«حابار» اگەنتتىگى بۇرىن-سوڭدى بولماعان جوبا ازىرلەۋدە

  «حابار» اگەنتتىگى جاڭا ماۋسىمىن كۇتپەگەن جاڭالىقتارمەن باستادى. اگەنتتىكتىڭ قۇرامىنا كىرەتىن «24KZ» ارناسىنىڭ اتاۋى اۋىسىپ, «Kazakh TV» جانە «ءبىلىم جانە مادەنيەت» ارنالارى بىرىكتىرىلمەك. وزگەرىستەر تۋرالى «حابار» اگەنتتىگى» اق باسقارما ءتورايىمى الماگۇل احمەتجانوۆا كەڭىنەن اڭگىمەلەدى. – الماگۇل اۋعاليقىزى, وسى ماۋسىم ەرەكشەلىكتەرمەن باستالدى, مۇنى ار­نا­­لارىڭىزداعى وزگەرىستەردەن بايقاپ ءۇل­گەر­دىك. وسى جىلى كورەرمەنگە دايىنداعان جاڭالىقتارىڭىز كوپ سياقتى. – بيىلعى كۇزگى ماۋسىم ەرەكشە. اقپارات جانە كوممۋنيكاتسيالار مينيسترلىگىنىڭ تاپسىرماسىمەن وسى جىلدان باستاپ اگەنتتىكتە ترانسفورماتسيا جۇرگىزىلۋدە. 2020 جىلعا دەيىنگى دامۋ ستراتەگياسىن دايىنداۋ بارىسىندا ارنايى زەرتتەۋلەر جاسالىپ, اگەنتتىك قىزمەتى ساراپتالدى. ترانسفورماتسيا اياسىندا ىشكى بيزنەس ۇردىستەر وزگەرىپ قانا قويمايدى, سونىمەن قاتار ارنالاردىڭ كونتەنتى جانە ولاردى تاراتۋ تاسىلدەرى دە جاقسارادى. قىزمەتكەرلەرىمىزدى وقىتۋ جانە بىلىكتىلىگىن ارتتىرۋ ماسەلەلەرىنە ەرەكشە نازار اۋدارۋدامىز. قازىرگى ۋاقىتتا «ترت» تۇرىك حولدينگىمەن ىنتىماقتاستىق جونىندە كەلىسىم جاسالۋدا. تۇرىك تەلەارناسىنىڭ اۋماعىندا 150 قىزمەتكەردى وقىتپاقپىز. حابار24 ارناسى 100 پايىز ءوز ءونىمىن كورسەتەدى اگەنتتىك قۇرامىنا 4 ارنا («حابار», «حابار 24», «ءبىلىم جانە مادەنيەت», «Kazakh TV») كىرەدى. جاڭا ماۋسىمدا ولاردىڭ الدىندا جاڭا مىندەتتەر تۇر: بىرىنشىدەن, قوعامدى قىزىقتىرعان وزەكتى ماسەلەلەردى تالقىلايتىن الاڭعا اينالۋ, ەكىنشىدەن, كورەرمەندى زياتكەرلىك دامۋعا ىنتالاندىراتىن تەلەونىمدەر دايىنداۋ, ۇشىنشىدەن, ەلىمىزدە جانە الەمدە بولىپ جاتقان وقيعالار جونىندە جىلدام جانە شىنايى اقپارات بەرۋ, تورتىنشىدەن, مادەني مۇرامىزدى كورەرمەنگە كوبىرەك تاراتىپ, جەتكىزۋ, جاس ۇرپاقتى ءتول مادەنيەتىمىزبەن جاقىنىراق تانىستىرۋ. – «24KZ» ار­ناسىنىڭ اتاۋى نەلىكتەن وزگەردى؟ – تەك ات­اۋى اۋىسقان جوق, «24KZ» ارناسىندا رەبرەندينگ جۇرگىزىلدى. «حابار 24» ەندى ورتاق تەلەوتباسىنىڭ قۇرامىندا. مۇنداي تاجىريبە الەمدىك مەدياحولدينگتەر اراسىندا كەڭىنەن تارالعان. مىسالى, ۆۆس كورپوراتسياسى قۇرامىندا BBC One, BBC Two, BBC World News جانە باسقالارى بار. جاڭارعان ارنانىڭ ەفيرى ءتۇرلى جانرداعى باعدارلامالارمەن تولىقتى. نەگىزگى كۇش ساراپتامالىق جانە رەپورتاج باعىتىنداعى جوبالارعا جۇمسالۋدا, ياعني ەفيردە ساپالى ساراپتامالىق باعدارلامالار­دىڭ قاتارى