مەرەيلى ماراپاتتار

ريو-دە-جانەيروداعى  جازعى  وليمپيا ويىندارىنان  جۇلدەمەن ورالعان سپورتشىلاردى جەتىسۋلىقتار دا ەرەكشە قۇرمەتپەن قارسى الدى. وسىعان ارنالعان شارا تالدىقورعانداعى وقۋشىلار سارايىندا سالتاناتتا جاعدايدا وتكىزىلدى. جيىندى الماتى وبلىسى اكىمىنىڭ ءبىرىنشى ورىنباسارى ءلازات تۇرلاشەۆ اشتى. – الەمنىڭ 205 ەلىنەن باس قوسقان كىل مىقتى­لاردىڭ اراسىندا قازاقستان سپورتشىلارى دا وزدەرىن جاقسى قىرلارىنان تانىتتى. ولاردىڭ اراسىندا جەتىسۋ ءوڭىرىنىڭ ساڭلاقتارى دا بولدى. اتاپ ايتقاندا, ءبىزدىڭ جانكۇيەر قاۋىم سول كۇندەرى اۋىر اتلەتتەر سايىسىندا كورىك قىزدىرعان كارينا گوريچەۆا مەن مارگاريتا ەليسەەۆانىڭ, سونداي-اق, بوكسشى جانىبەك ءالىمحان ۇلىنىڭ جاقسى ونەرلەرىنە ءتانتى بولدى. وبلىستان وسىنداي سپورتشىلاردىڭ ريودا كورىنۋى ءبىز ءۇشىن دە ماقتانىش, – دەدى ول ءوزىنىڭ سوزىندە. بۇدان كەيىن جيىن ويىندار جۇلدەگەرى مەن قاتىسۋشىلارىن ماراپاتتاۋ راسىمىنە جالعاستى. وندا وبلىس اكىمىنىڭ ورىنباسارى اۋىر اتلەتتەر سايىسىندا قولا مەدالعا قول جەتكىزگەن كارينا گوريچەۆاعا 10 ملن تەڭگەنىڭ, ال بەسىنشى ورىندى يەلەنگەن مارگاريتا ەليسەەۆاعا 3 ملن تەڭگەنىڭ سەرتيفيكاتتارىن تاپسىردى. ءسويتىپ, برازيليا جەرىندە كوك بايراعىمىزدىڭ كوتەرىلۋىنە ەڭبەك سىڭىرە بىلگەن زىلتەمىرشىلەرگە ەل العىسى ءبىلدىرىلدى. سونىمەن قاتار, بۇل كۇنى ءوڭىر سپورتىنىڭ ورلەۋىنە وزىندىك ەڭبەكتەرىن سىڭىرگەن ارداگەر سپورتشىلار مەن وسى سالا قىزمەتكەرلەرى «قۇرمەتتى سپورت قىزمەتكەرى» توسبەلگىسىمەن جانە وبلىس اكىمىنىڭ قۇرمەت گراموتالارىمەن ماراپاتتالدى. نۇربول الدىباەۆ, «ەگەمەن قازاقستان»  تالدىقورعان