اتا زاڭ مەرەكەسى شىعىسقازاقستاندىقتار ءۇشىن قۋانىشتى قاۋىشۋمەن باستالدى. ەرتەڭگىلىك وبلىس تۇرعىندارى وسكەمەن اۋەجايىنان وليمپياداشى جەرلەستەرىن قارسى الدى. ۇشاقتان ريو-دە-جانەيرو قالاسىندا وتكەن ءحححى جازعى وليمپيالىق ويىنداردىڭ ءۇش قارعىپ سەكىرۋدەن قولا جۇلدەگەرى ولگا رىپاكوۆامەن بىرگە اۋىر اتلەتشى دەنيس ۋلانوۆ, ديسك لاقتىرۋشى ەۆگەني لابۋتوۆ, جەڭىل اتلەتشى يرينا سمولنيكوۆا, 400 مەترلىك قاشىقتىققا جۇگىرۋدەن جەڭىل اتلەتشى ەلينا ميحينا مەن بايداركادا جەكەلەي ەسۋدە ونەر كورسەتكەن ەكاتەرينا سميرنوۆا ءتۇستى.
اۋەجاي الدىندا داڭقتى سپورتشىلاردى جانكۇيەرلەر اتىنان قۇتتىقتاعان وبلىس اكىمىنىڭ ورىنباسارى جاقسىلىق ومار ولگا رىپاكوۆانىڭ وليمپيالىق ويىنداردا قازاقستاننىڭ اتىنان جەڭىل اتلەتيكادان جۇلدەلى بولعان جالعىز سپورتشى ەكەنىن ەرەكشە اتاپ ءوتتى.
– ەلباسىمىز ايتىپ وتكەندەي, ولگا رىپاكوۆا تەك سپورتشى عانا ەمەس, سونىمەن قاتار ول باتىر انا, – دەدى وبلىس اكىمىنىڭ ورىنباسارى.
ريو وليمپياداسىنىڭ قولا جۇلدەگەرى دە جانكۇيەرلەرىنە كورسەتكەن قولداۋلارى ءۇشىن ريزاشىلىعىن ءبىلدىردى.
– وليمپيادادان كەيىن مەن تاعى ءبىر جارىسقا ونەر كورسەتۋگە اتتانىپ كەتتىم. سوندىقتان, ەكى سايىستان كەيىن تۋعان ولكەم شىعىس قازاقستانعا, وسكەمەنگە جەتۋ مەن ءۇشىن ۇلكەن قۋانىش. ءار كۇن سايىن الەۋمەتتىك جەلىلەردە قولداۋ كورسەتىپ, تىلەك بىلدىرگەندەرىڭىز ءۇشىن العىس ايتامىن. سىزدەردىڭ قولداۋلارىڭىزسىز ءبىزدىڭ جەتىستىگىمىز دە بولماس ەدى, – دەدى ولگا رىپاكوۆا.
بۇدان كەيىن وليمپياداشىلار وتىرعان كولىكتەر شەرۋى سالتاناتتى تۇردە وبلىس ورتالىعىنىڭ كوشەلەرىمەن ءجۇرىپ ءوتىپ, رەسپۋبليكا الاڭىنا كەلدى. وبلىس ورتالىعىندا ءوتىپ جاتقان كونستيتۋتسيا كۇنى اياسىندا ريو-دە جانەيرو وليمپياداسىنا قاتىسۋشىلارىنا ەرەكشە قۇرمەت كورسەتىلدى.
ءوڭىر باسشىسى دانيال احمەتوۆ ولگا رىپاكوۆاعا جەرلەستەرىنىڭ اتىنان Toyota Land Cruiser Prado اۆتوكولىگى مەن 50 مىڭ اقش دوللارىن سىيلاسا, جارىستى ءتورتىنشى ورىنمەن اياقتاعان اۋىر اتلەت دەنيس ۋلانوۆقا ەكى بولمەلى پاتەردىڭ كىلتىن تابىس ەتتى. وليمپيالىق ويىندارعا شىعىس قازاقستان وبلىسىنان قاتىسقان باسقا سپورتشىلارعا, اتاپ ايتقاندا ديسك لاقتىرۋشى ەۆگەني لابۋتوۆ, مارافوندىق قاشىقتىقتاعى جەڭىل اتلەت يرينا سمولنيكوۆا, جەڭىل اتلەت ەلينا ميحينا جانە ەسكەكشى ەكاتەرينا سميرنوۆاعا وبلىس اكىمىنىڭ ءبىر جىلدىق ستيپەندياسىنىڭ سەرتيفيكاتتارى تابىس ەتىلدى.
دۋمان اناش
وسكەمەن