ۇلعايىپ, رەپورتاج جانرىنداعى باع­دارلامالاردىڭ ۇلەسى ارتتى, سونداي-اق ايماقتاردىڭ تىنىس-تىرشىلىگى تۋرالى جوبالار كوبەيەدى. اشىلعان كۇنەن باستاپ 24 ساعات بويى جاڭالىقتار تاراتۋعا نەگىزدەلگەن تەلەارنا ءارى قاراي دا جاڭالىقتاردىڭ جارشىسى بولىپ قالادى. شاپشاڭدىق جانە شىنايىلىق – ولاردىڭ باستى ۇستانىمى. سونىمەن قاتار, ارنانىڭ ەفيرلىك بەينەكورىنىسى جانە رەسمي سايتتىڭ ينتەرفەيسى دە وزگەردى. جاڭارعان سايت قولدانۋعا قولايلى جانە جاڭالىقتاردى ىزدەۋ بارىسىندا جەڭىل بولىپ جاسالعان. – ارنا اتاۋىنىڭ وزگەرۋىن كورەرمەن قالاي قابىلدادى؟ – ءبىزدى قولداۋشىلار دا, سىناۋشىلار دا تابىلدى. مەنىڭ ويىمشا, بۇل دۇرىس, ءار ادامنىڭ ءوز ويى, ءوز كوزقاراسى بار. «حابار 24» دەگەن اتاۋ­دى قابىلداپ, ۇيرەنۋ ءۇشىن ۋاقىت كەرەك. – «حابار 24-ءتىڭ» نەگىزگى ماقساتى 24 ساعات اقپارات تاراتۋ بولاتىن. باعدار­لاما­لار سانى ارتسا, جاڭالىقتار كولەڭكەدە قالىپ قويماي ما؟ – «حابار 24» – قازاقستانداعى تاۋلىك بويى جاڭالىق تاراتاتىن العاشقى تەلەارنا. جاڭا ماۋسىمدا بۇل ءۇردىس قالا بەرمەك. كورەرمەن 30 مينۋت سايىن ەلىمىزدە جانە الەمدە بولىپ جاتقان اقپاراتتار لەگىمەن تانىسادى. ءبىزدىڭ ءتۇسىرىلىم توبى قوعامدا بولىپ جاتقان وقيعالاردى قالت جىبەرمەۋگە تىرىسىپ, ونى شاپشاڭ تۇردە كورەرمەنگە ۇسىنادى. ارنانىڭ باستى ەرەكشەلىگى, ەفيردە شىعاتىن باعدارلامالاردىڭ بارلىعى 100 پايىز قازاقستاندىق ءونىم. سوندىقتان كەلتىرىلگەن مالىمەتتەر مەن كوتەرىلگەن ماسەلەلەر ءوزىمىز, تىكەلەي قازاقستاندىقتار ءۇشىن جاسالادى. ال­داعى ۋاقىتتا دا وسى ءداستۇردى ساقتاپ قالعىمىز كەلەدى. – «Kazakh TV» مەن «ءبىلىم جانە مادەنيەت» ارنالارىن بىرىكتىرۋدىڭ سەبەبىن تۇسىندىرسەڭىز. – 25 قازان كۇنى جاڭارعان جانە كەڭەيگەن پىشىمدەگى يميدجدىك-تانىمدىق ارنا ەفيرگە شىعادى. بۇل ەكى تەلەارنانىڭ ۇسىناتىن ونىمدەرى ءبىر ارنادا تۇيىسەدى, ەكەۋى دە قازاقستاننىڭ باي مادەنيەتى, سالت-ءداستۇرى, تامىرى تەرەڭدە جاتقان تاريحى, سونىمەن قاتار, تۋريزم سالاسىنا قاتىستى باعدارلامالار كورسەتەدى. تەلەارنالاردى بىرىكتىرۋ وتاندىق جانە شەت­ەلدەگى كورەرمەننىڭ قىزىعۋشىلىعىن قانا­عاتتاندىرۋعا مۇمكىندىك بەرەدى. ونىڭ ۇستىنە بىرىككەن ارنانىڭ كونتەنتىن جاساۋدا نەگىزگى كۇش مادەني-تاريحي قۇندىلىقتارعا, سونداي-اق ونەر جانە مادەنيەت سالالارىنداعى وتاندىق «برەندتى» جانداندىرۋ ءۇشىن تانىمدىق جوبا­لارعا باعىتتالادى. كورەرمەن قازاق حالقى جانە ەلىمىزدە ءومىر ءسۇرىپ جاتقان وزگە ۇلتتاردىڭ سالت-داستۇرىنە ساياحات جاساۋعا مۇمكىندىك