جامبىل سەربشە جىرلايدى

 ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, ۇعا اكادەميگى ەرلان سىدىقوۆتىڭ سەرب تىلىندەگى تۇڭعىش «جامبىل. ۇلى دالا جىرشىسى» اتتى كىتابى  تانىستىرىلدى.  قازاقستان رەسپۋبليكاسى­نىڭ ۆەنگرياداعى ەلشىلىگىنىڭ قول­­داۋىمەن وتكىزىلگەن شارا­عا سەربيا مادەنيەت جانە اقپا­رات مينيسترلىگىنىڭ, سەر­بيا جازۋ­شىلار وداعىنىڭ باسشى­لى­عى مەن مۇشە­لەرى, بەلگراد زيا­لى قاۋى­مى, سونداي-اق, ديپلو­ما­تيا­لىق كورپۋس وكىلدەرى قاتىستى. كىتاپتى سەرب تىلىنە اۋدارعان – بەلگراد ۋنيۆەرسيتەتىنىڭ پروفەسسورى, تانىمال ءتارجىماشى ولگا ماركوۆيچ. كىتاپتىڭ العىسوزىن ەلبا­سى نۇرسۇلتان ءابىش ۇلى نازارباەۆ­تىڭ ءوزى جازعان. بۇل – فاشيزمگە قارسى سوعىستاعى جەڭىستىڭ 70 جىلدىعىنا جانە كورنەكتى اقىن جامبىل جاباەۆتىڭ تۋعانى­نا 170 جىل تولۋىنا ارنالعان بىرەگەي ەڭبەك. كىتاپتىڭ ەرەكشە قۇندىلىعى – داڭقتى اقىن تۋرالى كەڭ مالىمەتتىڭ سەرب وقىرمانىنا العاش جەتۋىندە جانە ۇلى دالا تۇلعاسىن تانىتۋدا. بۇل ەڭبەكتە مۇراسى الەم مەن قازاق ەلىنىڭ رۋحاني التىن قورىنا قوسىلعان ءبىرتۋار اقىن­نىڭ ءومىر جولى جاڭاشا بايىپتاۋلارمەن جازىلعان. باسىلىم 3 بولىمنەن تۇرادى. شارا بارىسىندا سەرب تا­راپى­نىڭ وكىلدەرى مۇنداي اكتسيا­لار قازاق حالقىنىڭ مادەنيەتى مەن ونەرىن, ادەت-عۇرپى مەن سالت-ءداستۇرىن جەتە ءارى تەرەڭ تۇسىنۋگە, كەڭ تانىسۋعا مۇمكىندىك بەرەتىنىن ايتتى. جالپى, مۇنداي شارا­لار قازاقستان مەن سەربيا اراسىن­داعى ىنتىماقتاستىقتىڭ مادەني باعىتىن نىعايتۋعا سەپتىگىن تيگىزەتىندىگى ەرەكشە اتالىپ ءوتتى.