تۇتىنۋشى ءۇشىن ءتيىمدى

قازاقستان ازاماتتارىنىڭ مو­بيلدىك بازاسىندا 2 ميلليون پايدالانۋشى تىركەلگەن. اقپارات جانە كوممۋنيكاتسيالار مينيسترلىگىنىڭ قىزمەتتەردى اۆتوماتتاندىرۋ باسقارماسىنىڭ باسشىسى اسەت ءۋايسوۆتىڭ ءتۇسىندىرۋى بويىنشا, وسى بازاعا قاتىسۋ ءموبيلدى ۇكى­مەتتىڭ ۇسىناتىن بارلىق قولايلىعى مەن فۋنكتسيالارىن پايدالانۋ ءمۇم­كىندىگىن بەرەدى. بۇل ءموبيلدى ۇكىمەت, اتاپ ايتقاندا, eGov-تىڭ ءموبيلدى قوسىمشاسى بولىپ تابىلادى. ەgov.kz ەلەكتروندى ۇكىمەت پورتالى نەمەسە «ازاماتتارعا ارنال­عان ۇكىمەت» مەملەكەتتىك كورپو­را­تسيا­سىنىڭ بولىمدەرى ارقىلى ءاربىر قالاۋ­شى ءموبيلدى ۇكىمەتتىڭ پايدالانۋشىسى بولا الادى جانە موبيلدىك بازاعا تىركەلە الادى. ول ءۇشىن پورتالدا اۆتورلاندىرۋدان ءوتۋ, ءوزىنىڭ تەلەفون ءنومىرىن, قۇپيا ءسوزىن كورسەتۋ جانە ەلەكتروندى تسيفرلى قولتاڭبا (ەتسق) كومەگىمەن تىركەۋدى راستاۋ جەتكىلىكتى. بۇگىنگى كۇنى كەز كەلگەن ۋاقىتتا سمارتفون نەمەسە پلانشەت ارقىلى قوسىمشا پايدالانۋشىلارىنا 80 ءتۇرلى قىزمەت پەن سەرۆيس قول­جەتىمدى. ونىڭ ىشىندە, مىسالى, مەكەن-جاي انىقتاماسىن الۋ, بالاباقشاعا بالانى كەزەككە قويۋ, سالىقتاردى, ايىپپۇلداردى تولەۋ جانە ت.ب. بار. ال ءموبيلدى جەكە كابينەتكە كەلەتىن بولساق, ول جەرگە ازامات تۋرالى بارلىق نەگىزگى اقپارات ءتۇرلى مەملەكەتتىك ورگانداردىڭ دەرەكتەر قورلارىنان اۆتوماتتى تۇردە تارتىلىپ جيناقتالادى. مىسالى, پايدالانۋشى ءوز جەكە كابينەتىندە جەكە كۋالىك نەمەسە تەحبايقاۋدىڭ قولدانۋ مەرزىمىنىڭ اياقتالۋى جايلى جانە دە جقە بۇزعانى ءۇشىن ايىپپۇلدار مەن بورىشكەرلەردىڭ تىزىلىمىنە ەنگىزىلۋى تۋرالى حابارلاندىرۋلاردى الادى. سونىمەن قاتار بۇل اقپارات SMS-حابارلامالارى مەن push ارنالارى ارقىلى دا كەلەدى. «مىسالى, ءسىز جول قوزعالىسى ەرەجەسىن بۇزعانىڭىز ءۇشىن ايىپپۇل تۋرالى سمارتفونعا حابارلامانى ال­عاندا ونى بىردەن eGov قوسىمشاسى ار­قى­لى تولەي الاسىز. بۇل شىن ءما­نىن­دە وتە ىڭعايلى», دەيدى ۋايسوۆ مىرزا. قازىرگى تاڭدا, قازاقستاندا مو­بيلدى ۇكىمەت ارقىلى 4,5 ميلليونعا جۋىق قىزمەت كورسەتىلگەن بولسا, eGov قوسىمشاسى 365 مىڭنان استام رەت جۇكتەلدى.