اكىم دە, بوكسشى دا سوزىندە تۇردى

ريو-2016 وليمپياداسىنىڭ قولا جۇلدەگەرى, بوكسشى يۆان دىچكونى قوستاناي حالقى ىستىق ىقىلاسپەن قۇشاق جايا قارسى الدى. اۋەجايعا جينالعان كوپشىلىكتىڭ قاراسى قالىڭ. قۇشاق-قۇشاق گۇل الىپ, اسىعا جەتكەن جانكۇيەرلەر سپورتشىنى تاعاتسىزدانا كۇتتى. اەروپورت الاڭىندا وركەستر ويناپ تۇر. سپورت ارداگەرلەرى, جاس سپورتشىلار مەن بوكسشىنىڭ تۋىستارى جۇلدەگەردى قارسى الۋعا اسىق. يۆان دىچكونىڭ قاسىندا قوس جاتتىقتىرۋشىسى ساپابەك مۇقىشەۆ پەن ۆلاديمير شايەر بار. قولا جۇلدەگەردى قارسى الۋعا قوستاناي وبلىسىنىڭ اكىمى ارحيمەد مۇحامبەتوۆ تە كەلدى. ايماق باسشىسى بوكسشىنى جەڭىسىمەن قۇتتىقتاپ, تابىس تىلەدى. – سوڭعى بەس جىلداعى بەلسەندى جۇمىس پەن كۇندەلىكتى جاتتىعۋدىڭ ارقاسىندا يۆان الەم چەمپيوناتىندا ءۇشىنشى ورىن الدى. ەكى مارتە كۇمىس جۇلدەگەر اتاندى. بۇل جەتىستىكتەردىڭ قاتارىنا ازيا چەم­پيونى دەگەن اتاقتى قوسىڭىز. جەر­لەسى­مىز وسىمەن ەكى دۇركىن وليمپيادا قولا جۇلدەگەرى بولىپ وتىر. مەن ونىڭ ءومىر­بايانىن وقىعان ەدىم. يۆان ون كۇندەي بۇرىن 26 جاسقا تولدى. بۇل دەگەنىمىز, سپورت­­شىنىڭ الدىندا ءالى تالاي سايىستار مەن جەڭىستەردىڭ كۇتىپ تۇرعانىن بىلدىرەدى, – دەدى وبلىس اكىمى ارحيمەد مۇحامبەتوۆ. يۆان دىچكو سول ارادا باق وكىلدەرىنىڭ ساۋالدارىنا جاۋاپ بەرىپ, جانكۇيەرلەرگە العىس ايتتى. «وليمپيا ويىندارىنان ەكىنشى رەت جۇلدەمەن ورالعانىما قۋانىش­تىمىن. ءبىزدىڭ وبلىسىمىزدان ءالى تالاي چەمپيونداردىڭ شىعاتىنىنا سەنىمدىمىن. سپورتشىلارىمىزدىڭ جوعارى ماراپاتقا يە بولعانىن قالايمىن», – دەدى بوكسشى. شاكىرتىنىڭ بۇل ءسوزىن جاتتىقتىرۋشىسى ساپابەك مۇقىشەۆ قولدادى. – يۆان جەڭىس ءۇشىن ءبارىن جاسادى. اسا اۋىر سالماقتاعى بوكسشىلاردىڭ ءبارى بىردەي ەكى مارتە وليمپيادا مەدالىن الىپ جاتقان جوق. ونداي جەڭىس ءبىزدىڭ يۆاننىڭ قولىنان كەلدى. ءبىز وعان سەنەمىز. ونىڭ ءالى 26 جاستا ەكەنىن ۇمىتپاڭىزدار, – دەپ اتاپ ءوتتى جاتتىقتىرۋشى. بوكسشى جۋرناليستەرگە بەرگەن سۇحباتتان سوڭ, قالاداعى Fitnation سپورت كەشەنىنە بارىپ, جاستارمەن كەزدەستى. جاس سپورتشىلار وليمپيادا جۇلدەگەرىمەن ەستەلىك سۋرەتكە ءتۇسىپ, قولتاڭبا الدى. ءتۇس اۋا يۆان دىچكو رۋدنىي قالاسىنا باردى. ول جەردەگى كەزدەسۋدە وبلىس اكىمى ارحيمەد مۇحامبەتوۆ وليمپيادا جۇلدەگەرىنە ءۇش بولمەلى پاتەردىڭ كىلتىن تاپسىردى. بوكسشىنىڭ ەكى باپكەرىنە 1 ملن تەڭگەدەن سىياقى بەردى. وليمپيادا الدىندا وبلىس اكىمى بوكسشىمەن كەزدەسىپ, «ەگەر مەدال الساڭ, قالاعان ءبىر تىلەگىڭدى ورىندارمىز», دەگەن ەدى. سول ساتتە دىچكو وبلىس ورتالىعىنان پاتەر الۋدى ارماندايتىنىن ايتقان. مىنە, كورمەيسىز بە, بوكسشى دا, اكىم دە ءوز سوزدەرىندە تۇردى. قىمبات دوسجانوۆا قوستاناي