بەرەتىن «شىنايىلىق» جانرىنداعى تانىمدىق-ويىن-ساۋىقتىق باعدارلامالار كورەدى. قىزىقتى فاكتىلەر مەن زەرتتەۋلەرگە نەگىزدەلگەن تاريحي وقيعالار جونىندە دەرەكتى فيلمدەر تاماشالايدى. سول سەبەپتى ءبىز «ءبىلىم جانە مادەنيەت» تەلەارناسىنداعى ۇزدىك تانىمدىق جوبالاردى بىرىككەن ارنانىڭ ەفيرىنە شىعارامىز. ياعني حالىق ءسۇيىپ كورەتىن حابارلاردى ساقتاپ قالۋعا تىرىستىق. سونداي-اق, اتالعان ارناداعى «ءومىر جولى», «ەگىز جۇرەك», «تاينى ي سۋدبى ۆەليكيح كازاحوۆ» سىندى جوبالار جاڭا ماۋسىمدا «حابار» ارناسىنان كورسەتىلەدى. ەسكەرە كەتەرلىك تاعى ءبىر جايت, «ءبىلىم جانە مادەنيەت» ارناسىنداعى اسىل مۇرالارىمىز – الەمگە ۇسىناتىن تۋىندىلار. بۇل جىلدام دامىپ كەلە جاتقان مەملەكەتتىڭ ءيميدجىن نىعايتا تۇسۋگە, وتاندىق برەندتى شەتەلدىك نارىقتا ودان ءارى جىلجىتۋعا, ەلىمىز جانە ونىڭ تىنىس-تىرشىلىگى تۋرالى شەتەلدىك اۋديتوريانىڭ وڭ كوزقاراسىن قالىپتاستىرۋعا مۇمكىندىك بەرەدى. سونداي-اق, ارنانىڭ كونتەنتى 100 پايىز وتاندىق باعدارلامالار, سەريالدار جانە ارنايى جوبالاردان قۇرالعان. توقسان اۋىز ءسوزدىڭ توبىقتاي ءتۇيىنى, بىرىككەن «Kazakh TV» ارناسى ەكى بىردەي ماسەلەنى شەشەدى: ءبىرىنشى – قازاقستاندى الەمگە تانىتۋ قىزمەتىن جالعاستىرادى, ەكىنشى – مادەنيەت, ونەر, تاريح جانە ۇلتتىق ءداستۇردى قولدايتىن, وي-ءورىسى كەڭ ەرەسەك, پاراساتتى قازاقستاندىقتاردى بىرىكتىرەدى. "حابار" بۇرىن-سوڭدى بىزدە بولماعان شوۋ ۇسىنادى – «حابار» ارناسىندا قانداي جاڭالىقتار بولماق؟  – جاڭا ماۋسىمدا ەفيرگە «ءبىزدىڭ نازاردا», ورىس تىلىندە «ۆاجنو زنات», «نارودنىي كونترول» حابارلارى ءازىر­لەنۋدە, الداعى ۋاقىتتا «داۆايتە گوۆوريت» الەۋمەتتىك باعدارلاماسى شىعادى دەپ جوسپارلانۋدا. جوبالاردىڭ سانى دا, ساپاسى دا ارتتى. بۇل حابارلاردىڭ بارلىعى ازاماتتارىمىزدىڭ قاجەتتىلىگى مەن مۇڭ-مۇقتاجىنا باعىتتالعان. جالپى, كۇزگى ماۋسىم جاڭالىققا تولى. باستى وزگەرىستىڭ ءبىرى – «حابار» ءوز باعىتىن وزگەرتتى. «حابار» ەندى كوپجانرلى, الەۋمەتتىك باعىتتاعى ارناعا اينالادى. ءبىز ساراپتامالىق, پۋبليتسيستيكالىق جانە دەرەكتى جانرلارعا باسىمدىق بەرىپ وتىرمىز. مۇنى كورەرمەندەرىمىز دە بايقاعان بولار. سونىمەن بىرگە, كۇندىزگى جاڭالىقتار جابىلىپ, كەشكى قورىتىندى جاڭالىقتار عانا قالدى. سوعان ساي ارنايى جاڭا ستۋديا جاراقتالدى. ەندى ساراپتاماعا كوبىرەك ءمان بەرىلىپ, كۇننىڭ باستى تاقىرىپتارى مەن وقيعالارى عانا تارازىلانادى. الەۋمەتتىك سالا, ەكونوميكا, گەوساياسات سياقتى تاقىرىپتار جىكتەلىپ, ولارعا سول