فيفا «التىن دوپتان» ايىرىلىپ قالدى

فرانتسۋزدىڭ France Football جۋرنالى حالىقارالىق فۋتبول فەدەراتسياسىمەن (فيفا) الەمنىڭ ۇزدىك ويىنشىسىنا تاپسىرىلاتىن «التىن دوپ» جەكەلەي ناگراداسى جونىندەگى ارىپتەستىگىن توقتاتتى. باسىلىم سايتى مۇنى 16 قىركۇيەك, جۇما كۇنى جازدى. اتاپ وتىلگەندەي, تاراپتار ارىپتەستىكتى جالعاستىرۋ جونىندەگى كەلىسىمگە كەلە الماعان. ەندى بۇل سالاداعى وزگەرىس بيىلعى جىلدان باستالادى. فۋتبولداعى باستى جەكەلەي ماراپاتتى تاپسىرۋدىڭ جاڭا ەرەجەلەرى جۋرنالدىڭ 20 قىركۇيەك, سەيسەنبى كۇنى شىعاتىن نومىرىندە كەڭىنەن جازىلادى. «فيفا-نىڭ التىن دوبى» – جىلدىڭ قورىتىندىسى بويىنشا ۇزدىك فۋتبولشىعا تاپسىرىلاتىن جۇلدە. ناگرادا 2010 جىلى France Football  ۆەرسياسى بويىنشا انىقتالاتىن «التىن دوپ» جانە «فيفا-نىڭ جىل ويىنشىسى» اتتى ەكى جۇلدەنىڭ بىرىگۋى ناتيجەسىندە پايدا بولعان. سودان بەرى جەڭىمپاز فرانتسۋز باسىلىمى جۋرنا­ليس­تەرىنىڭ, جاتتىقتىرۋشىلار مەن ۇلتتىق قۇرامالار كاپيتاندارىنىڭ داۋىس بەرۋلەرى جولىمەن انىقتالىپ كەلدى. «فيفا-نىڭ التىن دوبى» جۇلدەسىن سوڭعى رەت «بارسەلونا» كومانداسىنىڭ شابۋىل­شىسى ليونەل مەسسي جەڭىپ ال­عان ەدى. ول بۇل اتاققا 2009-2012, 2015 جىل­دارى بەس رەت يە بولدى. ءۇش ناگرادانى ءمادريدتىڭ «رەال» كومانداسىنىڭ فور­ۆار­دى كريشتيانۋ رونالدۋ (2008, 2013, 2014), گوللانديالىق شابۋىلشىلار يوحانا كرويفا (1971, 1973, 1974) پەن ماركو ۆان باستەنا (1988, 1989, 1992), سون­داي-اق, فرانتسۋزدىڭ جارتىلاي قورعاۋ­شىسى ميشەل پلاتيني (1983-1985 ج.) العان. France Football – فرانتسۋزدىڭ 1946 جىلدان بەرى سەيسەنبى جانە جۇما كۇن­دەرى شىعىپ كەلە جاتقان فۋتبول تاقى­رى­بىنداعى جۋرنالى. ول «التىن دوپ» جۇلدەسىن 1956 جىلدان بەرى تاپ­سىرىپ كەلەدى. دەمەك, جۇلدەنىڭ تاعايىن­دال­عانىنا دا بيىل 60 جىل تولىپ وتىر.   دامير قوجامقۇل