التىن مەدال ءۇشىن ايقاسامىز

كەشە قازاقستاننىڭ ۆولەيبولدان قىزدار قۇراماسى ۆەتنامدا ءوتىپ جاتقان ازيا كۋبوگىنىڭ جارتىلاي فينالىندا جاپونيا كومانداسىن 3:1 ەتىپ جەڭىپ, ءوزىنىڭ تاريحىندا تۇڭعىش مارتە وسى جارىستىڭ فينالىنا شىقتى. ءسويتىپ, كۇنشىعىس ەلى بويجەتكەندەرىنەن توپتىق كەزەڭدەگى جەڭىلىسىنىڭ ەسەسىن قايتارىپ قانا قويا سالماي, العاش رەت التىن مەدال ءۇشىن تالاسۋعا مۇمكىندىك الدى. باس جاتتىقتىرۋشى ۆياچەسلاۆ شاپراننىڭ شاكىرتتەرى بۇل كەزدەسۋدە ۇلكەن جىگەر مەن تاباندىلىق تانىتتى. ولار ماتچتىڭ ءبىرىنشى پارتياسىندا قارسىلاستارىنان 19:25 ەسەبىمەن ۇتىلسا, كەلەسى ءۇش پارتيانى تۇگەلدەي 25:11, 25:21, 25:16 دەگەن ەسەپتەرمەن ءوز پايدالارىنا شەشە ءبىلدى. كەلەسى جارتىلاي فينالدىق جۇپتا قىتاي قىزدارى تايلاندتىق قۇربىلارىنان 3:2 ەسەبىمەن باسىم ءتۇسىپ, فينالدىق دۋەتتىڭ ەكىنشى سىڭارىن قۇرادى. ءبىزدىڭ قىزدار مۇنىڭ الدىندا الاڭ يەلەرى – ۆەتنام جاساعىن 3:0 ەتىپ تىزە بۇكتىرگەن بولاتىن. ال توپتىق ىرىكتەۋ ويىندارىندا جاپونيادان جەڭىلىپ (1:3), كورەيا (3:0) مەن قىتايدى (3:2) ۇتىپ, 5 ۇپايمەن ءۇشىنشى ورىن العان ەدى. ەسكە سالا كەتەيىك, قىزدار كوماندالارى اراسىنداعى ازيا كۋبوگى 2008 جىلدان بەرى ەكى جىلدا ءبىر رەت وينالىپ كەلەدى. وعان قۇرلىقتىڭ 8 كۇشتى كومانداسى قاتىسادى. تۋرنيردە 2008, 2010, 2014 جىلدارى – قىتاي, ال 2012 جىلى تايلاند قۇراماسى باس بايگەنى جەڭىپ العان ەدى. قازاقستاندىقتار 2012, 2014 جىلدارى قولا جۇلدەگەر اتانعان. فينالدىق كەزدەسۋ بۇگىن وينالادى.   رۋسلان يگىلىك