سالانى جەتىك بىلەتىن اناليتيك-جۋرناليستەر شولۋ جاسايدى. ەل تاۋەلسىزدىگىنىڭ 25 جىلدىعىنا ارنالعان بىرقاتار جاڭا جوبالاردىڭ ءوندىرىسى باستالىپ تا كەتتى. وسى ايدان باستاپ تۋعان جەرىمىزدى ارا­­لاپ, حالىقتىڭ تۇرمىسى مەن تىنىس-ءتىر­شىلىگىن كورسەتەتىن «ەكسپەديتسيا 25» كولىكتىك ەكسپەديتسياسىنىڭ كورسەتىلىمى باستالدى. جىل سوڭىنا دەيىن «كود ناتسي», «تاۋەلسىزدىك تول­عاۋى» دەرەكتى فيلمدەرىن, «ناشي 25», «پاي-پاي 25» ارنايى باعدارلامالارىن ۇسىنعالى وتىرمىز. سونداي-اق تاۋەلسىزدىك تويىنا ارنالىپ مەرەكەلىك بەينەباياندار مەن روليكتەر دايىندالۋدا. – ال ويىن-ساۋىقتىق, تانىمدىق جوبالاردى كورسەتۋ جوسپارلارىڭىزدا بار ما؟ – «بيلە, قازاقستان!» اتتى بي سايىسىنىڭ تۇساۋى جاقىن كۇندەرى كەسى­لەدى. مۇنداي اۋقىمدى تەلەۆيزيالىق جوبا ەلىمىزدە بۇرىن-سوڭدى بولماعان جانە بۇل باعدارلامانى قازاقستاندىقتارعا كورسەتۋ ءۇشىن ءبىز «Endemol Shine Group» كومپانياسىمەن ۇزاق ۋاقىت كەلىسسوزدەر جۇرگىزدىك. بۇل شوۋ العاش رەت 2005 جىلى امەريكا قۇراما شتاتتارىندا «So You Think You Can Dance» دەگەن اتاۋمەن كورسەتىلگەن. قازىرگى تاڭدا 10-نان استام «ەممي» سىيلىعىن جيناعان. جوبا بارىسىندا ەلىمىزدىڭ ءۇش قالاسىندا ىرىكتەۋ جۇرگىزىلىپ, 2 مىڭعا جۋىق ءبيشى ءوز باعىن سىنادى. ونەرپازداردىڭ اراسىنان ۇزدىكتەر تاڭدالىپ, ولار ءتورت اپتا بويى «حابار» ارناسىنىڭ تىكەلەي ەفيرىندە سايىسقا تۇسەدى. «بيلە, قازاقستاننىڭ!» ماقساتى – ەلى­مىزدىڭ بارلىق تۇرعىندارىن بي بيلەپ, سالاماتتى ءومىر سالتىن ۇستانۋعا شاقىرۋ. شالعاي ايماقتاعى جاستاردىڭ بويىنداعى تالانتىن كورسەتىپ, بۇكىل ەلگە تانىلۋعا مۇمكىندىك بەرۋ. بۇل جاي عانا بي سايىسى ەمەس, الەۋمەتتىك-يدە­ولوگيالىق ماڭىزى جوعارى, حالىقتى ءبىر­لىككە, تاتۋلىققا, دوستىققا شاقىراتىن جوبا. سونى­مەن قاتار, وسى ماۋسىمدا رەيتينگى جو­عارى, كورەرمەندەر ءسۇيىپ كورەتىن «بەنەفيس-شوۋ», «دۋ-دۋمان» سىندى حابارلار ءارى قاراي جالعاسىن تابادى. تەلەحيكايالار وندىرۋدە وزىندىك باعىتىن قالىپتاستىرعان «حابار» اگەنتتىگى بۇدان ءارى وتاندىق كينەماتوگرافيا سالاسىن دامىتۋعا ۇلەسىن قوسا بەرەدى. بيىل كورەرمەنگە ۇسىنار سەريالدار مەن فيلمدەرىمىز از ەمەس. جىل سوڭىنا دەيىن جەتى بىردەي جاڭا تۋىندى كورسەتۋدى جوس­پارلاپ وتىرمىز. 