مەملەكەت باسشىسى ن.نازارباەۆ وزبەكستان پرەزيدەنتى يسلام كاريموۆتىڭ قايتىس بولۋىنا بايلانىستى كوڭىل ايتتى

ەلباسى نۇرسۇلتان نازارباەۆ وزبەكستان رەسپۋبليكاسىنىڭ پرەزيدەنتى يسلام كاريموۆتىڭ قايتىس بولۋىنا بايلانىستى وزبەكستان رەسپۋبليكاسى ولي ءماجىلىسى سەناتىنىڭ توراعاسى نيگماتيللا يۋلداشەۆكە كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتىنەن. مەملەكەت باسشىسى وزبەكستان رەسپۋبليكاسىنىڭ پرەزيدەنتى يسلام ابدۋگانيەۆيچ كاريموۆتىڭ دۇنيەدەن وتكەنى تۋرالى حاباردى زور كۇيزەلىسپەن قابىلداعانىن ايتقان. «قازاقستاندىقتار بۇل مەزگىلسىز ءارى ورنى تولماس قازانىڭ اۋىرتپالىعىن باۋىرلاس وزبەكستان حالقىمەن بىرگە بولىسەدى. 30 جىلداي قاناتتاسا جۇمىس ىستەگەن دوسىمنان ايرىلعانىما قايعىرامىن», – دەلىنگەن كوڭىل ايتۋ جەدەلحاتىندا. سونداي-اق, نۇرسۇلتان نازارباەۆ ەلدىڭ ەكونوميكالىق الەۋەتىنىڭ دامۋىنا, ونىڭ حالىقارالىق بەدەلىنىڭ وسۋىنە, قوعامنىڭ ءال-اۋقاتىنىڭ ارتۋىنا ىقپال ەتكەن اۋقىمدى وزگەرىستەردىڭ جۇزەگە اسىرىلۋى وزبەكستان رەسپۋبليكاسى تاۋەلسىزدىگىنىڭ باستاۋىندا تۇرعان يسلام كاريموۆتىڭ ەسىمىمەن بايلانىستى ەكەنىن اتاپ ءوتتى. «ول ءوزىنىڭ بۇكىل ءومىرىن تۋعان حالقىنا قالتقىسىز قىزمەت ەتۋگە ارنادى,  اردايىم قازاقستاننىڭ سەنىمدى دوسى بولدى جانە ءبىزدىڭ حالىقتارىمىزدىڭ اراسىندا دوستىق پەن تاتۋ كورشىلىكتىڭ نىعايا تۇسۋىنە ۇلكەن ۇلەس قوستى», – دەلىنگەن جەدەلحاتتا. سوڭىندا قازاقستان پرەزيدەنتى يسلام ابدۋگانيەۆيچ كاريموۆتىڭ تۋىستارى مەن جاقىندارىنا جانە ەلدىڭ باسشىلىعى مەن باۋىرلاس وزبەكستان حالقىنا قاتتى قايعىرىپ كوڭىل ايتتى.