قولدانعان ءجون, – دەدى ءوڭىر باسشىسى. بيىلعى ماراپاتتاۋ ءراسىمى جاڭا­شا پىشىمدە ءوتتى. ۇيىمداستىرۋشى­لار ءدوڭ­گەلەك ۇستەل اينالاسىنا بيىلعى جانە وتكەن جىلدارداعى لاۋرەاتتار مەن قوعام قايراتكەرلەرىن, ءبىلىم جانە عىلىم سالاسىنىڭ وكىلدەرىن, مەملەكەتتىك قىزمەتكەرلەر مەن وقۋشىلاردىڭ باسىن قوستى. سونىمەن, «مەملەكەتتىك ءتىل – مەم­لەكەتتىك قىزمەتتە» اتالىمى بويىنشا وبلىستىق ءماسليحات اپپاراتىنىڭ اعا ينسپەكتورى امانگەلدى جۇنىسبەك ماراپاتتالدى. «ءتىل جارشىسى» اتالىمىندا جۇلدە ەكى ۇمىتكەرگە بەرىلدى. ونىڭ ءبىرى – «پريوزەرسكي ۆەستنيك» گازەتىنىڭ ءتىلشىسى, ولكەدە ونوماستيكا سالاسىنداعى ماسەلەلەردى ۇدايى كوتەرىپ, وسى تاقىرىپتا قالام تەربەپ جۇرگەن نۇر­عالي قارابەكوۆ بولسا, ەكىنشىسى – وبلىستىق  «يندۋستريالنايا كاراگاندا» باسىلىمى باس رەداكتورىنىڭ ورىنباسارى,  وتىز جىلدان استام ۋاقىت قازاقتىڭ اقىن-جازۋشىلارى مەن قوعام جانە مەملەكەت قايراتكەرلەرىنىڭ شىعارماشىلىق مۇراسىنا تسيكلدىق ماتەريالدار ارناپ كەلە جاتقان گۇلنار ىسقاقوۆا بولدى. «ۇزدىك تەلەحابار» اتالىمىندا دا ەكى بىردەي ۇمىتكەر سىيلىققا لايىق دەپ تانىلدى. «قازاقستان-قاراعاندى» تەلە­ارناسىنىڭ ءتىلشىسى, «ءتىل تاعدىرىم» باعدارلاماسىنىڭ جۇرگىزۋشىسى بوتابەك مارات ۇلى مەن «بەسىنشى كانال» ارنا­سىنداعى «قازاق تiلiن ۇيرەنەيiك» باع­دارلاماسىنىڭ اۆتورى ايجان يسا ارنايى جۇلدە يەگەرلەرى اتاندى. ال باستى سىيلىق – «ءتىل مايتالمانى» اتالىمىنىڭ جەڭىمپازى ە.بوكەتوۆ اتىنداعى قاراعاندى مەملەكەتتىك ۋني­ۆەرسيتەتى جۋرناليستيكا ءبولىمىنىڭ وق­ىتۋشىسى, پروفەسسور قويلىباي اسا­نوۆقا بۇيىردى. جەڭىمپازعا ەستەلىك مۇسىنشە مەن 500 مىڭ تەڭگەنىڭ سەرتيفيكاتى تابىس ەتىلدى. قايرات ءابىلدينوۆ, «ەگەمەن قازاقستان» قاراعاندى