19 قىركۇيەكتەن باستاپ انالىق ماحاببات پەن جەتىم بالالاردىڭ تاعدىرىن سۋرەتتەيتىن «وگەي جۇرەك» سەريالى ەفيرگە شىقتى. سونداي-اق ابايدىڭ قارا سوزدەرىنىڭ فيلوسوفياسىنا نەگىزدەلگەن «اقىلدىڭ كىلتى. ءومىر داستانى» تەلەەپوپەياسىنىڭ جالعاسى مەن يندۋستريالىق-يننوۆاتسيالىق دامۋ باع­دارلاماسى اياسىندا جۇزەگە اسىپ جاتقان ءون­دىرىس ورىندارى, قازاقستاندا جاسالعان ءونىم­دەر, وتاندىق كاسىپكەرلەردى قولداۋ جونىندە «باسەكە 2» حيكاياسى جالعاسىن تابادى. سونى­مەن بىرگە, «ۋنەسەننىە رەيسوم» اتتى تەمىرجول قىزمەتكەرلەرىنىڭ جولداعى شىتىرمان وقيعا­لارى تۋرالى جاڭا سەريال تۇسىرىلۋدە. جىل سوڭىنا قاراي سوڭعى ۋاقىتتاردا قازاق ەلى ءسۇيىپ قارايتىن سپورت ءتۇرى – بوكس تۋرالى تەلەسەريال كورەسىزدەر. وندا بوكسشىلاردىڭ جەڭىس تۇعىرىنا جەتۋ جولى, سپورتتىڭ ادام ومىرىندەگى ماڭىزى تۋرالى سۋرەتتەلەدى. اگەنتتىك ەلىمىزدەگى تەلەۆيزيا سالاسىندا العاش رەت تاريحي تۇلعالار تۋرالى سەريالدار ءتۇسىرۋدى باستاعان بولاتىن. «باۋىرجان مو­­­­مىش­ ۇلى», «قۇستار ءانى», «كۇلاش» سىندى ەلىمىزدىڭ بەلگىلى وكىلدەرىنە ارنالعان كارتينالار وسى جىلى ءشامشى قالداياقوۆتىڭ ءومىرى مەن شىعارماشىلىعىنا ارنالعان ومىرباياندىق سەريالمەن تولىعادى. – كۇزگى ماۋسىمعا ساقاداي-ساي تۇرسىزدار, ال وتكەن ماۋسىم «حابار» اگەنتتىگى ءۇشىن جە­مىستى بولدى ما؟ –  وتكەن ماۋسىمدى ءبىز وتە جوعارى دەڭگەيدە اياقتادىق. وزدەرىڭىز بىلەتىندەي, تامىز ايىندا بۇكىل الەم مويىن بۇرعان وليمپيا ويىندارى ءوتتى. ءدۇبىرلى دودانى «حابار» ارناسىنىڭ كورەرمەندەرى دە كورۋگە مۇمكىندىك العان بولاتىن. ترانسلياتسيا كەزىندە ءبىز جارىستاردى كورسەتىپ عانا قويماي, ەكى ءتۇسىرۋ توبىن ريو-دە-جانەيرو قالاسىنا جىبەردىك. ءبىزدىڭ تىلشىلەرىمىز جارىستار, مەدالدار, وليمپيادا اۋىلىنداعى قىزىقتى وقيعالار تۋرالى ەكسكليۋزيۆتى مالىمەتتەردى «وليمپيادا كۇندەلىكتەرىندە» بەرىپ وتىردى. سونىمەن قاتار, ريوداعى الامانعا دەيىن عالامتور قول­دانۋشىلارىنا «حابار» ارناسىنىڭ رەسمي سايتىندا ارنايى ينتەرنەت جوبا ازىرلەدىك. khabar.kz/olympics ۆەب-سايتىندا وليمپيادا ويىندارى جونىندە تىڭ جانە قىزىقتى ماتەريال­دار ساعات سايىن سالىنىپ وتىردى. ايتايىن دەگە­نىم, سول ۋاقىت ارالىعىندا جالپى ءبىزدىڭ ساي­تى­مىزدى 2 ميلليونعا جۋىق ادام قاراعان (Google Analytics مالىمەتى بويىنشا). ال zero.kz سايتىنىڭ بەرگەن مالىمەتى بويىنشا ءبىزدىڭ سايت قازاقستاندىق باق (قولدانۋشىلار كوپ قاراعان سايتتار) اراسىندا ۇزدىك وندىققا ەندى. سونداي-اق سول كۇندەردىڭ ارالىعىندا ويىنداردى ءبىزدىڭ ارنادان 4 ميلليوننان استام كورەرمەن تاماشالا­عان. كورسەتىلىمنىڭ رەيتينگىسى – 1,5 %, ال ۇلەسى – 18,4 % بولدى (TNS Central Asia مالىمەتتەرى بويىنشا). بۇل جۇمىسىمىزدىڭ جەمىسى دەپ ويلايمىن. اڭگىمەلەسكەن گۇلنۇر وتجانقىزى